الماتى. قامشى پورتالى – شىمكەنتتەگى  ءبىلىم وشاقتارىندا جاڭا وقۋ جىلىنا دايىندىق ماۋسىمى باستالىپ كەتتى. شاھاردا 6 مەكتەپ پەن 7 بالاباقشانى كۇردەلى جوندەۋ جۇمىستارى قولعا الىندى. بۇل ءۇشىن رەسپۋبليكالىق بيۋدجەتتەن 286 ملن تەڭگە، وبلىستىق قازىنادان ءبىر ملردتان استام قارجى قارالسا، جەرگىلىكتى بيۋدجەتتەن 500 ملن تەڭگە قاراجات بەرىلگەن. بۇدان بولەك 50 ملن تەڭگەگە 113 ءبىلىم مەكەمەسى اكتەلىپ، سىرلانادى. ءبىر قىزىعى، وسىنشالىقتى اۋقىمدى شارۋا نەبارى ءۇش مەردىگەرگە تاپسىرىلعان. مۇنى بىلگەن اتا-انالار جاڭا وقۋ جىلىنا ۇلگەرمەي قالادى دەپ دابىل قاعۋعا دايىن وتىر. 1960 جىلى سالىنعان ءبىلىم وشاعىنىڭ اسحاناسى مەن سپورت زالى قايتا سالىنادى. العاشقى عارىشكەر يۋريي گاگاريننىڭ ەسىمىن العان ءبىلىم وشاعىندا 1400 وقۋشى بار. بۇل نىسانعا ەڭ جاقىن ورنالاسقانى — ەلامان اۋىلىنداعى № 127 مەكتەپ. الايدا بۇكىل شاكىرتتى وندا تاسىمالداۋ مۇمكىن ەمەس. سول سەبەپتى ءبىلىم ءبولىمىنىڭ باسشىلارى مەردىگەر مەكەمەگە ەسكى عيماراتتىڭ كورپۋسىن ءبىرىنشى كەزەكتە جوندەۋدەن وتكىزۋ تالابىن قويىپ وتىر. بۇدان بولەك قالالىق ءماسليحاتتىڭ دەپۋتاتتارى №38 مەكتەپتىڭ كۇردەلى جوندەۋ جۇمىسىنا باعىتتالعان قارجى نە سەبەپتى №25 مەكتەپكە جۇمسالىنادى دەگەن ساۋالدى ءجيى كوتەرىپ كەلەدى. ەستەرىڭىزدە بولسا، 2014 جىلى №38 مەكتەپتى كۇردەلى جوندەۋدەن وتكىزۋ ءۇشىن 260 ملن تەنگە قارالعان. ال بيىلعا قالعان 128 ملن تەڭگەنى يگەرۋ كەرەك. الايدا ءبىلىم بولىمىندەگىلەر ول قاراجاتتى وزگە مەكتەپكە جۇمساپتى. پازىلحان اساۋوۆ، قالالىق ءبىلىم ءبولىمىنىڭ سەكتور مەڭگەرۋشىسى: «№38 مەكتەپ ەكى كەزەڭدە كۇردەلى جوندەۋدەن وتكىزىلدى، ءۇشىنشى كەزەڭىن كەلەسى جىلعا قالدىردىق. ال №25 مەكتەپكە ول قارجى وتە قاجەت، باستالعان قۇرىلىستى اياقتاۋ كەرەك.» جالپى بيىلعى جاڭا وقۋ جىلىندا شىمكەنت شاھارى بويىنشا 5 جاڭا مەكتەپ پەن 6 بالاباقشا پايدالانۋعا بەرىلمەك.

اقپارات كوزى: otyrar.kz