كەشەگى وقۋ جىلىندا ەلىمىزدىڭ ءبىرقاتار ايماعىندا وقۋلىق ماسەلەسى ۇلكەن پروبلەماعا اينالعان بولاتىن. ءبىلىم جانە عىلىم مينيسترلىگى بارلىق وبلىستاعى مەكتەپتەردە كىتاپ ماسەلەسى شەشىلگەن، وقۋشىلار تۇگەل ونىمەن قامتىلعان دەپ مالىمدەگەنىمەن، ىسكە كەلگەندە ولاي بولماي شىققانى ەسىمىزدە. وقۋلىق جەتىسپەۋشىلىگى اسىرەسە وڭتۇستىك قازاقستان وبلىسىندا قاتتى سەزىلدى. بۇل پروبلەمانى شەشىپ، مەكتەپ شاكىرتتەرىن ءتيىستى كىتاپتارمەن قامتاماسىز ەتۋ ءۇشىن وقو اكىمدىگى بيىل قوسىمشا قاراجات بولگەندىگىن مالىمدەپ وتىر. 

كەشە ق ر بعم ءبىلىم جانە عىلىم سالاسىنداعى باقىلاۋ كوميتەتىنىڭ ءتوراعاسى سايات ءنۇسىپوۆ شىمكەنتتە بولىپ، ءوڭىردىڭ جاڭا وقۋ جىلىنا دايىندىعىمەن تانىسىپ قايتتى. جەرگىلىكتى بيلىك وكىلدەرىمەن بولعان جيىندا تىعىرىقتان شىعۋ جولدارى تالقىلاندى.

اتالعان جيىندا بايانداما جاساعان وبلىستىق ءبىلىم، جاستار ساياساتى جانە تىلدەردى دامىتۋ باسقارماسىنىڭ باسشىسى البينا ەلشييەۆا وقو-دا وقۋشىلار سانىنىڭ جىل سايىن ارتىپ كەلە جاتقانىن توقتالىپ، وقۋلىقتار مەن وقۋ-ادىستەمەلىك كەشەندەردى ساتىپ الۋعا جەرگىلىكتى بيۋدجەتتەن 1 ملرد 326 ملن تەڭگە بولىنگەنىن ايتتى.

قوسىمشا 1 ملرد 410 ملن تەڭگەنىڭ قاجەت ەكەنى انىقتالىپ، ونىڭ 925 ملن تەڭگەسى وبلىستىق قازىنادان بولىنسە، قالعان 484 ملن 898 مىڭ تەڭگە اۋدان، قالالاردىڭ بيۋدجەتى ەسەبىنەن شەشىلەدى. سونداي-اق، وقۋلىق ازىرلەيتىن 12 باسپامەن 104 كەلىسىمشارتتىڭ تۇزىلگەنى حابارلانىپ، دايىن ءونىمدى تاسىمالداۋدا كەزدەسەتىن ماسەلەلەرگە نازار اۋدارىلدى.

جيىندى قورىتىندىلاعان وبلىس اكىمىنىڭ ورىنباسارى ە.ايتاحانوۆ وقۋلىقتار ماسەلەسىنىڭ 20 تامىزعا دەيىن شەشىلىپ، بارلىق ءبىلىم مەكەمەلەرىنە تاسىمالداپ بەرۋ جونىندە جاۋاپتىلارعا ناقتى مىندەتتەر جۇكتەدى. ماجىلىستەن كەيىن اۋداندار مەن قالالارداعى ءبىلىم بولىمدەرى وقۋلىق دايىندايتىن باسپالارمەن ەكى جاقتى كەلىسىم-شارت جاساستى.