تاراز قالاسى «جەڭىس» ساياباعىنداعى «ەرلىك» مەموريالدىق كەشەنىندەگى «داڭق» زالىندا قازاقستان رەسپۋبليكاسىنىڭ كونستيتۋسياسى كۇنى مەرەكەسىنە وراي مەملەكەتتىك قىزمەتكە العاش قابىلدانعان ءبىرقاتار مەملەكەتتىك قىزمەتشىلەر انت قابىلدادى دەپ جازادى Qamshy.kz اقپارات اگەنتتىگى. 

ەلگە قىزمەت ەتۋدى ماقسات تۇتقان ولاردىڭ قىزمەتكە العاش كىرىسكەن كۇننەن باستاپ، حالىق الدىندا اشىق بولۋى، قالىڭ بۇقارانىڭ مەملەكەتتىك قىزمەتكە دەگەن سەنىمىن ارتتىرۋى باستى پارىز. ءوزىنىڭ فۋنكسيونالدىق مىندەتتەرىن ءمىنسىز ورىنداۋ، قوعامدا سىبايلاس جەمقورلىققا قارسى مادەنيەتتى قالىپتاستىرۋدا وزگەگە ۇلگى بولۋ سەكىلدى كوپتەگەن جاۋاپكەرشىلىكتەردى جۇكتەيتىن مەملەكەتتىك قىزمەتتىڭ ماڭىزدىلىعىن ۇعىندىرۋ ماقسات ەتىلگەن سالتاناتتى شارانى وبلىس اكىمىنىڭ ءبىرىنشى ورىنباسارى بەكبولات ورىنبەكوۆ اشىپ، قۇتتىقتاۋ ءسوز سويلەدى.

– قۇرمەتتى ارىپتەستەر، سىزدەردى ق ر كونستيتۋسياسى مەرەكەسى قارساڭىنداعى انت قابىلداۋ راسىمىمەن قۇتتىقتايمىن. سەبەبى، مەملەكەتتىك قىزمەتتىڭ ماڭىزدىلىعى ايرىقشا، ەكىنشىدەن ەلباسىمىز ن.ءا.نازاربايەۆتىڭ «قازاقستان–2050» ستراتەگياسىندا كاسىبي مەملەكەتتىك اپپارات قۇرۋ ءۇشىن مەملەكەتتىك قىزمەتكە قابىلداۋ مەن قىزمەتتىك وسۋدە مەملەكەتتىك قىزمەتشىلەردىڭ وسى قىزمەتكە لايىقتىلىعىن ەسكەرۋ، سىبايلاس جەمقورلىقپەن كۇرەس جۇرگىزۋ، قۇقىقبۇزۋشىلىقتى بولدىرماۋ، قوعامدا مەملەكەتتىك قىزمەتتىڭ بەدەلىن كوتەرۋ، حالىق پەن وتانعا ادال جانە تازا، ءمىنسىز قىزمەت ەتۋى سەكىلدى باسىم باعىتتار ايقىندالعان. سىزدەر ۇلكەن جاۋاپتى جۇمىس اتقارۋعا قادام باسىپ وتىرسىزدار. مەملەكەتتىك قىزمەتتىڭ قازاقستاندىق وزىق ۇلگىسىن قۇرۋمەن قاتار، ەلىمىزدە زاڭ ۇستەمدىگىن ورناتۋ، جەمقورلىقپەن كۇرەس جۇرگىزۋ ساياساتىن ىسكە اسىرۋ ءاربىر مەملەكەتتىك قىزمەتشىنىڭ باستى مىندەتى. سوندىقتان ءبىز سىزدەرگە مەملەكەت تاراپىنان، حالىقتىڭ اتىنان ارتىلعان وسىنداي جاۋاپكەرشىلىكتى ابىرويمەن اتقارادى دەگەن ۇلكەن سەنىمدەمىز، – دەدى.

جيىندا مەملەكەتتىك قىزمەت ىستەرى اگەنتتىگى وبلىسى بويىنشا دەپارتامەنتىنىڭ باسشىسى راۆيل تولەبايەۆ 24 جىلدىڭ ىشىندە قابىلدانعان كوپتەگەن جاڭا زاڭدار حالىق يگىلىگىنە قىزمەت ەتىپ جاتقانىنا توقتالدى.

سالتاناتتى شارا بارىسىندا وبلىس اكىمدىگىنىڭ باسقاراماسى مەن تاراز قالاسى اكىمدىگى جانە ءبىرقاتار اۋدان اكىمدىگىنىڭ بولىمدەرىنە جاڭادان قىزمەتكە قابىلدانعان 10 قىزمەتشى كوپشىلىك الدىندا انت بەردى. سونىڭ ءبىرى – تاراز قالاسى اكىمدىگىنىڭ تۇرعىن ءۇي قاتىناستارى ءبولىمىنىڭ باس مامانى ماقسات راحىمبەك ۇلى.

ءوز كەزەگىندە ول انت قابىلداۋ ءراسىمى ۇلكەن جاۋاپكەرشىلىكتى سەزىندىرەتىنىن تىلگە تيەك ەتىپ، الداعى ۋاقىتتا مەملەكەتتىڭ مۇددەسى ءۇشىن قىزمەت ەتەتىنىن، تاۋەلسىز ەلىمىزدىڭ وسىپ-وركەندەۋى ءۇشىن بار كۇش-جىگەرىن اياماۋعا انت بەرىپ، قازاقستاننىڭ دامۋىنا ءوز ۇلەسىن قوسۋدى پارىزىم سانايتىنىن ايتتى.