تاراز قالاسىنىڭ اكىمى قايرات دوسايەۆ ەڭبەك ارداگەرلەرىمەن كەزدەسىپ، ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسى اياسىندا وبلىس ورتالىعىندا اتقارىلىپ جاتقان جۇمىستاردىڭ جاي-كۇيىن باياندادى، دەپ جازادى Qamshy.kz اقپارات اگەنتتىگى. 

كەزدەسۋدە شاھار باسشىسى ارداگەرلەردى وبلىستىڭ 80 جىلدىڭ مەرەيتويى قارساڭىندا قولعا الىناتىن كوپتەگەن شارۋالارمەن تانىستىردى.

–وزدەرىڭىزگە ءمالىم اعىمداعى جىلى جامبىل وبلىسىنىڭ قۇرىلعانىنا 80 جىل. وسى مەرەيلى داتا قارساڭىندا ولكەمىزدە كوپتەگەن اۋقىمدى جۇمىستار قولعا الىندى. ايماق باسشىسى اسقار مىرزاحمەتوۆتىڭ تاپسىرماسىمەن قالانىڭ ساۋلەتتىك كەلبەتىن جاقسارتۋ ماقساتىندا ەسكى ورتالىق بازار ماڭىنداعى «شاحريستان» ساۋدا ورتالىعىنىڭ ورنىندا «شاحريستان» تاريحي كەشەنى بوي كوتەرۋدە. اۋماعى 200 گەكتار بولاتىن كەشەندە وبلىستىق ولكەتانۋ مۇراجايى، كولەمدى ساعات ستەلاسى، كوركەمسۋرەت گالەرەياسى، 700-800 ورىندىق امفيتەاتر، كورمە زالى مەن «رۋحانيات» ورتالىعى سالىنادى. وتكەن جىلدىڭ ماۋسىم ايىندا قولعا الىنعان قۇرىلىس جۇمىستارى بيىل جىل سوڭىنا دەيىن تولىق پايدالانۋعا بەرىلمەك. ءارى وبلىس مەرەيتويىنا ارنالعان نەگىزگى شارالارى لەگى دە وسى كەشەن اۋماعىندا وتەتىن بولادى، – دەدى قايرات اسكەربەك ۇلى.

ارداگەرلەرمەن وتكەن باسقوسۋدا قالا اكىمى ق.دوسايەۆ كونە شاھاردى كورىكتەندىرۋ ماقساتىندا بيىل «تەكتۇرماس» مادەني-تاريحي كەشەنىندە «كونە-قامال» عيماراتىن سالۋ جانە «اۋليە-اتا» ەسكەرتكىشىنىڭ اۋماعىن اباتتاندىرۋ بويىنشا جۇمىستارىنىڭ باستالعانىنا دا ەرەكشە نازار اۋداردى.

مۇنان بولەك شاھار جۇرتشىلىعىن مازالاعان تۇرمىستىق ماسەلەلەر دە ءسوز بولىپ، ولاردى شەشۋ باعىتىندا قولعا الىنعان جۇمىستار دا ايتىلدى. ماسەلەن «اراي» شاعىن اۋدانىندا بولىنگەن 50 گەكتار جەر تەلىمىندە كوپقاباتتى تۇرعىن ۇيدە تۇراتىن تۇرمىستىق جاعدايى تومەن جانۇيالار جەكە قوسالقى شارۋاشىلىقتى قولعا الۋ مۇمكىندىگىنە يە بولدى. كۇنى بۇگىنگە دەيىن 833 تۇرعىن وسى اۋماقتان جەر تەلىمىن الۋعا وتىنىشپەن قايىرىلعان. ولاردىڭ ءارقايسىسىنا 0،06 گەكتاردان جەر بەرىلمەك. مۇنان باسقا وزدەرىن مازالاپ جۇرگەن كوممۋنالدىق ماسەلەلەر بويىنشا تارازدىقتار «Ikomek-109» قوسىمشاسىنىڭ كومەگىنە دە جۇگىنە الماق. «سيفرلى قازاقستان» مەملەكەتتىك باعدارلاماسى ارقىلى جۇزەگە اساتىن بۇل جوبا بيلىك پەن بۇقارا اراسىنداعى دانەكەر بولۋىمەن قۇندى.

قالا اكىمى باسپانالى بولۋدان ءۇمىتتى كەزەكتە تۇرعاندار مەن جەر تەلىمىن الۋعا ءوتىنىش بىلدىرگەندەردىڭ ماسەلەسى كەزەڭ-كەزەڭىمەن شەشىلەتىنىن دە اتاپ ءوتتى. بۇل ماقساتتا بيىل 4 الەۋمەتتىك جاڭا جاتاقحانا پايدالانۋعا بەرىلسە، كەلەر جىلى تاعى 4 جاتاقحانانىڭ قۇرىلىسى قولعا الىنباق.