قازاقستان رەسپۋبليكاسىنىڭ كونستيتۋسياسى كۇنى مەرەكەسى قارساڭىندا جامبىل وبلىسى جۋالى اۋدانىنىڭ بايتەرەك اۋىلىندا سيفرلاندىرىلعان اقپاراتتىق ورتالىق اشىلدى. بۇل اقپاراتتىق ورتالىق اۋىلدىق كىتاپحانانىڭ ىشىندە ورنالاسقان. ورتالىقتى جابدىقتاۋعا ءبىر ميلليون 300 مىڭ تەڭگە قاراجات ءبولىنىپ، وعان تيىسىنشە، ءۇش كومپيۋتەر، ءبىر امبەبەپ كوشىرمە قۇرالى، ينتنەرنەت جەلىسىمەن قامتىلىپ، تاعى باسقا قاجەتتى قۇرالدار الىنعان دەپ جازادى Qamshy.kz اقپارات اگەنتتىگى. 

سيفرلاندىرىلعان اقپاراتتىق ورتالىقتىڭ اشىلۋى سالتاناتتى جاعدايدا ءوتىپ، وعان اۋداندىق ورتالىقتاندىرىلعان كىتاپحانالار جۇيەسىنىڭ باسشىلىعى، اۋىلدارداعى كىتاپحاناشىلار، سونىمەن بىرگە اۋىل تۇرعىندارى قاتىستى. اقپاراتتىق ورتالىقتىڭ اشىلۋىندا اۋدان اكىمىنىڭ ورىنباسارى ەربول جاڭابايەۆ قۇتتىقتاۋ ءسوز سويلەدى.

– قۇرمەتتى اۋىل تۇرعىندارى! سىزدەردى ەڭ الدىمەن ايتۋلى مەرەكە – قازاقستان رەسپۋبليكاسىنىڭ كونستيتۋسياسى كۇنىمەن قۇتتىقتايمىن. اتا زاڭىمىزدىڭ ارقاسىندا ەلىمىزدە كوپتەگەن يگىلىكتى ىستەر جۇزەگە اسىرىلىپ كەلەدى. تاۋەلسىز ەلىمىزدىڭ دە ەكونوميكاسى ءوسىپ، حالىقتىڭ تۇرمىسى مەن ءال-اۋقاتى ارتۋدا. مەملەكەت تاراپىنان قابىلدانعان باعدارلامالار دا ءوز جەمىسىن بەرىپ وتىرعانىن باسا ايتۋعا ءتيىسپىز. مىنە، «سيفرلىق قازاقستان» باعدارلاماسى ارقىلى ەل وڭىرلەرىندە سيفرلاندىرۋ ۇدەرىسى قارقىندى جۇرۋدە. شالعاي اۋىلداردا ورنالاسقان كىتاپحانالاردا سيفرلاندىرىلعان اقپاراتتىق ورتالىقتاردىڭ اشىلۋى – وسىنىڭ ايعاعى.

بىلتىرعى جىلى اۋدان كولەمىندە 11 اقپاراتتىق ورتالىق اۋىل تۇرعىندارىنا ەسىگىن ايقارا اشسا، بيىل دا ءتورت اقپاراتتىق ورتالىقتى جابدىقتاپ، اشقالى وتىرمىز. وبلىس اكىمى اسقار مىرزاحمەتوۆتىڭ ارنايى اقپاراتتىق بازا قالىپتاستىرۋ تۋرالى تاپسىرماسى بار. وسى رەتتە اۋىل تۇرعىندارى بۇل ورتالىقتىڭ مۇمكىندىكتەرىن بارىنشا پايدالانۋى ءتيىس. سوندا عانا تۇرعىنداردىڭ سيفرلىق ساۋاتتىلىعى ارتاتىن بولادى. سيفرلىق تەحنولوگيالاردى ەنگىزۋ – زامان تالابى دەيتىن بولساق، سيفرلاندىرىلعان اقپاراتتىق ورتالىقتار اقپارات الماسۋعا ۇلكەن مۇمكىندىكتەر جاساپ وتىر. ەندەشە، تۇرعىنداردىڭ يگىلىگى ارتىپ، ەلىمىزدە بەيبىتشىلىك زامان بولسىن،- دەدى ەربول ساكەن ۇلى.

اۋدان اكىمىنىڭ ورىنباسارى ەربول جاڭابايەۆ، اۋدان اكىمدىگى مادەنيەت جانە تىلدەردى دامىتۋ ءبولىمىنىڭ باسشىسى ساۋىتبەك ماحامبەتوۆ اقپاراتتىق ورتالىقتىڭ لەنتاسىن قيدى. ال اۋىل اجەلەرى تاتتىدەن شاشۋ شاشتى. ودان سوڭ اۋداندىق ورتالىقتاندىرىلعان كىتاپحانالار جۇيەسىنىڭ ديرەكتورى باقىتكۇل قانايەۆا سالتاناتقا قاتىسۋشىلاردى سيفرلاندىرىلعان اقپاراتتىق ورتالىقتىڭ جۇمىسىمەن جان-جاقتى تانىستىرىپ، كورسەتىلەتىن قىزمەتتەر بويىنشا اقپاراتتار ۇسىندى.

ايتا كەتۋ كەرەك، وسى كۇنى بيلىكول اۋىلدىق وكرۋگىنىڭ قاراباستاۋ اۋىلىندا دا سيفرلاندىرىلعان اقپاراتتىق ورتالىقتىڭ تۇساۋى كەسىلدى.