جاقىندا «DEMOSCOPE» قوعامدىق پىكىرگە ەكسپرەسس-مونيتورينگ جۇرگىزۋ بيۋروسى قازاقستانداعى سۋمەن جابدىقتاۋ قىزمەتىنىڭ ساپاسى» تاقىرىبىندا ساۋالناما جۇرگىزگەن بولاتىن. بۇل تۋرالى «قامشى» پورتالى  حابارلايدى.  

DEMOSCOPE قوعامدىق پىكىرگە ەكسپرەسس-مونيتورينگ جۇرگىزۋ بيۋروسى وتكىزگەن ساۋالناماعا استانا، الماتى قالالارى مەن قازاقستاننىڭ 14 وبلىس ورتالىعىنان 18 جاستان اسقان 1822 ادام قاتىسقان. ساۋالناماعا قاتىسقانداردىڭ   72%-ى ايەلدەر جانە 28%-ى ەر ازاماتتار.

ساۋالناماعا قاتىسقان قازاقستاندىقتاردىڭ 39%-ى قازاقستانداعى سۋمەن جابدىقتاۋ قىزمەتىنىڭ باعاسىنا جانە ساپاسىنا ەشقانداي سىن ايتپاعان. ال رەسپوندەنتتەردىڭ  18%-ى قازاقستانداعى سۋمەن جابدىقتاۋ قىزمەتىنە كوڭىلدەرى تولاتىندىقتارىن ايتقان. ساۋالناماعا قاتىسۋشىلاردىڭ 16%-ى قىزمەت كورسەتۋ ساپاسىن وتە قىمبات دەسە، 13%-ى قىزمەت كورسەتۋ ساپاسىن وتە ناشار دەپ باعالاعان. سونىمەن قاتار، بۇل قىزمەت كورسەتۋ تۇرىنە بەي-جاي قارايتىن قاتىسۋشىلار 6% بولسا، سۇراققا ناقتى جاۋاپ بەرە الماعاندار 8% -دى قۇراعان.

زەرتتەۋ قورىتىندىسى بويىنشا، ساۋالناما قاتىسۋشىلارىنىڭ 60%-ى كوپ قاباتتى بىرنەشە پاتەردەن تۇراتىن ۇيدە، 29%-ى قالا ىشىندە ورنالاسقان جەكە ۇيدە، 11%-ى قالا سىرتىنداعى جەكە ۇيدە ءومىر ءسۇرىپ جاتقاندار  دەپ كورسەتىلگەن.

81% رەسپوندەنتتەردىڭ ءۇيى جىلۋ جانە سۋ قۇبىرلارىنىڭ (كاناليزاسيا) ورتالىقتاندىرىلعان جۇيەسىنە قوسىلعان. قالعان 19%-ڭ ۇيىنە بۇل جۇيە ورناتىلماعان.

«قازاقستاننىڭ سۋ سەكتورىنداعى ەڭ وزەكتى ماسەلە قانداي؟» دەگەن ساۋالعا قاتىسۋشىلار رەسپوندەنتتەردىڭ  27%-ى ەشقانداي ماسەلە جوق دەسە، 21%-ى سۋدىڭ ساپاسىنا كوڭىل تولمايتىندىقتارىن ايتىپ شاعىمدانعان. سونىمەن قاتار، 16%-ى ينفوقۇرىلىم توزعان، ناقتى ايتقاندا سۋ قۇبىرلارى ەسكىرگەن دەگەن جاۋاپ نۇسقاسىن تاڭداعان.

ال، زەرتتەۋدىڭ 6%-ىن قۇراعان ساۋالناما قاتىسۋشىلارى كەي كەزدەرى سۋ توقتاپ قالادى نەمەسە ۇزىلىسپەن كەلەدى دەيدى.

الماتى قالاسى تۇرعىندارىنىڭ 29%-ى جانە شىعىس قازاقستان وبلىسى تۇرعىندارىنىڭ 31%-ى ءۇشىن  ينفوقۇرىلىمنىڭ  توزىعى جەتۋى قازاقستاننىڭ سۋ سەكتورىنداعى ەڭ وتكىر ماسەلە بولىپ وتىر. سۇراقتارعا جاۋاپ بەرگەن استانالىقتاردىڭ 27%-ى، اقمولا وبلىسى تۇرعىندارىنىڭ 64%-ى جانە سولتۇستىك قازاقستان وبلىسى تۇرعىندارىنىڭ 26%-ى سۋدىڭ ساپاسى ناشارلىعىنا شاعىمدانادى. 

ال، وڭتۇستىك قازاقستان وبلىسى اتىنان ساۋالناماعا قاتىسقان قازاقستاندىقتاردىڭ 34%-ى سۋ جانە سۋمەن جابدىقتاۋ قىزمەتىندەگى قىمباتشىلىقتى سۋ سەكتورىنداعى ەڭ وزەكتى ماسەلەگە جاتقىزدى. 

سۋ قۇبىرلارى ارقىلى كەلەتىن سۋدى دەنساۋلىققا ءقاۋىپتى دەپ ەسەپتەيتىن قاتىسۋشىلاردىڭ كوپ بولىگى اتىراۋ وبلىسىندا ءومىر سۇرەدى ەكەن. ساۋالناماعا قاتىسقان اتىراۋلىقتاردىڭ 32%-ى، الماتىلىقتاردىڭ 22%-ى جانە اقتوبەلىكتەردىڭ 27%-ى سۋ قۇبىرلارى ارقىلى كەلەتىن سۋدى اۋىز سۋ رەتىندە تۇتىنباۋعا تىرىسادى.

نۇرگەلدى ءابدىعاني ۇلى