اعىمداعى جىلى «اقتاۋ تەڭىز پورتى» ارنايى ەكونوميكالىق ايماعىندا 6 كاسىپورىن ىسكە قوسىلادى. وسىلايشا ەلىمىزدە مۇناي وندىرىسىنە قاجەتتى ەرەكشە قۇبىرلار، پوليمەر ونىمدەرى مەن سۇيىق دارىلەر شىعارىلاتىن بولادى. 

سونىمەن قاتار اقتاۋدا العاش رەت ازىق-تۇلىك ساقتايتىن ءىرى لوگيستيكالىق ورتالىق قولدانىسقا بەرىلەدى، دەپ حابارلايدى 24.kz.

جاڭا جوبالاردىڭ ارقاسىندا 500 ماڭعىستاۋلىققا جاڭا جۇمىس ورنى اشىلادى. «اقتاۋ پوليمەر» زاۋىتىندا جۇمىس قىز-قىز قايناۋدا. ءقازىر وڭىردەگى توزىعى جەتكەن سۋ، گاز، كارىز جانە جىلۋ قۇبىرلارىنىڭ ورنىنا وسىندا وندىرىلگەن قۇبىرلار توسەلىپ جاتىر. كاسىپورىندا جىلىنا 67 مىڭ مەتر پوليەتيلەن قۇبىرى شىعارىلادى. وندىرىسكە قاجەتتى شيكىزات پارسى شىعاناعى ەلدەرىنەن «اقتاۋ تەڭىز پورتى» ارقىلى جەتكىزىلەدى. پوليمەر زاۋىتى بيىلدان باستاپ وڭىردە العاش رەت جىلۋدى بارىنشا ساقتاپ تۇراتىن وقشاۋلانعان قۇبىرلاردى جاساپ شىعارا باستادى. مۇنى جۇمىسشىلار «اقىلدى قۇبىر» دەپ اتايدى.  «تەمىر قۇبىردىڭ سىرتىن پوليەتيلەن قاپتامامەن قاپتاپ، ءىشىن كوبىكپەن تولتىرامىز. ول پوليەتان دەپ اتالادى. مۇنىڭ ەرەكشەلىگى، جىلۋدى تۇتىنۋشىعا دەيىن مول كولەمدە جەتكىزۋىندە جانە شىعىنى از. جاڭا تەحنولوگيامەن جاسالۋدا. ىشىندە مىستان سىم جۇرگىزىلگەن. بۇل ارنايى اپپاراتقا جالعانادى دا، قۇبىر جارىلىپ، سۋ كەتكەن جاعدايدا سول ارالىقتى 1 مەترگە دەيىنگى اۋىتقۋ دالدىگىمەن كورسەتە الادى»،-دەيدى اعا شەبەر شاتتىق قۇلىبەكوۆ.

ءقازىر ارنايى ەكونوميكالىق ايماقتا 9 كاسىپورىن جۇمىس ىستەپ تۇر. مۇندا تەڭىزدەگى مۇناي يگەرۋ جۇمىستارىنا ارنالعان مەتالقۇراستىرمالارىنان باستاپ، تۇرعىن ءۇي مەن جول سالۋعا قاجەتتى ءتۇرلى ءونىم ءوندىرىلىپ جاتىر. 12 جىل بۇرىن قۇرىلعان ايماققا وسى كۇنگە دەيىن 30 ملرد تەڭگە ينۆەستيسيا قۇيىلىپ، 223 ملرد تەڭگەنىڭ ءونىمى وندىرىلگەن. وسىلايشا «اقتاۋ تەڭىز پورتى» ارنايى ەكونوميكالىق ايماعى دامۋ كورسەتكىشى جاعىنان ەلىمىز بويىنشا «استانا - جاڭا قالا» ەكونوميكالىق ايماعىنان كەيىنگى ەكىنشى ورىنعا كوتەرىلدى. مۇندا ەلىمىزدىڭ جانە شەتەلدىڭ كاسىپكەرلەرى ءۇشىن مەملەكەت تاراپىنان ءتۇرلى جەڭىلدىكتەر قاراستىرىلعان. وسىنىڭ ارقاسىندا جاڭا يننوۆاسيالىق جوبالاردى جۇزەگە اسىرۋعا نيەتتىلەر سانى ارتىپ وتىر. «اقتاۋ تەڭىز پورتى» ارنايى ەكونوميكالىق ايماعىنىڭ باسقارما باسشىسى امىربەك تولەگەنوۆتىڭ ايتۋىنشا، بۇل ايماق ءوڭىر ەكونوميكاسىنىڭ عانا ەمەس، الەۋمەتتىك جاعدايىنىڭ جاقسارۋىنا دا جول اشىپ وتىر. ءقازىر مۇندا مىڭنان استام ادام ەڭبەك ەتىپ جاتىر. بيىل تاعى 400 ادامعا جاڭا جۇمىس ورىندارى اشىلادى. التى ينۆەستور «ارنايى ەكونوميكالىق ايماق» اۋماعىندا جاڭا جوبالاردى جۇزەگە اسىرۋعا كىرىسىپ كەتتى.

اقپارات كوزى: ءىnform.kz.