الماتىدا «الەم حالىقتارى جازۋشىلار وداعى» قوعامدىق بىرلەستىگىنىڭ تۇساۋكەسەرى بولدى. تۇساۋكەسەرگە قازاقستاندىق تانىمال اقىن-جازۋشىلار، ەلشىلىكتەردىڭ وكىلدەرى، قوعام قايراتكەرلەرى، قوعامدىق بىرلەستىكتەردىڭ، بۇقارالىق اقپارات قۇرالدارى وكىلدەرى قاتىستى.
«الەم حالىقتارى جازۋشىلار وداعى» قوعامدىق بىرلەستىگىنىڭ اشىلۋ سالتاناتىنداعى ءداستۇرلى تۇساۋكەسەر لەنتاسىن جازۋشى مارال ىسقاقباي مەن بەلگىلى جازۋشى، قوعام قايراتكەرى عابباس قابىشيەۆ قيىپ، جاڭا قۇرىلىپ جاتقان الەمدىك جازۋشىلار ورداسىنا اق جول تىلەدى.
تۇساۋكەسەر راسىمىندە جازۋشى-ساتيريك، ۇستاز ۇمبەتباي ۋايدين، جازۋشى، اكادەميك، حالىقارالىق سىيلىقتاردىڭ لاۋرەاتى، قازاقستانداعى يۋنەسكو وكىلى ال-حالەل قارپىق، حالىقارالىق سىيلىقتاردىڭ لاۋرەاتى نازىكەن الپامىس قىزى، جازۋشى، قازاقستاننىڭ ەڭبەك سىڭىرگەن مادەنيەت قىزمەتكەرى زاكىر اسابايەۆ، عالىم، اقىن، اكادەميك، ەتنوگراف-جازۋشى بولات بوپاي ۇلى قوعامدىق بىرلەستىكتى ۇيىمداستىرۋشىلاردىڭ اتىنا قۇتتىقتاۋ سوزدەر ايتتى. «الەم حالىقتارى جازۋشىلار وداعى» قوعامدىق بىرلەستىگىنىڭ اتىنا ءبىرقاتار شەتەلدىك ۇيىمداردان قۇتتىقتاۋلار كەلگەن ەكەن. بىرلەستىك ءتوراعاسى قايرات دۇيسەنوۆتى بۇۇ-نىڭ حالىقارالىق ادام قۇقىعىن قورعاۋ كوميتەتىنىڭ قازاقستانداعى وكىلى، اكادەميك ابەن نۇرمانوۆتان، رەسەي فەدەراسياسىنداعى قالامگەرلەر الەكساندر پوليكانين، ماكسيم زامشيەۆ، ۆلاديمير پوۆوليايەۆ، جۇڭگو حالىق رەسپۋبليكاسىنداعى جازۋشى اكبار ءماجيت، تاجىكستاننان جازۋشى ابدۋلساتتار نۇرالييەۆ، بىشكەكتەن نازاربەك بايجىگىتوۆ، انكارادان ياكۋب ومەروعلۋ تەلەفون ارقىلى قۇتتىقتاپتى.
