ماڭعىستاۋ وبلىسىنداعى كوڭىل مارقايتار جەتىستىكتەر تۋرالى «قامشى» از جازبادى. ەندى مىنە، وڭىردەگى شاعىن جانە ورتا بيزنەس تۋرالى ءسوز قوزعاماقپىز.

شاعىن جانە ورتا بيزنەس بەلسەندى دامىعان جەردە ەكونوميكا ورنىقتى بولماق. تەك بيىلعى جىلدىڭ 7 ايىندا وڭىردە 4 مىڭ كاسىپكەر ءوز ءىسىن اشتى. بۇلاردىڭ ۇلەسى حالىقتىڭ ەكونوميكالىق بەلسەندى توبىنىڭ قۇرىلىمىندا 43 پايىزعا دەيىن ءوستى. ەگەر «بيزنەستىڭ جول كارتاسى – 2020» باعدارلاماسى ارقىلى شاعىن جانە ورتا بيزنەستىڭ باستاماشىلىعى قولداۋ تاپسا، ال شاعىن بيزنەستىڭ باستاماشىلىعى «جۇمىسپەن قامتۋ – 2020» باعدارلاماسى اياسىندا جۇزەگە اسادى. باعدارلامانى ىسكە اسىرۋ بيىلعى جىلدىڭ 1 شىلدەسىنەن باستالدى. «ءبىراق، ازىرگە ونى قورىتىندىلاۋ ەرتەرەك. بارلىق اۋداندار مەن قالالاردا دايىندىق جۇمىسى جۇرگىزىلدى، جۇمىسپەن قامتۋ ورتالىقتارى قۇرىلدى. ءوز بەتىمەن جۇمىسپەن قامتىلعاندار مەن حالىقتىڭ جۇمىسسىزدار توبىنىڭ قاتارىنان باعدارلاماعا ىقتيمال قاتىسۋشىلار انىقتالدى، باسىمدىلىق كاسىپتىك ماماندىقتاردىڭ تىزبەسى قۇرىلىپ، وسى ماماندىقتار بويىنشا كاسىپتىك وقىتۋ جۇزەگە اسىرىلاتىن بولادى»،— دەيدى اكىمشىلىك.

دەنساۋلىق، ءبىلىم بەرۋ سالاسى

وبلىس اكىمدىگى ءبىلىم جانە عىلىم مينيسترلىگىمەن بىرلەسىپ 2015 جىلعا دەيىن قانداي مەكتەپ، قايدا سالىناتىنى جونىندە ناقتى شەشىم دە شىعارىپ قويدى. وڭىردە الداعى 4-5 جىلدا بارلىعى 15 مىڭ ورىندىق 18 مەكتەپ سالۋ كوزدەلىپ وتىر. ونىڭ ىشىندەگى ەكەۋىنىڭ قۇرىلىسى (جاڭاوزەن قالاسىنداعى 1200 ورىندىق جانە مۇنايلى اۋدانىنىڭ اتامەكەن اۋىلىنداعى 640 ورىندىق مەكتەپتەر) بيىل اياقتالدى. قاراقيا اۋدانىنىڭ جەتىباي كەنتىندەگى، مۇنايلى اۋدانىنىڭ باتىر جانە ماڭعىستاۋ اۋىلدارىنداعى بارلىعى 2784 ورىندىق ءۇش مەكتەپتىڭ قۇرىلىسى ءقازىر قارقىندى ءجۇرىپ جاتىر. مۋلتيمەديالىق، لينگافوندىق، پاندىك كابينەتتەرمەن قامتاماسىز ەتىلۋ كورسەتكىشى 80 پايىزدان استام، بۇل رەسپۋبليكا بويىنشا استانا قالاسىنان كەيىنگى ەكىنشى كورسەتكىش.

2015 جىلعا قاراي دەنساۋلىق ساقتاۋ سالاسى بارىنشا ءتيىمدى، ال حالىقتىڭ ساپالى مەديسينالىق قىزمەتكە قولجەتىمدىلىگى ارتا تۇسپەك. باعدارلامانىڭ نەگىزگى باعىتتارى بۇل — تۇرعىن حالىقتىڭ، اسىرەسە جاستاردىڭ اراسىنداعى سىرقاتتاردىڭ الدىن الۋدى كۇشەيتۋ، انا مەن بالا دەنساۋلىعىنىڭ ماسەلەلەرىندە جۇيەلى شارالار قابىلداۋ. بيىلعى جىلدان باس -تاپ تۇراقتى تۇردە اۋىل تۇرعىندارىنا كونسۋلتاسيالىق-دياگنوستيكالىق كومەك كورسەتۋگە ارنالعان جىلجىمالى ۇتقىر كەشەندەر جۇمىس ىستەۋدە.

نۇرزات توعجان