قازاقستاننىڭ ءبىلىم جانە عىلىم مينيسترلىگىنىڭ قىزمەتكەرلەرى 2015 جىلعى ءبىلىم بەرۋ گرانتتارىن ۇلەستىرۋ  جاعدايىنا تۇسىنىك بەردى. جوعارى وقۋ ورنىنان كەيىنگى  حالىقارالىق قاتىناستار دەپارتامەنتىنىڭ ديرەكتورىنىڭ مىندەتىن اتقارۋشى سەرىك ومىربايەۆ استاناداعى باسپا ءسوز ءماسليحاتىندا اتا-انالار مەن تۇلەكتەردەن كوپتەگەن ارىز ءتۇسىپ جاتقانىن حابارلادى. تۇلەكتەر ءبىلىم بەرۋ گرانتىنا ىلىگە الماعان. بۇل تۋرالى "قامشى" اقپاراتتىق پورتالى Tengrinews.kz - كە سىلتەمە جاساي وتىرىپ حابارلايدى.

بىزدە تەك "التىن بەلگى" يەگەرلەرى عانا نەمەسە وليمپيادا جەڭىمپازدارى عانا كىرگەن ءبىرقاتار ماماندىق بار. بۇل ماماندىقتار قاتارىنا: حالىقارالىق قاتىناستار، شىعىستانۋ، شەتەل فيلولوگياسى، قۇقىقتانۋ، كەدەن ءىسى، ەكونوميكالىق بارلىق ماماندىقتار، مەديسينا جاتادى. بۇل ماماندىقتار بويىنشا 39  "التىن بەلگى" يەگەرى گرانت الا المادى. سەبەبى، جاستاردىڭ بۇل كاتەگورياسى تەك سۇرانىسقا يە ماماندىقتاردى بەلگىلەيدى. ارينە، ولار ءوز جيناعان بالدارى بويىنشا قاراستىرىلادى ، ال ەكونوميكالىق جانە قۇقىقتانۋ ماماندىقتارىنا گرانتتار سانى ازايادى"، - دەپ ءتۇسىندىردى ومىربايەۆ.

ونىڭ ايتۋىنشا، "التىن بەلگى" يەگەرى بولعان 39 تۇلەك قانا گرانتسىز قالماعان، حالىقارالىق وليمپيادالاردىڭ سەگىز جەڭىمپازى دا، حالىقارالىق عىلىمي جارىستاردىڭ 92 جۇلدەگەرى دە جانە ءتۇرلى شىعارماشىلىق جانە سپورت جارىستارىنىڭ 293 جەڭىمپازى دا گرانتقا ىلىگە المادى.

"ءبىلىم گرانتىن ۇلەستىرۋدە رەكتورلار جىل سايىن گرانت بولەدى. گرانتسىز قالعان "التىن بەلگى" يەگەرلەرى قۇجات تاپسىرعان جوعارى وقۋ ورنىنا كەلىپ، قابىلداۋ كوميسسياسىنا جولىعۋى كەرەك. بارلىق رەكتور ءبىرىنشى كەزەكتە دارىندى بالالاردى قولدايدى"، - دەدى ومىربايەۆ.

ول اتا-انالار مەن تالاپكەرلەردىڭ تاراپىنان بولاتىن تۇسىنىسپەۋشىلىكتىڭ قابىلداۋ كوميسسياسىنىڭ ساپاسىز قىزىمەتىنەن شىعاتىنىن ايتا كەلە: "ولار ءتۇسىندىرۋ جۇمىستارىن دۇرىس جۇرگىزە المادى. ءبىز جوعارى ءبىلىم بەرۋ مەكەمەلەرىنە حات جولداپ، وندا قابىلداۋ كوميسسياسىنىڭ ءتۇسىندىرۋ جۇمىستارىن جۇرگىزۋى كەرەكتىگىن جازدىق"، - دەدى سەرىك ومىربايەۆ تۇلەكتەردىڭ قۇجاتتى گرانتى ەڭ از ماماندىقتارعا تاپسىرعانى جايلى سۇراققا جاۋاپ بەرە وتىرىپ.

ءبىلىم گرانتىن ۇلەستىرۋ كەزىندە ادىلەتسىزدىكتىڭ تارازىسى باسىمىراق بولعانى بايقالادى، "التىن بەلگى" يەگەرلەرى مەن وليمپيادا جەڭىمپازدارى گرانتتان قاعىلىپ جاتىر،  مالىمەتتەرگە سۇيەنسەك ورىس ءتىلى  ءبولىمى 59 باللمەن گرانت يەگەرى اتانىپ جاتسا، مەملەكەتتىك تىلىمەن ءبىرىڭعاي تەست تاپسىرىپ، گرانت جاعالاعاندار 80 باللمەن كوزدەگەن جوعارى وقۋ ورنىنا تۇسە الماي جاتىر.

گۇلدەن ءابدىباقىت