شىمكەنت قالاسىنىڭ تۇرعىنى 1،5 جاسار نەمەرەسىن قۇتقارعان پوليسەيلەرگە العىس ايتۋ ءۇشىن ولاردى بىرنەشە كۇن ىزدەۋىنە تۋرا كەلدى. تاياۋدا وبلىستىق ىشكى ىستەر دەپارتامەنتىنە زەينەتكەر قارت ءتارتىپ ساقشىلارىن ىزدەپ كەلەدى.

بۇل وقيعا 2015 جىلدىڭ 26 ماۋسىمى كۇنى تەلمان بولىمشەسىندەگى ۇيلەردىڭ بىرىندە ورىن العان. ويناپ جۇرگەن كىشكەنتاي بالا اجەتحانا تەسىگىنە ءتۇسىپ كەتەدى. مۇنى بايقاعان بالانىڭ تۋىستارى كوشەگە شىعىپ، كومەككە ادام شاقىرا باستايدى.

— ماعان ايەلىم حابارلاسىپ، بولعان جاعدايدى ايتقان كەزدە، ۇيگە جەتىپ كەلىپ، نە ىستەرىمدى بىلمەي، كومەككە شاقىرۋعا جۇگىردىم، — دەيدى جابىرلەنۋشىنىڭ اتاسى. — الدىمنان ەكى پوليسيا قىزمەتكەرى شىقتى، ولار ويلانباستان قول ۇشىن بەرۋگە كەلدى. ءبىرى قۇتقارۋشىلارعا جانە جەدەل جاردەمگە حابارلاسسا، ەندى ءبىرى اجەتحانا تەسىگىنە سياتىن ارىق دەنەلى ادامدى ىزدەستىرە باستادى. كەيىن ول ەكى ءتارتىپ ساقشىسىنىڭ وقو ءىىد ءاپب ىزدەستىرۋ سالاسىنىڭ قىزمەتكەرلەرى، پوليسيا كاپيتانى ابدىجالەل قوجابايەۆ جانە پوليسيا مايورى باۋىرجان دۇيسەنوۆ ەكەنىن ءبىلدىم.

ءتارتىپ ساقشىلارى كورشى 11 سىنىپ وقۋشىسى ساتىم دوسحان ەسىمدى وقۋشىنى شاقىرىپ، ارقانمەن اجەتحانا تەسىگىنەن ءتۇسىرىپ، كىشكەنتاي بالانى الىپ شىعادى. كەيىننەن ول بالانى دا تارتىپ شىعارادى. پوليسيا قىزمەتكەرىنىڭ جەدەل ارەكەتى مەن وعان جاسالعان كومەكتىڭ ناتيجەسىندە ءبىر جارىم جاسار نارەستەنىڭ ءومىرى امان قالدى.

ال جەدەل جاردەم قىزمەتكەرلەرىنىڭ سوزىنە قاراعاندا، ءتارتىپ ساقشىلارى دەر كەزىندە كومەك قولىن سوزباعاندا، بىرنەشە سەكۋندقا كەشىككەندە بالا تۇنشىعىپ قالاتىن ەكەن. قازىرگى تاڭدا بالانىڭ دەنساۋلىعىنا كەلەر ءقاۋىپ جوق، جاعدايى جاقسى.

دەرەككوزى: وتىرار.تۆ