«قازاقستان» ءقوناقۇيىنىڭ «Grand Ballroom» زالىندا الماتىداعى شەت تىلدەر جانە ىسكەرلىك كارەرا ۋنيۆەرسيتەتىنىڭ ۇيىمداستىرۋىمەن اۋىزاشار وتكىزىلدى. يگىلىكتى شاراعا تۇركيانىڭ قازاقستانداعى ەلشىلىگىنىڭ قىزمەتكەرلەرى، قارجى سالاسىنىڭ ماماندارى، ءعىلىم-بىلىم وردالارىنىڭ وكىلدەرى، حالىقارالىق ۇيىم قىزمەتكەرلەرى، اقساقالدار مەن زيالى قاۋىم، بارلىعى ەكى جۇزدەن استام مۇسىلمان قاتىستى. بيىلعى ورازادا بەسىنشى رەت ۇيىمداستىرىلىپ وتىرعان اۋىزاشاردا ەكى ەلدىڭ دوستاستىعىن نىعايتۋ نيەتىندەگى باتا-تىلەكتەر ايتىلىپ، ۇلاعاتتى اڭگىمەلەر ءوربىدى. شەت تىلدەر جانە ىسكەرلىك كارەرا ۋنيۆەرسيتەتىنىڭ رەكتورى، پروفەسسور، دوكتور سابري حيزمەتلي مۇسىلماندار ءۇشىن ەرەكشە سانالاتىن بۇل ايدا ىزگى ىستەردى كوبىرەك اتقارۋعا شاقىردى. اتالمىش وقۋ ورنىنىڭ قۇرىلعانىنا بيىل 10 جىل تولىپ وتىر. وسى ورايدا ۋنيۆەرسيتەتتە 2015-2016 وقۋ جىلىندا جوعارى بالل جيناعان مەكتەپ تۇلەكتەرىنە 105 گرانت ءبولىندى. كۇندىزگى بولىمگە تۇسكەندەر 10 % جەڭىلدىكپەن وقي الادى. ۇزدىك ستۋدەنتتەر تۇركيا مەن قىتايداعى وقۋ ورىندارىندا گرانت نەگىزىندە ستيپەنديا الىپ، وقۋىن جالعاستىرادى. بارلىعى ون ءۇش ماماندىق بويىنشا ءبىلىم بەرەتىن ۋنيۆەرسيتەتتە ۇبت-دان 80-85 بالل العاندارعا 15% جەڭىلدىك، 86-90 بالل بولسا 20 % ، 90-99 بالل العاندارعا 25%، 100 بالل جانە ودان جوعارى بولسا 50% جەڭىلدىكتەر بەلگىلەنگەن. «التىن بەلگى» يەلەرى ءتورت جىل تەگىن وقىتىلادى. بيىل سابري حيزمەتليدىڭ باستاماسىمەن يگى ىستەردىڭ ءبىرى رەتىندە جەتىم بالالار، كوپ بالالى وتباسىنان شىققاندار مەن مۇگەدەكتەرگە ارنايى جەڭىلدىكتەر قاراستىرىلىپ وتىر. اۋىلدان كەلگەن ستۋدەنتتەرگە ءۇش مەزگىل تاماقپەن قامتاماسىز ەتىلگەن جاتاقحانا بەرىلەدى.
شارافات جىلقىبايەۆا
