ەلىمىزدە قازاق حاندىعىنىڭ 550 جىلدىق مەرەيتويىنا وراي كومپيۋتەرلىك ويىن جاسالىپ جاتىر. جوبا تاريحتى ناسيحاتتاۋ ماقساتىندا قولعا الىنىپ وتىر. بۇل  تۋرالى "قامشى" اقپاراتتىق پورتالى "نۇر.كز" سايىتىنا سىلتەمە جاساي وتىرىپ حابارلايدى.

ويىن كەيىپكەرى رەتىندە قوبىلاندى باتىر، قورقىت اتا سياقتى اڭىز  تۇلعالار مەن قاتار ەرتەگىلەردەگى جالماۋىز كەمپىر دە كورىنەدى. جوبا قازاق ۇلتىنىڭ ۇلتتىق ناقىشتاعى بوياۋلارىمەن كورىنىس بەرمەك.  كومپيۋتەرلىك ويىندى جاساپ، اينالىمعا ەنگىزۋگە ءبىلىم جانە عىلىم مينيسترلىگى مەن دۇنيەجۇزىلىك بانك قولداۋ تانىتىپ، 72 ميلليون تەڭگە ءبولىپتى.

جوبا اۆتورى ادىلبەك بيسەنبايەۆ: “قازىرگى جاستار كىتاپحاناعا بارمايدى. ولار قاجەتتى اقپاراتتى عالامتوردىڭ كومەگىمەن ءبىلىپ وتىرادى. اسىرەسە كومپيۋتەرلىك ويىنداردى كوپ پايدالانادى. ماسەلەن باتىستا ويىن ءوندىرىسىن دامىتۋ ارقىلى ءوز ميفولوگياسىن ناسيحاتتايدى. ءبىز دە وسى ءادىستى پايدالانىپ، ءوز تاريحىمىزدى الەمگە تانىتپاقپىز. سوندىقتان الەمدىك دەڭگەيدەگى وتە كۇردەلى كومپيۋتەرلىك ويىن ءتۇرىن جاساۋدى قولعا الدىق. ونى تەگىن جانە اقىلى نەگىزدە دە ويناۋعا بولادى".

جوبا كەلەر جىلى قولدانىسقا بەرىلمەك. ەگەر كوپشىلىكتىڭ كوڭىلىنەن شىعىپ جاتسا، وندا موبيلدىك نۇسقاسى دا شىعارىلاتىن بولادى.

قازاقستاندا العاشقى بولىپ شىعارىلعان ۇلتتىق ناقىشتاعى  مەسسەندجەر "iTys" جوباسى سياقتى قولدانۋشىسى قاۋقارسىز، جارناماسى جاسىق بولماي، بۇل جوبا دا ۇرپاقتارعا تاريحتى ناسيحاتتاۋ تۇرعىسىنان قاراستىرىلاتىن بولسا، ءوز دەڭگەيىمەن ناتيجە بەرگەنى ءوتىمدى بولار ەدى.

گۇلدەن ءابدىباقىت