جامبىل وبلىسى سارىسۋ اۋدانىنىڭ جاڭاتالاپ اۋىلدىق وكرۋگى، «جانتورە-ساۋداكەنت» ءجشس-نىڭ بازاسىندا «كوكونىس جانە ارالاس ەگىن شارۋاشىلىعىن ءتيىمدى جۇرگىزۋدەگى تاجىريبەسىن وقۋ» اتتى سەمينار ءوتتى دەپ جازادى Qamshy.kz اقپارات اگەنتتىگى. 

اتالمىش سەمينار «اتامەكەن» اەس-نىڭ ورتالىعى، ق ر اۋىل شارۋاشىلىق مينيسترلىگىمەن جانە الماتى وبلىسىنىڭ جەمىس-جيدەك داقىلدارى قاۋىمداستىعىمەن بىرلەستىگىنىڭ ۇيىمداستىرۋىمەن جۇزەگە استى.

اتالعان ءىس-شارانىڭ ماقساتى – اگروونەركاسىپ كەشەنى سۋبەكتىلەرىن اقىسىز جانە اقپاراتتىق قولداۋ. سەمينار وسى ماقساتتا جۇرگىزىلىپ، جاڭاتالاپ اۋىلدىق وكرۋگىنىڭ اكىمى نۇرحان اقماعانبەتوۆتىڭ ءتوراعالىق ەتۋىمەن باستالدى.

جيىندا اۋدان اكىمىنىڭ ورىنباسارى ولجاس كوكەي «جانتورە-ساۋداكەنت» جاۋاپكەرشىلىگى شەكتەۋلى سەرىكتەستىگىندە تامشىلاتىپ سۋارۋ تەحنولگياسى، سونىمەن قاتار مينەرالدى تىڭايتقىشتار قولدانۋ مەن وسىمدىك قورعاۋ قۇرالدارىن ءتيىمدى پايدالانۋ ارقىلى جوعارى ءارى ساپالى ءونىم الۋ ءۇشىن جاسالىپ جاتقان اگروتەحنيكالىق شارالار تۋرالى جينالعاندارعا مالىمەتتەر بەردى.

اۋدان اكىمىنىڭ ورىنباسارىنا اۋىلشارۋاشىلىق يەلەرىنەن جينالعان ءبىرقاتار ازاماتتار سۇراقتارىن قويىپ، مەملەكەت تاراپىنان بەرىلەتىن كومەكتەرگە قانىق بولدى.

سونان سوڭ «جانتورە-ساۋداكەنت» ءجشس-نىڭ ديرەكتورى مەدەۋ شاحانوۆ 2015 جىلدان بەرى اتقارىلعان جۇمىستارى مەن ينتەنسيۆتى ەگىنشىلىك ءتۇرىن پايدالانا وتىرىپ جەتكەن جەتىستىكتەرىمەن ءبولىستى. تامشىلاتىپ سۋارۋ تەحنولوگياسى مەن بازاسىنداعى اۋىل شارۋاشىلىعى تەحنيكالارى، سۋ ساقتاۋ باسسەيندارىمەن تانىستىردى.

– شارۋاشىلىقتىڭ جالپى جەر كولەمى 203،1 گا، ەگىلگەن ەگىستىك كولەمى 115 گەكتاردى قۇرايدى. كوپ جىلدىق جوڭىشقا 15 گا، تامشىلاتىپ سۋارۋ تەحنولوگياسى قولدانىلاتىن ەگىس تۇرلەرى. 2018 جىلى ەگىلگەن جانە الىنعان ءونىم كولەمى جۇگەرى – 55 گا - 60 توننا، پياز – 30 گا – 850 سەنتنەر، باقشا – 25 گەكتاردى قۇرادى. اعىمداعى جىلى سۋ ۇنەمدەۋ تەحنولوگياسىنىڭ ەگىس القابىنا ەنگىزۋ كولەمى اۋدان بويىنشا بارلىعى 100 گەكتارعا جەتتى.

اۋىل شارۋاشىلىعى تەحنيكالارى جىل وتكەن سايىن جاڭارا ءتۇسىپ كەلەدى. بۇل سالىستىرمالى تۇردە قاراعاندا ۇلكەن جەتىستىك.

جاسىل تەحنولوگيالاردىڭ كومەگى ارقىلى بىرىنشىدەن ءونىم كولەمى مەن ساپاسىن ارتسا، ەكىنشىدەن ۋاقىت ۇنەمدەلەدى. اقيقاتىندا شارۋانىڭ جاز مەزگىلىندەگى ءار كۇنى قىس بويىنا ازىق بولارى بەلگىلى .

بيىل تامشىلاتىپ سۋارۋ ءادىسىن قولدانعانداردىڭ جاندارى جاي تاۋىپ، ىستەرى ىلگەرى باسۋدا.

ەشكىم قولىنا كۇرەك الىپ بۇرىنعىداي ەگىس سۋارىپ جۇرگەن جوق. بۇرىن اسا كوپ كولەمدە پايدالانىلاتىن سۋ ءقازىر ايتارلىقتاي ۇنەمدەلدى.

ال وسى جاڭا، ەنەرگيا ۇنەمدەۋشى تەحنولوگيالاردىڭ ارقاسىندا ءبىرتالاي شارۋالاردىڭ شىعىنى اناعۇرلىم كەمىپ، وندىرەتىن ءونىم كولەمى بىرنەشە ەسەگە ارتتى، – دەدى شارۋاشىلىق باسشىسى.

سۋ ۇنەمدەۋ تەحنولوگياسى بويىنشا جاڭاتالاپ اۋىلدىق وكرۋگىندە «جانتورە-ساۋداكەنت» ج ش س تامشىلاتىپ سۋارۋ تەحنولوگياسىن پايدالانا وتىرىپ، داندىك جۇگەرى، پياز جانە باقشا داقىلدارىن ورنالاستىرعاندىعى تۋرالى دا وسى سەميناردا كەڭىنەن ايتىلدى.

سونىمەن قاتار قازاق ەگىنشىلىك جانە توپىراقتانۋ عىلىمي زەرتتەۋ ينستيتۋتىنان كەلگەن قوناقتار بايانداماسى تىڭدالىپ، اۋىلدىق وكرۋگتەردەن كەلگەن اۋىلشارۋالىق يەلەرىنە ۇلكەن ساباق بولدى. كوپتەگەن قىزىقتىرعان ساۋالدارىنا تولىققاندى جاۋاپتار الىپ، قاجەتتىلىكتەرىن بىلە الدى.