ءبىزدىڭ مەملەكەت گەندرلىك ساياساتتى قوس قولداپ تۇرىپ قولدايدى.بۇل ساياساتتىڭ جۇيەلى تۇردە دامۋى ءۇشىن مەملەكەتتەن ارنايى قاراجات تا ءبولىنىپ جاتىر. وسى اپتادا دۇنيەگە تورتەم الىپ كەلگەن انانىڭ جاقسى قىزمەتتە جۇمىس اتقارىپ، بەلدى ۋنيۆەرسيتەتتە ماگيسترلىك ءبىلىم الىپ جاتقانىن دا اڭعاردىق. بۇعان دەيىن دە ءبىر قىزدىڭ اناسى اتانعان بايان ابدۋللينا ەندى كوپ بالالى انا بولىپ شىعا كەلدى. تابيعي جولمەن تورتەمدى دۇنيەگە الىپ كەلۋ-سيرەك كەزدەسەتىن جاعداي بولعان كۇننىڭ وزىندە دە بيلىك تاراپىنان باتىر اناعا اۋىز تولتىرىپ ايتاتىنداي سىيلىق جاسالمادى. الماتى قالاسىنىڭ اكىمىنىڭ ورىنباسارى «الدىمەن جاعدايلارىن تەكسەرىپ كورۋ قاجەت»،- دەدى، ودان سوڭ كەزەككە تۇرعانى دۇرىس دەگەن جەلەۋدى الدىعا تارتتى. دەموگرافيا ماسەلەسىن ايتقاندا مايىن تامىزىپ تۇرىپ اڭگىمەلەيتىن ءبىزدىڭ بيلىكتىڭ ءبىر وتباسىنا پاتەر تارتۋ ەتۋگە قاۋقارى جەتپەگەنى مە؟ اكىمنىڭ ورىنباسارى  زاۋرەش امانجولوۆا وتباسىلاردىڭ جاعدايىن تەكسەرۋ كەرەك دەگەن ءسوزدى الدىعا تارقاندا مەنىڭ ويىما الماتى وبلىسىنداعى مويناق كەنتىندە تۇراتىن رىسبەك دوساننىڭ جاعدايى تۇسكەن ەدى. وعان الماتى وبلىسىنىڭ  اكىمدىگى گرانت سەرتيفيكاتىن بەرىپ قۇتتىقتاپ، جەمە-جەمگە كەلگەندە جاعدايى ناشار وتباسىنا جاتپايدى ەكەنسىڭ دەپ شىقتى ەمەس پە؟ ءبىز مىنا قوعامدا بيلىكتىڭ سوزدەن تايىپ شىعا كەلەتىنىنە دە ۇيرەنىپ الدىق. ولار ءبىزدى ابدەن ۇيرەتتى. ەسەسىنە بيلىك تۇگىلى تۋعان باۋىرىمىزعا دا سەنبەيتىن بولىپ بارامىز. پەرزەنتحاناداعى باتىر انانى قۇتتىقتاپ اكىمنىڭ ورىنباسارى بارىپتى. ءسوز ساپتاۋىنىڭ بايىبى جوعارىداعىداي. ءوزى سالقىن ەكەن. مىنانداي قۋانىشتا سالقىنقاندىلىق تانىتقانى نەسى دەپ ءبىر ويلاپ قوياسىڭ دا،  ساياسات سالقىنقاندىلىقتى تالاپ ەتەدى عوي دەپ ءوزىڭدى تاعى ءبىر جۇباتىپ الاسىڭ. دەسەدە، بيلىكتەگى كوكەلەردى قايدام، گەندرلىك ساياساتتىڭ جەمىسى-اتقا قونعان ارۋلار انا اتانۋدىڭ قاندايلىق ەكەنىن بىلسە كەرەك-تى. الدە قىزمەتباستىلىقپەن بەسىك تەربەتۋدىڭ قاندايلىق ەكەنىن بىلمەيتىن نازىك جاندىلارعا ناز ايتۋدىڭ قاجەتى جوق پا؟ باسقاسىن قايدام، انا اتانىپ، بەسىك تەربەتۋدىڭ اناۋ ايتقانداي وڭاي شارۋا ەمەس ەكەندىگىن  زاۋرەش حانىم جاقسى بىلەدى. ويتكەنى ول 15 جىلدان استام ۋاقىتىن گينەكولوگ ماماندىعىنا ارناعان. 2005 جىلى قازاقستاننىڭ ۇزدىك اكۋشەر-گينەكولوگى اتاعىنا يە بولعان. دەمەك تار قۇرساقتى كەڭەيتىپ، تاس ەمشەكتى ءجىبىتىپ انا اتانۋدىڭ، بىرەۋدىڭ ەمەس، تورتەمدى دۇنيەگە الىپ كەلۋدىڭ قاندايلىق ەكەنىن ول ءسىز بەن بىزگە قاراعاندا جاقسى ءبىلۋى كەرەك ەدى. از عانا حالقىمىز بار، ءبىز نەگە نەسيەگە تاڭىلىپ، 10 سوتىق جەرگە زارىعىپ ءجۇرىپ جەتۋگە ءتيىسپىز دەگەن سۇراقتى قويا-قويا جالىقتىق قوي. ءبىراق ايدىڭ امانىندا دۇنيەگە كەلگەن تورتەم ءۇشىن شىن قۋانا الماساق، دامىعان ەلدەرمەن جارىسىپ نەمىز بار دەسەڭىزشى. از عانا حالىق سانى بار ەلدە   پاتەرگە كەزەككە تۇرىپ ارەڭ جەتەمىز. سويتەمىز دە، كوبەيۋ كەرەك دەيمىز! كوبەيگەن بالامىزدى بالاباقشاعا ورنالاستىرا الماي تاعى بەزەك قاعامىز. وسى ءبىز شىنىندا ازبىز با؟ از بولساق بالالارىمىز نەگە بالاباقشاعا سىيمايدى، ءۇي كەزەگى نەگە جىلجىمايدى؟ مۇمىكىن ءبىز كوپ شىعارمىز. شىندىقتارىڭىزدى ايتىڭىزدارشى. كوپ بولساق، ءۇيسىز بولساق تا كوكىرەگىمىزدى كەرىپ، كوپ بولعان سوڭ مەملەكەت ءۇي سالىپ ۇلگەرە الماي جاتىر دەپ كەرىلىپ جۇرەيىك. كوپ بولعان جاقسى عوي. قۇدايعا شۇكىر، قازاق كوپ دەپ كەرىلىپ جۇرگىم كەلەدى.

بالاڭ كەزىمدە باتىر انا دەگەن ۇعىمدى تۇسىنبەيتىنمىن. بالا تاپسا، ءوزى ءۇشىن تۋادى. مەملەكەتكە نەمەنەگە مىندەتسىنەدى ەكەن وسىلار دەپ تۇرىپ كوسىلەتىنمىن عوي. ۋاقىت ءوتتى. انا اتاندىم. كۇپىرلىگىم ءۇشىن ءالى كۇنگە كەشىرىم سۇراپ كەلەمىن. جەتى بالانى دۇنيەگە الىپ كەلۋ- وپ-وڭاي شارۋا ەمەس. انالاردىڭ اتى تاريحتا قالمايدى. تەكتىك جۇيە ەر ادامنىڭ اتىمەن جالعاسىپ، شەجىرە بولىپ شيىرلانىپ كەتە بەرەدى. ال نازىك جاندىلار دۇنيەگە الىپ كەلگەن پەرزەنتىنىڭ تىلەۋىن تىلەپ ۇمىت بولىپ قالا بەرەدى. سوندا دەيمىن دە، ۇلكەن قىزمەتتە وتىرعان اكپەلەرىم مەنىڭ بالاڭ كەزىمدەگىدەي ويلايتىن بولعانى ما؟ ولاي بولۋى دا مۇمكىن. سەبەبى انانىڭ جان دۇنيەسىن ءتۇسىنۋ ءۇشىن انا اتانىپ كورۋ كەرەك. جۇمىسباستىلىق ولارعا باتىر انا اتانۋ مۇمكىندىگىن بۇيىرتپايتىنى تاعى دا بەلگىلى عوي. ءبىراق ءبىز قىزمەتتەگى حانشاعا قاراعاندا جەتى پەرزەنتتى ءوسىرىپ وتىرعان انالارعا باس يەمىز. سەبەبى ءبىز ءومىر ءسۇرىپ وتىرعان ءداۋىر ءۇشىن قازاقتى كوبەيتىپ جاتقاندار ءقادىرلى. ولار- ءبىز ءۇشىن پاتشايىمدار. ءبىراق ولار قاراماقايشىلىق مەكەنىندە عۇمىر كەشىپ جاتىر. جاقىندا التى بالانىڭ اناسى اتانىپ، كۇمىس القاسىن العان تانىسىم دا «باتىرلىقتى» الۋعا ارنالعان قاعازباستىلىقتىڭ قاجىتقانىن ايتىپ قىنجىلدى. «كورشىلەرىمنەن مىنەزدەمە جيناۋ قيىندىققا ءتۇستى»،- دەيدى. «قالادا قاي كورشىڭمەن ارالاساسىڭ، ونىڭ ۇستىنە كوپ بالانىڭ شۋلاعان داۋسىنان زاتتە بولعان قۇلاقتار جاقسى مىنەزدەمە جازۋعا قۇلىقتى بولمادى» دەپ كەيىپ وتىر. راس-اق. بالانىڭ تۋۋ تۋرالى كۋالىگىن  وزدەرى بەرىپ الىپ، باتىر ەكەنىڭدى دالەلدەۋگە قۇجات جينا دەگەنى اقىلعا قونىڭقىرامايتىن جۇيە سەكىلدى كورىنەدى  ەكەن.

اينۇر تولەۋ

«قامشى» سىلتەيدى