وڭتۇستىك قازاقستان وبلىسىندا «مەكتەپكە جول» جالپى رەسپۋبليكالىق قايىرىمدىلىق اكسياسى اياسىندا «سەنىم تەلەفونى»جۇمىس ىستەيدى. بۇل تۋرالى بۇگىن شىمكەنتتەگى «وڭتۇستىك» اقپارات ورتالىعىندا وتكەن بريفينگتە وڭتۇستىك قازاقستان وبلىستىق ءبىلىم، جاستار ساياساتى جانە تىلدەردى دامىتۋ باسقارماسىنىڭ ءبولىم باسشىسى عاليا ءجۇسىپوۆا ايتتى، دەپ حابارلايدى «قامشى» پورتالى Bnews.kz-كە سىلتەمە جاساي وتىرىپ.

«2015 جىلدىڭ 22 شىلدەسى كۇنى «وڭتۇستىك قازاقستان وبلىسىندا «مەكتەپكە جول» جالپى رەسپۋبليكالىق قايىرىمدىلىق اكسياسىن 2015 جىلدىڭ 1 تامىزى مەن 30 قىركۇيەك ارالىعىندا ۇيىمداستىرۋ جانە وتكىزۋ جونىندەگى ءىس-شارالار» جوسپارى ازىرلەندى. وسى جوسپارعا سايكەس، «بالالارعا بىرگە كومەك بەرەيىك!» ۇرانىمەن «مەكتەپكە جول» اكسياسىن ۇيىمداستىرۋ جانە وتكىزۋ جونىندەگى وبلىستىق ۇيىمداستىرۋ كوميتەتى قۇرىلدى. اتالعان ۇيىمداستىرۋ كوميتەتىنىڭ قۇرامىنا وبلىستىق ءبىلىم جاستار ساياساتى جانە تىلدەردى دامىتۋ، ىشكى ساياسات جانە ءدىن ىستەرى، جۇمىسپەن قامتۋدى ۇيلەستىرۋ جانە الەۋمەتتىك باعدارلامالار جونىندەگى باسقارمالارى، ىشكى ىستەر دەپارتامەنتى، وبلىستىق اتا-انالار كوميتەتىنىڭ، اۋدان، قالا اكىمدەرىنىڭ ورىنباسارلارى ەنگىزىلدى»، - دەيدى ول.

عاليا ءجۇسىپوۆا ايماقتاعى بارلىق اۋدان، قالا اكىمدىكتەرى مەن ءبىلىم بولىمدەرىنە اتالمىش اكسيانى ۇيىمداسقان تۇردە وتكىزۋ تۋرالى وبلىس اكىمى اسقار مىرزاحمەتوۆ تاراپىنان تاپسىرما بەرىلگەنىن حابارلادى. 

«اكسيا بارىسىندا ازاماتتاردىڭ وتىنىشتەرىنە جەدەل جاۋاپ بەرۋ ءۇشىن «سەنىم تەلەفوندارى» جۇمىس ىستەيتىن بولادى»، - دەپ اتاپ ءوتتى ول.