وڭتۇستىك قازاقستاندا ءوتىپ جاتقان ءۇش كۇندىك «استانا كۇنىنە تارتۋ — 75 نىسان» اكسياسى اياسىندا ورداباسى اۋدانىندا ەكى الەۋمەتتىك نىسان اشىلىپ، ەل يگىلىگىنە بەرىلدى.

الدىمەن تەمىرلان ەلدىمەكەنىندەگى كاسىپكەرلەرگە قىزمەت كورسەتۋ ورتالىعى مەن كاسىپكەرلىك مەكتەبىنىڭ اشىلۋ سالتاناتى ءوتتى. وعان وبلىستىق كاسىپكەرلىك، يندۋستريالدى-يننوۆاسيالىق دامۋ جانە تۋريزم باسقارماسىنىڭ باسشىسى باۋىرجان وماربەكوۆ، اۋدان اكىمى سامات ساپاربايەۆ قاتىسىپ، بارشا تۇرعىنداردى مەرەكەمەن قۇتتىقتادى.

بۇل ەڭسەلى عيمارات وبلىس اكىمىنىڭ تاپسىرماسىمەن بارلىق اۋدان، قالادا پرەزيدەنتتىڭ شاعىن جانە ورتا كاسىپكەرلىكتىڭ دامۋىن جاڭا دەڭگەيگە شىعارۋ بويىنشا تاپسىرماسىنىڭ اياسىندا جۇزەگە اسىپ وتىر. كاسىپكەرلەرگە ساپالى قىزمەت كورسەتىن بۇل ورتالىقتا «ءبىر تەرەزە» قاعيداسى نەگىزىندە مەملەكەتتىك قولداۋ قۇرالدارى بويىنشا قىزمەت كورسەتىلۋدە.

بۇگىنگى تاڭدا كاسىپكەرلەرگە قىزمەت كورسەتۋ ورتالىعىندا رۇقسات قۇجاتتارىن راسىمدەۋ، كاسىپكەرلەردى وقىتۋ، سونداي-اق، سەرۆيستىك قىزمەت كورسەتۋ باعىتتارى بويىنشا جۇمىستار اتقارىلۋدا. اۋداندا شاعىن جانە ورتا كاسىپكەرلىك سۋبەكتىلەرىنىڭ سانى سەگىز مىڭنان استام.

مەرەكە قارساڭىندا سونىمەن قاتار ءبورجار اۋىلدىق وكرۋگىندە 120 ورىندى «مىڭبالا» بوبەكجاي بالاباقشاسى ەسىگىن ايقارا اشتى. «بالاپان» باعدارلاماسى اياسىندا اشىلعان جاڭا عيماراتتا ۇلكەن ءارى ىڭعايلى بالالار بولمەسى، جاتىن ورىن بولمەلەرى بارلىق زاماناۋي قۇرالدارمەن جاساقتالعان.

نىساننىڭ قۇرىلىسىنا وبلىستىق بيۋدجەتتەن 235 ميلليون تەڭگە بولىنگەن. بوبەكجايدا 36 ادام جۇمىسپەن قامتىلدى.

جالپى، اۋداندا 15 مەملەكەتتىك، 19 جەكەمەنشىك بالاباقشا مەن مەكتەپ جانىنداعى 21 شاعىن ورتالىق ەل يگىلىگىنە جۇمىس جاساۋدا. وندا 5500 بالا تاربيەلەنۋدە. اۋداننىڭ مەكتەپكە دەيىنگى تاربيەمەن قامتۋ كورسەتكىشى بۇگىنگى تاڭعا 76 پايىزدى قۇرايدى. جىل سوڭىنا دەيىن مەكتەپ جانىنان تاعى 3 شاعىن ورتالىق، 4 جەكەمەنشىك بالاباقشا ىسكە قوسىلادى دەپ كۇتىلۋدە.

وقو اكىمىنىڭ باسپا ءسوز قىزمەتى