شىمكەنتتە «ايەل جانە بيزنەس» اتتى VIII ايماقتىق كونفەرەنسيا ءوتتى. قالامىزدا جاڭادان اشىلعان «Rixos Khadisha Shymkent» قوناقۇيىندە تاراز، قىزىلوردا، تۇركىستان جانە تالدىقورعان قالالارىنان كەلگەن 120-دان استام كاسىپكەر ايەل باس قوستى. سونىمەن قاتار، ميكروقارجىلاندىرۋ سالاسىنىڭ ساراپشىلارى، قارجى ۇيىمدارىنىڭ وكىلدەرى جانە مەملەكەتتىك قىزمەتكەرلەر قاتىستى. كونفەرەنسيا بيىل «بيزنەس تولەرانتتىلىقتى تاڭدايدى» دەگەن اتاۋمەن ءوتتى. بۇل تۋرالى «قامشى» پورتالى shymkala.kz سايتىنا سىلتەمە جاساي وتىرىپ حابارلايدى.

ءىس-شارانى ميكروقارجى ۇيىمى، «KMF-دەمەۋ» قارجى ۇيىمى، قازاقستان حالقى اسسامبلەياسى، قازاقستاننىڭ ىسكەر ايەلدەر قاۋىمداستىعى، وقو اكىمى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى كوميسسيا ۇيىمداستىردى. ماقسات – ايەلدەردىڭ بيزنەستەگى بەلسەندىلىگىن ارتتىرۋ، قاتىسۋشىلارعا وزەكتى ماسەلەلەردى تالقىلاۋعا مۇمكىندىك جاساۋ، كاسىبىن ەندى باستاعاندار ءۇشىن باعىت-باعدار بەرۋ جانە ىسكەرلىك قارىم-قاتىناستى ورناتۋ. 
ايماقتىق كونفەرەنسيانى وقو اكىمىنىڭ ورىنباسارى ەربول سادىر اشىپ، بۇگىنگى تاڭدا ايەلدەردىڭ تەك وتباسىنىڭ عانا ۇيىتقىسى ەمەس،  بيزنەستە دە بيىك شىڭداردى باعىندىرعانىن، سوڭعى ۋاقىتتا ءوندىرىس سالاسىندا دا ايانباي ەڭبەكتەنىپ جۇرگەنىن ايتا كەلە، كوكتەم مەرەكەسىمەن قۇتتىقتادى. سونىمەن قاتار، ميكروقارجى ۇيىمى ءتوراعاسىنىڭ ورىنباسارى گۇلميرا ابەنوۆا، وقو ىسكەر ايەلدەر قاۋىمداستىعىنىڭ ءتورايىمى، وبلىستىق ايەلدەر ىستەرى جانە وتباسىلىق-دەموگرافيالىق ساياسات جونىندەگى كوميسسيانىڭ مۇشەسى قۇرالاي بيكەنوۆا سىندى ءبىرقاتار ازاماتشالار ءسوز الىپ، وي-پىكىرلەرىن ورتاعا سالدى. 
كونفەرەنسيا بارىسىندا وتباسى بيزنەسىنىڭ ەرەكشەلىكتەرى مەن مۇمكىندىكتەرى، جاستار كاسىپكەرلىگى ماسەلەلەرى قارالىپ، ۋاقىتتى ۇتىمدى باسقارۋ جونىندە ترەنينگ ءوتتى. ءىس-شارا سوڭىندا قاتىسۋشىلارعا سەرتيفيكاتتار تابىستالدى. 

دەرەككوزى: shymkala.kz