يندۋستريا جانە ينفراقۇرىلىمدىق دامۋ مينيسترلىگى 2020 جىلدىڭ سوڭىنا دەيىن "تالدىقورعان – وسكەمەن" اۆتوجولىنىڭ بويىندا قوزعالىس اشىلاتىنىن، 2022 جىلى تولىق پايدالانۋعا بەرىلەتىنىن حابارلادى.
ۇزىندىعى 763 شاقىرىمدى قۇرايتىن اۆتوجول الماتى وبلىسىنداعى قويلىق ەلدى مەكەنى مەن شىعىس قازاقستان وبلىسىنداعى شىڭقوجا، ۇشبيىك، اياگوز اۋىلدارىنىڭ ماڭىنان وتەدى.
قۇرىلىس جۇمىستارىن «CITIC Cinstruction Co.Ltd» ج ش س، «ك-دورستروي» ج ش س مەن «Todini Central Asia» ج ش س جۇرگىزۋدە. جۇمىستاردىڭ ساپاسىن باقىلاۋدى «گك ينجينيريگ» جانە «ZS Enginering» جاۋاپكەرشىلىگى شەكتەۋلى سەرىكتەستىكتەرى جۇزەگە اسىرادى.
جوبا بويىنشا تالدىقورعاننان باستاۋ الاتىن 32 شاقىرىمدىق 4 جولاقتى جول ۋچاسكەسى ءى تەحنيكالىق ساناتقا سايكەستەندىرىلەتىن بولادى. ال 731 شاقىرىمدىق جول ۋچاسكەسى 2 جولاقتى ءىى تەحنيكالىق ساناتقا ساي بولماق.
قايتا جاڭارتۋ جۇمىستارىنىڭ اياسىندا 6 كوپىر، تەمىرجولدان وتەتىن 3 جول وتكەلى، جارىقتاندىرىلعان 11 جول ايرىعى، 276 قۇبىر، دەمالىس الاڭدارى سالىنىپ، ەلدى مەكەندەر ماڭىندا اۆتوپاۆيلوندار ورناتىلادى.
جالپىلاي العاندا، قايتا جاڭارتۋ جۇمىستارىنا جول-قۇرىلىس تەحنيكاسىنىڭ 3 مىڭعا تارتا بىرلىگى مەن 5 مىڭعا جۋىق مامان جۇمىلدىرىلعان. 2020 جىلدىڭ سوڭىنا دەيىن اتالمىش جولدىڭ تولىق بويىندا قوزعالىس اشىلادى دەپ جوسپارلانۋدا. تاسجول 2022 جىلى پايدالانۋعا بەرىلمەك.
پىكىر قالدىرۋ