جاقىندا Abai.kz اقپاراتتىق پورتالىندا «بىزگە كەزەكتى پرەزيدەنت ەتىپ كىمدى تاعايىندايدى؟» اتتى ماقالا جارىق كوردى(http://abai.kz/post/view؟id=4065). ءبىر قىزىعى - اتالمىش ماقالا ق ر پرەزيدەنتىنىڭ كەزەكتى ەڭبەك دەمالىسىنا شىعۋىمەن تۇسپا-تۇس جارىق كورىپ وتىرعاندىعى.
ماقالا اۆتورى دانيار ناۋرىز بۇرىن ەشبىر جەردە ەسىمى اتالماعان – نۇرلان ەرمەكبايەۆ دەگەن فيگۋرانى – ق ر پرەزيدەنتتىگىنە رەسەي تاعايىندايدى دەپ كورسەتەدى. سويتسەك، ەرمەكبايەۆىمىز – رەسەيدىڭ ءۇش بىردەي بارلاۋ اگەنتتىگىندە قىزمەت ەتكەن، فسب-كگب-گرۋ-دىڭ اككى تىڭشىسى كورىنەدى. بىرنەشە مەملەكەتتەردە ەلشىلىك قىزمەتتە بولىپ، كسرو گەنشتابىنىڭ اتىشۋلى وفيسەرى دە بولعان-مىس. اۆتوردىڭ ايتۋىنشا، ەرمەكبايەۆ - جۇڭگو مەن رەسەي ءۇشىن ەڭ ىمىراشىل، ايتقانىن ىستەپ، ايداعىنا جۇرەتىن باسشى بولماق كورىنەدى. قىتايدا بىرنەشە جىل ەلشى بولعان، رەسەيدىڭ ارناۋلى تىڭشىسى. ەكى مەملەكەتكە دە ءتيىمدى كادر دەپ جازادى اۆتور.
سونداي-اق، ماقالادا «جاڭا پرەزيدەنتتەن» كەيىن ق ر پرەمەر-مينيسترلىگىنە ۇمىتكەر رەتىندە باقىتجان ساعىنتايەۆتىڭ اتى اتالادى.
دانيار ناۋرىزدىڭ ايتۋىنشا، كارىم ءماسىموۆ مىڭ جەردەن تىراشتانعانىمەن پرەزيدەنت بولا المايدى. سەبەبى – ۇيعىردىڭ بالاسى. ال قاسىم-جومارت توقايەۆ – تىم ىنجىق. تاسماعامبەتوۆ – شۋىلداق، داۋشىل. باتىستىڭ جىگىتتەرى – قىزباقاندى، سولتۇستىك پەن شىعىستاعىلار رەسەيگە ۇنامايتىندىقتان، كانديدات بولا المايدى دەپ جازادى. سوندا قالعانى – وڭتۇستىكتەن شىققان ساۋداگەرلەر دەيدى.
ەڭ تاڭعالارلىعى، مۇنداي سىبىس ەلباسىنىڭ كەزەكتى ەڭبەك دەمالىسىنا شىعۋىمەن تۇسپا-تۇس كەلىپ وتىر. ماقالانى وقىپ وتىرىپ، مەملەكەت باسشىسىنىڭ دەمالىستا جۇرگەنىن پايدالانىپ، ءىرى ساياسي توپتار قازاقستاندا ءاۋىس-تۇيىس (مەملەكەتتىك توڭكەرىس، رەفەرەندۋم ت.ب. ) جاساۋعا ارەكەتتەنۋدە مە دەگەن ويعا قالاسىز.
راس. ەلدى شيرەك عاسىرعا جۋىق باسقارىپ كەلگەن نۇرسۇلتان نازاربايەۆتىڭ دەنساۋلىعى تۋرالى قازاقستاندىق باسىلىمدار ءبىرازدان بەرى جازىپ كەلەدى. ءتىپتى، بيىلعى كەزەكتەن تىس پرەزيدەنت سايلاۋىن ەلباسىنىڭ ساياسي ساحناداعى سوڭعى مەرزىمى دەپ تە توپشىلايتىندار جوق ەمەس.
سوعان قاراعاندا قازاق بيلىگىندە قاندايدا ءبىر ساياسي ءاۋىس-تۇيىستىڭ سالقىنى سەزىلە باستاعانداي. ءبىراق، ەلباسى بيلىكتەن باس تارتارىن اشىپ ايتقان جوق.
نۇرگەلدى ءابدىعاني ۇلى
پىكىر قالدىرۋ