"قامشى" – ەركىن اقپارات الاڭى. وي ورتاقتاسىپ، پىكىر جارىستىرۋ وقىرماننىڭ ەنشىسىندە. ەستەرىڭىزدە بولسا جاقىندا «قامشى» پورتالىندا تانىمال قازاقستاندىق تەننيسشى  زارينا دياس تۋرالى اۋقىمدى ماقالا جارىق كورگەن بولاتىن. ماقالادا، قازاقستاننىڭ ءبىرىنشى راكەتكاسى - زارينانىڭ مەملەكەتتىك تىلدە سويلەمەيتىندىگى سىنعا الىنعان ەدى.  «قامشى» پورتالى رەسەيلىك «سوۆەتسكيي سپورت» باسىلىمىنا سىلتەمە جاساي وتىرىپ، تەننيسشى زارينا دياستىڭ قازاقستان تەننيس فەدەراسياسى تۋرالى مالىمدەمەسىنە دە توقتالعان بولاتىن. بۇل ماقالا قازاقستاندىق ب ا ق پەن الەۋمەتتىك جەلىدە قىزۋ پىكىر-تالاس تۋدىرىپ، ماسەلە ۋشىعىپ كەتكەن ەدى. رەسەيلىك بۇقارالىق اقپارات قۇرالىنىڭ ماقالاسىن قازاقستاندىق «sport.nur.kz» سايتى جاريالاعان بولاتىن.

رەسەيلىك باسىلىم جاريالاعان العاشقى ماقالاعا قاتىستى تانىمال تەننيسشىنىڭ ءوزى ءۇن قاتىپتى. بۇل تۋرالى «قامشى» سايتى  Vesti.kz-كە سىلتەمە جاساي وتىرىپ  حابارلايدى.

قازاقستاندىق  الەۋمەتتىك ورتادا قىزۋ تالقى  تۋدىرعان داۋلى سۇحباتقا قاتىستى تەننيسشى زارينا دياس  جاڭا مالىمدەمەسىندە جاساعان. وندا، زارينا رەسەيلىك باسىلىمعا سۇحبات بەرمەگەنىن ايتقان ەكەن. سونداي-اق، «سوۆەتسكيي سپورتتاعى» ماتەريالدار جالعان ەكەنىن، ءوزىنىڭ قازاقستان تەننيس فەدەراسياسىن سىاماعانىن جانە مەملەكەتتىك تىلگە دەگەن قۇرمەتسىز سوزدەر ايتپاعانىن ايتىپتى.

-مەن «سوۆەتسكيي سپورت» باسىلىمىنا سۇحبات بەرگەن جوقپىن. ونداعى اقپاراتتار ويدان قۇرالعان جانە مەنىڭ اتىمنان جازىلعان،-دەيدى زارينا دياس.

ەسكەرتە كەتەيىك، قازاقستاندىق تەننيسشى قىزدىڭ سۇحباتى «سوۆەتسكيي سپورت» باسىلىمىنا 6-شىلدە كۇنى جاريالانعان بولاتىن.

ال زارينا دياس – قازاقستاننىڭ ءبىرىنشى راكەتكاسى جانە WTA رەيتينگىسى بويىنشا 34-ورىنعا تابان تىرەگەن.

ال ماقالادا اتى اتالعان تاعى ءبىر قازاقستاندىق ەسترادا جۇلدىزى – ءدىلناز احمەدييەۆا «فەيسبۋك» الەۋمەتتىك جەلىسى ارقىلى بولعان وقيعاعا قاتىستى جاۋابىن بەرىپتى. ءدىلناز حانىمنىڭ ءوزى الەۋمەتتىك جەلىنى پايدالانبايتىندىقتان، جاۋابىن قۇربىسى، تانىمال پروديۋسەر – الۋا قوناروۆا جەتكىزدى.

- قۇرمەتتى دوستار! اتالمىش سۇحبات وسىدان 10 جىل بۇرىن ءبىر جۋرنالعا جاريالانعان بولاتىن. ال ءقازىر ول جۋرنال جابىلىپ قالعان. مەن بۇل جۋرنالدىڭ رەداكسياسىن ىزدەستىرگەن بولاتىنمىن، تاپپادىم. سەبەبى، ولار مەنىڭ اتىمنان جالعان اقپارات تاراتقان ەكەن. ياعني، ولاردىڭ اۋەلگى ماقساتتارى وسى بولعان. وسى ەلدە ءومىر سۇرە تۇرىپ، ءوسىپ-ونىپ، وسى ەلدىڭ نانىن جەي تۇرا، ق ر ەڭبەك سىڭىرگەن قايراتكەرى اتاعىن الا تۇرىپ، «بۇل ۇلتتى جەك كورەمىن» دەۋىم، ءتىپتى ۇيات بولار ەدى. مەن قازاقستاندا، قازاقتاردىڭ اراسىندا تۇرامىن جانە مەن قازاق ۇلتىنا دەگەن وشپەندىلىگىم جوق. بۇل اقىماقتىق بولار ەدى جانە ونداي سۇۇراقتى ماعان ەشكىم قويعان جوق. قويسا دا، مەنىڭ جاۋابىم مۇلدە باسقاشا بولار ەدى. مەن قازاقستاندى جاقسى كورەمىن! مەنىڭ ەڭ جاقىن قۇربىلارىم، دوستارىم – قازاقتار! سوندىقتان، مەنىڭ اتىمنان تارالعان جالعان اقپاراتقا سەنبەۋلەرىڭىزدى وتىنەمىن. بارلىعىڭىزعا تىنىشتىق پەن جاقسىلىق تىلەيمىن! قۇرمەتپەن، سىزدەردىڭ ءدىلناز!

نۇرگەلدى ءابدىعاني ۇلى