قازاق ۇلتى بۇگىن اسا ءقاۋىپتى دە قاتەرلى كەزەڭدە تۇر. بارلىق جاعىنان الىپ قاراساڭىز دا سولاي.  ساياساتكەرلەردى بىلاي قويعاندا، كەز كەلگەن كوزى قاراقتى قازاق ازاماتى سوڭعى جىلدارى ۇلتتىق ماسەلەدە، قۇندىلىقتارىمىزدى جاڭعىرتۋ باعىتىنداعى جۇمىستاردا العا باسۋدان كورى  كەرى كەتۋشىلىكتىڭ باسىم بولعانىن انىق اڭعارادى.  ءيا، مەملەكەتتىك دەڭگەيدەگى قازاق ءتىلىنىڭ جاعدايى مۇلدە سىن كوتەرمەيدى. ەسەسىنە، ءبىزدىڭ بيلىكتىڭ بيىك دالىزىندە جۇرگەندەر  جاعىمپازدىق جارىسىنان الدارىنا جان سالماۋعا كىرىسىپ كەتكەندەي قۇددى. جو-جوق. پرەزيدەنت نازاربايەۆتىڭ ساياسي كارەراسىنا، سىڭىرگەن ەڭبەگىنە ەشكىم كوز الارتىپ قارامايدى، ارينە. جاقسىلىق ايتىلۋى ءتيىس، ەگەر... تەك مۇنىڭ اياعى جەكە باسقا تابىنۋشىلىققا ۇلاسىپ كەتپەسىنە كىم كەپىل؟  سونىمەن، «قامشى» پورتالى سوڭعى كەزدەرى قازاقستاندىق ساياساتكەرلەر مەن كاسىپكەرلەردىڭ پرەزيدەنت نازاربايەۆ الدىندا جەكەلەگەن يميدجدارىن كوتەرۋ ءۇشىن جاساعان كۇلكىلى ءھام ەرسى ارەكەتتەرىن نازارلارىڭىزعا ۇسىنادى.

1. مادەنيەت جانە سپورت ءمينيسترى ارىستانبەك مۇحامەدي ۇلى پرەزيدەنت الدىندا قۇرداي جورعالايتىن شەنەۋنىكتەردىڭ كوشىن باستاۋعا ابدەن لايىقتى ادام دەسەك، ارتىق ايتپاعان بولار ەدىك. جاقىندا استانا قالاسىندا  اشىق اسپان استىندا «ايدا» وپەراسى قويىلدى. ارىستانبەك مۇحامەدي ۇلى وپەرانى  قويۋ ءۇشىن ەل بيۋدجەتىنەن 150 ملن تەنگەنى ءتىپتى اياعان دا جوق. 

1.1 سونىمەن قاتار، ءمينيستردىڭ ەلباسى سۋرەتىن ۇلتتىق مۇراجايعا ءىلۋ ءۇشىن  130 ملن تەڭگەگە  كارتينا سالدىرىپ جاتقانى دا ءمالىم بولدى.

1.2  وتكەن جىلعى قاراشاداعى اۋىر اتلەتيكادان الەم چەمپيوناتى ەسىڭىزدە بولار. زىلتەمىردى شىرق ۇيىرگەن يليا يلين ءتورتىنشى مارتە الەم بىرىنشىلىگىنىڭ التىنىن قانجىعاسىنا بوكتەرىپ، ءانۇرانىمىز وينالىپ جاتقاندا مادەنيەت جانە سپورت ءمينيسترى ارىستانبەك مۇحامەدي ۇلى زىر جۇگىرىپ، ۇيالى تەلەفونىن تەبىرەنىس پەن تولعانىس ۇستىندە تۇرعان تولاعايعا ساسىپ-سابدىراپ تىقپالاي بەردى. ونىسى ازداي، انۇرانمەن شارۋاسى جوق شەنەۋنىك بىرەۋ-مىرەۋ قوڭىراۋ شالىپ قالار دەپ، قولىنداعىسىنا قايتا-قايتا قاراعىشتاۋمەن بولدى. ءيا، پرەزيدەنت نازاربايەۆتىڭ قوڭىراۋىنا جاۋاپ بەرمەي قالسا، جاعدايى قيىنداپ كەتەر ەدى عوي.

2. نۇرلان سماعۋلوۆتىڭ پاتشا الدىنداعى جاعىمپازدىعى بۇكىل الەۋمەتتىك جەلى قولدانۋشىلارىنىڭ كۇلكىسىن كەلتىرگەنى بار ەمەس پە؟! ەكسپو-2017 كورمەسىنىڭ عيماراتىن تانىستىرۋ ساتىندە نۇرلان مىرزاعا پرەزيدەنت نازاربايەۆ: «باسقا اتاۋ تاپپادىڭ با؟ مەگا؟ سەن بارلىق قازاقستانعا ءوزىڭنىڭ مەگاڭدى تىقپالاپ بولدىڭ عوي» دەگەندە اككى كاسىپكەر «ءبىزدىڭ باسقاشا اتاۋىمىز بار. نۇرپلازا دەپ اتاساق قالاي بولادى؟ ەگەر ءسىز رۇقسات بەرسەڭىز، ارينە»،- دەپ جۇرتتى كۇلدىرىپ ەدى. نۇرلان مىرزانىڭ جاعىمپازدىعىنا قايران قالعان ەلباسىنىڭ ءوزى: «كۇلىپ جىبەرىپ، مەن ول ءۇشىن ايتىپ وتىرعانىم جوق. سەن وسىلاي ادەمى جاعىمپازدانۋدى قايدان ۇيرەنگەنسىڭ؟» دەپ سۇراقتى توتەسىنەن قويعان. سوندا سماعۇلوۆ سەرى سەكەم الدىرماستان «ءومىر ۇيرەتتى، نۇرسۇلتان ءابىش ۇلى!» دەپ جاۋاپ قايىرعان بولاتىن.

ءيا، پرەزيدەنت نازاربايەۆقا قاراتا جاعىمسىنۋشىلار نەندەي تەڭەۋلەردى ايتپادى دەسەڭىزشى؟ «اق پاتشام»، «مەن نۇرسۇلتان نازاربايەۆتى نۇح پايعامبارعا تەڭەر ەدىم»، «نۇرسۇلتان ءابىش ۇلى – مۇحاممەد پايعامبارعا تەڭەۋگە تۇرارلىق»، «وعان حالىق قاھارمانى اتاعىن بەرۋ كەرەك» دەدى، ت.ب.  ال ءسىز قانداي جاعىمپازدىقتى بىلەسىز؟

نۇرگەلدى ءابدىعاني ۇلى

«قامشى»  سىلتەيدى