بۇۇ دامۋ باعدارلاماسىنىڭ قارجىلىق قولداۋىمەن جۇزەگە اسىرىلعان "قازاقستانداعى سىبايلاس جەمقورلىقتىڭ جاي-كۇيىنىڭ مونيتورينگى" زەرتتەۋى اياسىندا Transparency Kazakhstan ساراپشىلارى قالا، وبلىس جانە اۋدان ورتالىقتارى دەڭگەيىندە 9 000 رەسپوندەنتكە ساۋال قويدى جانە "اشىق ديالوگ" پورتالىنا كەلىپ تۇسكەن 568 ءوتىنىشتى زەردەلەدى.

وسىلايشا، رەسپوندەنتتەردىڭ جارتىسىنان استامى، اتاپ ايتقاندا 54،4%-ى سوڭعى جىلدارى سىبايلاس جەمقورلىق دەڭگەيىنىڭ تومەندەگەنىن اتاپ ءوتتى. سونىمەن قاتار، سۇرالعانداردىڭ ءاربىر ونىنشىسى عانا ماسەلەنى پارا ارقىلى شەشۋ قاجەتتىگىنە تاپ بولعان.

ازاماتتاردىڭ پىكىرىنشە، ماسەلەلەردى كوبىنەسە جامبىل، اتىراۋ، الماتى، ماڭعىستاۋ، قاراعاندى، قىزىلوردا وبلىستارى مەن الماتى قالاسىندا بيرەسمي جولمەن شەشۋگە تۋرا كەلەدى.

اسكەري كوميسسارياتتار، مەملەكەتتىك بالاباقشالار، ازاماتتىق حال اكتىلەرىن تىركەۋ بولىمدەرى (احاج)، كەدەن جەمقورلىق جايلاعان مەملەكەتتىك ورگاندار رەتىندە بەلگىلەنگەن.

ازاماتتار پارا بەرۋگە ماجبۇرلەگەن 70-تەن استام سەبەپتى ايتتى. ەڭ كوپ تارالعانى - جاقسى ماماندا ەمدەلۋ، جۇمىسقا ورنالاسۋ، جەر تەلىمىن رەسىمدەۋ، بالانى بالاباقشاعا ورنالاستىرۋ جانە جول ءجۇرۋ ەرەجەلەرىن بۇزۋ.

كاسىپكەرلەردىڭ پىكىرىنشە، الماتى، نۇر-سۇلتان، شىمكەنت، الماتى، ماڭعىستاۋ، قاراعاندى، اتىراۋ، قىزىلوردا وبلىستارى جەمقورلىق جايلاعان وڭىرلەر بولىپ تابىلادى.