تانىمال رەجيسسەر ەرمەك تۇرسىنوۆتىڭ «جات» ءفيلمى قىركۇيەك ايىندا وتەتىن تورونتوداعى حالىقارالىق كينوفەستيۆالگە (Toronto International Film Festival) قاتىسادى دەپ كۇتىلۋدە. بۇل تۋرالى ءفيلمنىڭ باس پروديۋسەرى قانات تورەباي مالىمدەگەن، دەپ حابارلايدى قامشى پورتالى Vلاست.kz-كە سىلتەمە جاساي وتىرىپ.

قازاقستاندىق  «جات» ءفيلمىنىڭ الەمدىك كورسەتىلىمى تورونتودا وتەدى. ايتپاقشى، ەڭ سوڭعى رەت 2009 جىلى اتالمىش فەستيۆالگە  قازاقستاننىڭ اتىنان  تۇرسىنوۆتىڭ تاعى ءبىر «كەلىن» كارتيناسى قاتىسقان بولاتىن. ال ودان كەيىن فەستيۆال ۇيىمداستىرۋشىلارى قازاقستاندىق فيلمدەرگە شاقىرتۋ بەرمەگەن.

«ءتىپتى، قازاقستاندىق كارتينالاردىڭ بريسبەن فەستيۆالىنە دە سوڭعى رەت قاشان قاتىسقانى بەلگىسىز. ال ءوز كەزەگىندە بريسبەن –  ول «ازيا وسكارى» ەكەنىن ەسكەرسەك،  قازاقستاندىق رەجيسسەرلەرگە توقىراۋ كەلگەن بە دەپ ويلاپ قالۋىمىز ابدەن مۇمكىن»، -دەيدى قانات تورەباي مىرزا.

قانات تورەباي، «جات» ءفيلمىنىڭ باس پروديۋسەرى:

«ءبىز قانداي دا ءبىر فەستيۆالدىڭ جۇلدەسى ءۇشىن جۇگىرىپ جۇرگەنىمىز جوق. ءبىز جاسىمىز كەلىپ، اقىلىمىزدى توقتاتقان ادامدارمىز دەپ ويلايمىن.  ءبىراق ەرمەكتىڭ كارتيناسى وسىعان دەيىن دە وسكارعا ۇسىنىلدى. ءيا، ول – «كەلىن» ەدى. ونىڭ «موڭعول» مەن «شال» كارتينالارى حالىقارالىق اكادەميانىڭ جوعارعى باعاسىنا يە بولعان. سوندىقتان ءبىز تاعى ءبىر مارتە ب ا ق سىناپ كورۋدى ءجون كوردىك. بۇعان قاتىستىڭ دەگەنىڭىز «التىن گلوبۋسقا» ءبىر تابان جاقىنداۋ دەگەن ءسوز. «التىن گبلوبۋستى» الۋىڭىز – وسكاردى العانمەن بىردەي. ءبىز سوڭعى رەت لوس-اندجەلەستە  «شالدى» كورسەتىپ جۇرگەنىمىزدە كوپتەگەن كينواكادەميانىڭ اكادەميكتەرى ەرمەك ەكەۋمىزگە كەلىپ، وزدەرىنىڭ تاڭدانىسىن جەتكىزگەن بولاتىن. سوندا ەرمەك ماعان؛ «ەگەر «شال» وتپەي قالسا، مەن ءۇشىنشى رەت تاعى كەلەمىن. ۋادە بەرگەن سوڭ ورىنداۋ كەرەك» دەگەن بولاتىن. ءيا، ەگەر قازاقستاندىق تۋىندى وسىنداي ۇلكەن فەستيۆالدەن جۇلدەلى بولسا – بۇل قازاقستان كينويندۋسترياسىنداعى ۇلكەن جەتىستىك بولارى ءسوزسىز»،-دەيدى.

تۇرسىنوۆتىڭ جاڭا تۋىندىسى «جات» ءفيلمىنىڭ باستى رولدەرىندە وينايتىندار: ەرجان نۇرىمبەتوۆ، تەراتر جانە كينو اكتەرى(«كەلىن»، «مەچ پوبەدى»)، ەلينا اباي قىزى قىرعىز اكتيرساسى («قۇرمانجان داتقا»)، قۋاندىق قىستىقبايەۆ اكتەر («كەلىن»)، الەكساندر كارپوۆ، رەسەيلىك اكتەر («ۆيي3D»)، روزا حايرۋللينا رەسەيدىڭ ەڭبەك سىڭىرگەن ءارتىسى («يۆان گروزنىي»)، ەربولات توعۋزاقوۆ («شال»).

«جات» - Dolby Atmos كوپكانالدى دىبىستى فورماتىندا تۇسىرىلگەن تۇڭعىش قازاقستاندىق كارتينا.

2010 جىلى تۇرسىنوۆتىڭ «كەلىن» ءفيلمى امەريكا كينواكادەمياسىنىڭ تاڭداۋىمەن وسكار جۇلدەسىنىڭ شورت-ليست باعدارلاماسىنا ەنگەن بولاتىن. ال 2013 جىلى ەڭ ۇزدىك شەت تىلىندەگى كارتينا نوميناسياسىنا تاعى دا تۇرسىنوۆتىڭ «شال» ءفيلمى ۇسىنىلعان ەدى.

نۇرزات توعجان

«قامشى» سىلتەيدى