اقتاۋدا جاڭا مۋزەي اشىلدى. ورتالىققا مەملەكەت جانە قوعام قايراتكەرى ءابىش كەكىلباي ۇلىنىڭ ەسىمى بەرىلدى. نىساننىڭ اشىلۋ سالتاناتىنا ق ر پرەزيدەنتى قاسىم-جومارت توقايەۆ، ءابىش كەكىلباي ۇلىنىڭ جارى كلارا جۇماباي قىزى، ەلىمىزگە بەلگىلى اقىن-جازۋشىلار مەن قوعام قايراتكەرلەرى جانە بىرنەشە ەلدەن ارنايى كەلگەن قوناقتار قاتىستى. ورتالىقتىڭ ءدال الدىنا تەرەڭ وي، تەگەۋرىندى تالانت يەسىنىڭ رۋحىنا قۇرمەت كورسەتىلىپ، ابىز تۇلعا ەسكەرتكىشى تۇرعىزىلعان. شىمىلدىعى تۇرىلگەن ەڭسەلى ەسكەرتكىش - بۇكىل سانالى عۇمىرىن، ەسەلى ەڭبەگىن تۋعان حالقىنا باعىشتاعان ارداقتى پەرزەنتىنە دەگەن ءيىسى قازاقتىڭ شىنايى كوڭىلى. مەملەكەت باسشىسى ەسكەرتكىشكە گۇل شوقتارىن قويىپ، ماڭعىستاۋلىقتاردى ايتۋلى شارامەن قۇتتىقتادى.

       «بۇگىن مىنە، زاڭعار جازۋشى، اسا كورنەكتى مەملەكەت جانە قوعام قايراتكەرى ءابىش كەكىلبايەۆ رۋحىنا تاعزىم ەتۋگە جينالدىق. بۇل تەك ماڭعىستاۋ جەرى  عانا ەمەس، بۇكىل ەلىمىز ءۇشىن ماڭىزدى وقيعا. جاڭا عيماراتقا قونىستانعان تاريحي-ولكەتانۋ مۋزەيىنە  ءابىش كەكىلبايەۆ ەسىمى بەرىلدى. ۇلى ويشىل ءابىش كەكىلبايەۆ قانداي قۇرمەتكە دە لايىقتى. ەسكەرتكىش ورناتۋعا ات سالىسقان بارلىق ازاماتتارعا العىس ايتامىز،بۇل -  ءابىش اعامىزدىڭ 80 جىلدىق مەرەيتويىنا لايىقتى تارتۋ بولدى. ءبىز بۇگىن رۋحىن ۇلىقتاپ وتىرعان ءابىش كەكىلبايەۆ ادامزاتتىق بولمىستىڭ جوعارى دەڭگەيىنە كوتەرىلگەن ءبىرتۋار تۇلعا، قازاق حالقىنىڭ ۇلى پەرزەنتى. حالىقتىڭ ماقتانىشىنا اينالعان ازاماتتاردىڭ ەسىمىن جادىمىزدان شىعارماۋ – بارشامىزدىڭ پارىزىمىز. ول - قازاقستاننىڭ ەڭبەك ەرى اتاعىنا يە بولعان تۇڭعىش قالامگەر. ادەبيەتتە ۇلتتىق سانانى ساقتاۋ ءۇشىن مول ەڭبەك ەتكەن. جازۋشىنىڭ ەڭبەكتەرى الەم ادەبيەتىنىڭ التىن قورىنا تيەسىلى. ءابىش اعامەن پارلامەنتتە ارىپتەس رەتىندە ەتەنە ارالاستىم. ونىڭ «تاۋەلسىزدىك - ءتاتتى ءسوز عانا ەمەس، ۇلتتىق جاۋاپكەرشىلىك» دەگەن تۇجىرىمى بارشاعا وي سالادى»، - دەگەن ق ر پرەزيدەنتى قاسىم-جومارت توقايەۆ جاستاردى ءابىش كەكىلبايەۆتىڭ قوعامدىق-ساياسي كوزقاراستارىن تانىپ-بىلۋگە شاقىردى. 

         بيىكتىگى تۇعىرىمەن قوسقاندا 6 مەتردى قۇرايتىن ەڭسەلى ەسكەرتكىش قولادان قۇيىلدى. ال، تۇعىرى گرانيتپەن قاپتالعان.

         پرەزيدەنت باستاعان رەسمي دەلەگاسيا ورتالىقتاعى ءابىش كەكىلباي ۇلى ەسىمى بەرىلگەن مۋزەيمەن تانىسىپ، مۇراجايعا ۇلى ابايدىڭ كارتيناسىن سىيعا تارتتى. اۋدانى 8742 شارشى مەتردى قۇرايتىن وبلىستىق تاريحي-ولكەتانۋ مۋزەيى جازۋشىنىڭ ءومىرى مەن شىعارماشىلىعىنا جانە مەملەكەتتىك قىزمەت جولىنا ارنالعان ەكسپوزيسيالىق زالداردان تۇرادى.

         مۋزەيدە ءابىش كەكىلبايۇلىنا ارنالعان جاڭا كىتاپتار تانىستىرىلدى. ءابىش كەكىلبايەۆ شىعارمالارىنىڭ 25 تومدىعىن شىعارۋ جوباسى قولعا الىنعان ەدى. سونىڭ 7 تومى "جازۋشى» باسپاسىنان باسىلىپ شىقتى. عاريفوللا انەس تاڭدامالى ەنسيكلوپەديالىق جيناعىن توپتاستىردى. بۇل كۇنى ساۋىتبەك ابدراحمانوۆتىڭ«ابىز» اتتى كىتابىنىڭ تۇساۋى كەسىلدى.ال، ماڭعىستاۋ وبلىستىق مادەنيەت باسقارماسى جاساعان «ءابىش الەمى» فوتوالبومى دا كوپشىلىك نازارىنا ۇسىنىلدى.