11 تامىزدا اقتاۋ قالاسىنىڭ اكىمى سەرىكباي ترۇموۆتىڭ توراعالىعىمەن اۋماعىندا ينەرتتى قۇرىلىس ماتەريالدارى ساتىلاتىن ۇلكەن گاباريتتى اۆتوكولىك تۇراعىنىڭ زاڭسىز قىزمەتى ماسەلەسى بويىنشا جيىن ءوتتى. بۇل تۋرالى «قامشى» پورتالى حابارلايدى.

ستيحيالىق اۆتوتۇراق №9 ءوندىرىس بازاسىنىڭ ايماعىندا، شىعىس تۇرعىن ءۇي ءماسسيۆى مەن مۇنايلى اۋدانىنىڭ باسقۇدىق سەلولىق وكرۋگىنىڭ اراسىنداعى اۆتوكولىك جولىندا ورنالاسقان.

- بارلىقتارىڭ ءوندىرىس بازالارىنا جەر سۇرادىڭدار، ال ناتيجەسىندە قۇرىلىس ماتەريالدارىنىڭ زاڭسىز ساۋدا-ساتتىعىمەن اينالىسىپ جاتىرسىڭدار. جاقىن جەردە تۇرعىن ۇيلەر تۇرعىزىلۋدا، ادامدار شاڭ مەن شۋ اراسىندا ءومىر ءسۇرىپ جاتىر. كۇن سايىن ماڭايدا ورنالاسقان ۇيلەردىڭ تۇرعىندارىنان شاعىمدار تۇسۋدە. كاسىپكەرلەردىڭ ءوز قالاسىنىڭ پاتريوتىنا اينالاتىن ۋاقىت كەلىپ جەتتى عوي، جەكە اۋماقتارىڭدى رەتكە كەلتىرىڭدەر، - دەدى سەرىكباي ترۇموۆ.

جيىن قورىتىندىسى بويىنشا اقتاۋ قالاسىنىڭ اكىمى سەرىكباي ترۇموۆ مەملەكەتتىك ورگاندارعا ءبىرقاتار تاپسىرمالار بەردى. قالالىق جولاۋشىلار كولىگى جانە اۆتوموبيل جولدارى بولىمىنە اقتاۋ قالاسىنىڭ جول پوليسياسى باسقارماسىمەن بىرلەسە وتىرىپ تامىزدىڭ سوڭىنا دەيىن جوعارى اتالعان ايماقتا كولىك قوزعالىسىن رەتتەيتىن، ۇلكەن گاباريتتى اۆتوكولىكتىڭ زاڭسىز تۇراعى مەن ينەرتتى قۇرىلىس ماتەريالدارىن ساتۋعا تىيىم سالاتىن ەسكەرتۋ بەلگىلەرىن ورناتۋ تاپسىرىلدى.

ۇلكەن گاباريتتى اۆتوكولىكتىڭ ستيحيالىق تۇراعىن جويۋ ماقساتىندا جەر تەلىمدەرىنە يەلىك ەتەتىن كاسىپكەرلەرگە تامىزدىڭ سوڭىنا دەيىن ينەرتتى قۇرىلىس ماتەريالدارى مەن اۆتوكولىكتى ءوز اۋماعىنان مۇنايلى اۋدانىنداعى ارنايى ساۋدا الاڭقايىنا كوشىرۋگە ۇسىنىس جاسالدى. تالاپ ورىندالماعان جاعدايدا جەر تەلىمدەرىن ماقساتى بويىنشا پايدالانباعان جەر تەلىمدەرىنىڭ يەلەرىنە اكىمشىلىك شارالار قولدانىلاتىن بولادى. 

اقتاۋ قالاسى اكىمدىگىنىڭ باسپا ءسوز قىزمەتى.