كۇنە كەشە عانا ەلباسى نۇرسۇلتان ءابىش ۇلىنىڭ مەملەكەتتىك ۇنەمدەۋ تۋرالى ايتقان سوزىنەن كەيىن جامبىل وبلىستىق اكىمدىگىنىڭ اپپاراتى 12 ميلليون 350 مىڭ تەڭگەگە كولىك ساتىپ العانى تۋرالى اقپاراتتى rgmedia.kz سايتىنا سىلتەمە جاساعان Nur.kz سايتى تاراتقان.
اقش دوللارىنىڭ تەڭگەگە شاققانداعى بۇگىنگى باعامىمەن 66 مىڭ دوللار تۇراتىن كولىك تابان استىندا كىمگە، نە ءۇشىن قاجەت بولعانى ازىرگە بەلگىسىز. ءبىراق، جاقىندا عانا “قازاق حاندىعىنىڭ 550 جىلدىعىن” اتاپ ءوتۋ ءىس-شارالارىن وڭىرگە ارنايى كەپ، پىسىقتاپ قايتقان ۆيسە-پرەمەر بەردىبەك ساپاربايەۆ تويعا جۇماسالاتىن قارجىنى ۇنەمدەپ، ءار تيىنىنا دەيىن ەسەپ بەرەتىندەي ەتىپ جۇمساۋدى قاتاڭ تاپسىرعان-دى.
«قىمبات كولىككە تويدىڭ اقشاسى جۇمسالماعان دا بولار. الايدا، توي قارساڭىندا تارازدى تارانعان قىزداي ەتىپ، كوركەيتۋگە قارجى بىردە جەتىپ، بىردە جەتپەي، ءار وبلىس “تويعا قوسقانىمىز بولسىن” دەپ، ءبىرى كوشە جوندەپ، ءبىرى ساياباق سالىپ بەرىپ جاتقاندا قىمبات كولىكتى الماي قويا تۇرسا دا بولار ەدى عوي”، – دەپ جازادى ماقالا اۆتورى.
جامبىل وبلىستىق اكىمدىگىنىڭ اپپاراتى ەلەكتروندى مەملەكەتتىك ساتىپ الۋ نەگىزىندە بەرگەن تاپسىرىستا كولىكتىڭ مىنەزدەمەسى ايقىن جازىلعان.
“F كالسستى، جاقسى جاراقتالعان، ۇزىندىعى 4،9 م ۇلكەن ەمەس، ەنى 1،7 م، تولىقتاي ەلەكتروپاكەتتى، ورتالىقتاندىرىلعان قۇلىپ، ABS،SRS، گۋر، پەپ، كونديسيونەرى…” تاعى باسقا تولىپ جاتقان تالاپتارىن مەملەكەتتىك تاپسىرىستىڭ لوتىنا تىزبەلەپ شىققان.
بۇل كولىككە تاپسىرىس مەملەكەتتىك ساتىپ الۋ سايتىنا جامبىل وبلىستىق اكىمدىگى دۇيسەنبى، 3 تامىز كۇنى ساعات 12.48 دە ورنالاستىرعان. ال كولىكتى كەشكە دەيىن الىپ ۇلگەرگەن.
“قاراپايىم ەلدىڭ ارىز-شاعىمىن، ءوتىنىشىن وسىنداي كوسموستىق جىلدامدىقپەن شەشىپ تاستاسا جامبىلدىق شەنەۋنىكتەرگە ايتار العىس كوپ بولار ەدى-اۋ”، – دەلىنگەن ماقالادا.
“سونىمەن، “قازاق حاندىعىنىڭ 550 جىلدىق تويىن ءوز دەڭگەيىندە وتكىزە الماساڭ “باسىڭ كەتەدى” دەگەن بەردىبەك ساپاربايەۆتىڭ قاتاڭ “تاپسىرماسى” كارىم كوكىرەكبايەۆتىڭ كوكىرەگىندە قانشالىقتى ۇيالاپ قالعانىن بىلمەيمىز، ازىرگە تارازدىقتار تويعا قىزۋ دايىندىق ۇستىندە. وبلىس اكىمى ك.كوكىرەكبايەۆتىڭ ءوز سوزىمەن ايتساق “جۇمىسشىلار تاۋلىگىنە 24-25 ساعات جۇمىس ىستەۋدە”. ال قىمبات كولىك كىمگە، نە ءۇشىن الىڭدى ەكەن؟”، – دەپ جازادى اۆتور.
نۇرزات توعجان
