الماتى. قامشى پورتالى – وڭتۇستىك  قازاقستان وبلىسىنىڭ جەكە كاسىپكەرى «قىمىز بەن شۇباتتان جاسالعان بالمۇزداق ءوندىرىسى» ونەرتابىسىنا پاتەنت الۋ ءۇشىن ءوتىنىم تاپسىردى، دەپ حابارلادى ادىلەت مينيسترلىگى وقو ادىلەت دەپارتامەنتىنىڭ باسپا ءسوز قىزمەتى.

«ۇلتتىق زياتكەرلىك مەنشىك ينستيتۋتىنىڭ شىمكەنتتەگى قالالىق فيليالىنىڭ ديرەكتورى «لادۋشكي» اتتى تانىمال تاۋار بەلگىسىنىڭ قوجايىنى، جەكە كاسىپكەر س.گ. لۋگينامەن كەزدەسۋ وتكىزدى. كەزدەسۋ بارىسىندا جەكە كاسىپكەر س.گ. لۋگيناعا تاۋار بەلگىسىن تىركەۋ ءتارتىبى ءتۇسىندىرىلىپ، ودان «قىمىز بەن شۇباتتان جاسالعان بالمۇزداق ءوندىرىسى» ونەرتابىسىنا پاتەنت بەرۋ تۋرالى ءوتىنىم قابىلداندى»، - دەلىنگەن دۇيسەنبىدە مينيسترلىك سايتىنا جاريالانعان حاباردا.

اقپاردا اتاپ كورسەتىلگەندەي، بۇگىنگى تاڭدا بالمۇزداقتىڭ بۇل ءتۇرى قالا حالقىنىڭ اراسىندا ۇلكەن سۇرانىسقا يە.

بۇعان دەيىن قازاقستانداعى يزرايل ەلشىسى يسراەل مەي امي تۇيە ءسۇتى شۇباتتى قايتا وڭدەۋ بويىنشا ءيزرايلدىڭ قازاقستانعا پاتەنت ۇسىنۋعا دايىن ەكەنىن حابارلاعان ەدى.

«ءبىزدىڭ پروفەسسور ءبىر پاتەنتتى ساتپاي قويدى ول «گامال گليدا» - شۇباتتان جاسالعان بالمۇزداق. ول وتە پايدالى، سۋسامىرلار ءۇشىن قۇرامىندا شەكەر جوق. يزرايلدە وندىرىلگەن بارلىق بالمۇزداق گفر-عا ەكسپورتتالادى. يزرايلدىك تۇتىنۋشىلار ءتىپتى مۇنىڭ نە ەكەنىن دە بىلمەيدى. ءبىراق ءبىز سول پروفەسسوردى پاتەنتتى قازاقستانعا ساتۋعا كوندىرەمىز دەپ ۇمىتتەنەمىز»، - دەدى ول 2010 جىلدىڭ 17 اقپانىندا وتكەن باسپا ءسوز ءماسليحاتىندا.

ەلشىنىڭ ايتۋىنشا، يزرايلدىك پروفەسسور روۆەن ياگيل تەك شۇباتتان جاسالعان بالمۇزداقتى عانا ەمەس، سونىمەن بىرگە يوگۋرتتى دا جاساپ شىعارىپ، پاتەنتتەپ العان كورىنەدى. شۇباتتان يوگۋرت جاساۋ ليسەنزياسى، دەپ جالعادى ول، وسىعان دەيىن «مەركۋر» كومپانياسىنا ۇسىنىلىپ كەلگەن.

«مەركۋر» پاتەنتتى ساتىپ العان جانە ءالى كۇنگە دەيىن يوگۋرتتى شۇباتتان جاساپ جاتىر. جانە ول يوگۋرتتى ساتىپ الۋ وتە قيىن، ويتكەنى بىردەن ساتىلىپ كەتەدى»، - دەپ باسا ايتتى ەلشى.

ونىڭ ايتۋىنشا، يزرايلدە شۇبات ءليترى $10 تۇرادى. يزرايل فەرمەرلەرى ءوز وندىرىستەرىندە تەك تۇيەلەردىڭ شۋداسىن عانا ەمەس، سونىمەن قاتار تەرىسىن دە پايدالانادى، اتاپ ايتقاندا، بارابان (دابىل) جاساۋ ءۇشىن جانە سۇيەكتەرىن دەكوراتيۆتى بۇيىمدار جاساۋعا.

ەلشىنىڭ پىكىرىنشە، قازاقستاندا تۇيەلەردى اسىراۋدان ەكونوميكالىق پايدا ازىرگە كورىنەر ەمەس. وسىعان بايلانىستى ول بيزنەسمەندەر مەن شارۋالاردى شۇبات ءوندىرۋ مەن وڭدەۋگە نازار اۋدارۋعا شاقىردى، سەبەبى، ەكونوميكالىق پايدادان بولەك، بۇل ءونىم دەنساۋلىق ءۇشىن پايدالى.

«شۇبات دۇنيەجۇزىلىك دەنساۋلىق ساقتاۋ ۇيىمىنىڭ ايقىنداۋىنشا ساۋىقتىرعىش مەديسينالىق سۋسىن دەپ تانىلعان، سول سەبەپتى دە ونى كوبىرەك ءىشۋ كەرەك»، - دەپ قورىتىندىلادى يسراەل مەي امي.

دەرەككوز: قازتاگ