كوروناۆيرۋس ىندەتىنەن قايتىس بولعان ادامداردان باسقالارعا ۆيرۋستىڭ جۇعۋ ءقاۋپى بار. بۇل تۋرالى ساراپشىلار كتك تەلەارناسى دايىنداعان سيۋجەتتە ايتتى.

ءبىر اي بۇرىن دەنساۋلىق ساقتاۋ مينيسترلىگى COVID-19-دان قايتىس بولعانداردى سانيتارلىق تالاپتاردى ساقتاي وتىرىپ، كەز كەلگەن زيراتتا جەرلەۋگە بولادى دەگەن شەشىم شىعارعان. الايدا بۇلاي جاسالسا، ءقاۋىپتى كەسەل ودان سايىن كەۋلەپ كەتۋى مۇمكىن دەيدى ەپيدەميولوگتار. ولاردىڭ ايتۋىنشا، ىندەتتەن كوز جۇمعان ادامنىڭ دەنەسىندە ۆيرۋس 15 ساعاتقا دەيىن ساقتالىپ، وزگە ادامدارعا جۇعۋى ىقتيمال.

– كوروناۆيرۋستان اجال قۇشقان ادامنان العاشقى ەكى-ۇش كۇن ۆيرۋس جۇعۋ ءقاۋپى جوعارى بولادى. ول مارقۇمنىڭ اعزاسىندا كەمى جارتى تاۋلىككە دەيىن ساقتالادى. ءمايىتحانا قىزمەتكەرلەرى ىندەتتەن قايتىس بولعان ادامدى سويعان كەزدە نەمەسە جۋىندىرعان ۋاقىتتا قورعانىش قۇرالدارىن كيگەنى ءجون. سونداي-اق جاقىندارىن جەر قوينىنا تاپسىراتىن جاندار سانيتارلىق ەرەجەنى ساقتاۋى ءتيىس، – دەيدى س. اسفەندياروۆ اتىنداعى قازۇمۋ ميكروبيولوگيا جانە ۆيرۋسولوگيا كافەدراسىنىڭ مەڭگەرۋشىسى باقىت رامازانوۆا

سانيتار دارىگەرلەر مايىتتەن كەسەل جابىساتىنىن راستاپ وتىر. الايدا ولار ءمايىتحانا قىزمەتكەرلەرى قاۋىپسىزدىك ەرەجەسىن قاتاڭ ساقتايتىنىن العا تارتتى.

– سوندىقتان جەرلەۋ ءراسىمى ارنايى تارتىپپەن جۇزەگە اسسا، ۇرەيگە بوي الدىرۋدىڭ ەش قاجەتتىلىگى جوق، – دەيدى جاۋاپتى دەپارتمەنت وكىلدەرى.

– بۇل ماسەلە ءالى تولىق زەرتتەلگەن جوق. عالىمدار ءتۇرلى پىكىر ايتادى. ءبىراق ءقاۋىپتىڭ بار ەكەنىن تەرىسكە شىعارمايمىز. سول ءۇشىن دە جەرلەۋدىڭ ارنايى الگوريتمى ازىرلەنگەن. ەگەر وسى ءتارتىپتى مەديسينا قىزمەتكەرلەرى مەن مارقۇمنىڭ جاقىندارى ورىنداسا، ءبارى دۇرىس بولادى. كوروناۆيرۋستىڭ اۋا ارقىلى تارايتىنىن ۇمىتپاۋىمىز كەرەك، – دەيدى  نۇر-سۇلتان قالاسى تاۋارلار مەن كورسەتىلەتىن قىزمەت ساپاسى مەن قاۋىپسىزدىگىن باقىلاۋ دەپارتامەنتى باسشىسىنىڭ ورىنباسارى ايگۇل شاعالتايەۆا. 

ءمايىتحانادا مارقۇمدى الدىمەن دەزينفەكسيالىق سۇيىقتىقپەن جۋىندىرىپ، كەبىنگە سالادى. كەيىن مۇردەنى پوليەتيلەن پاكەتپەن ورايدى. بۇل جورالعىنى تەك ارنايى ماماندار ىستەيدى. سەبەبى، اۋرۋدان اجال قۇشقان ادامدى قورعانىش قۇرالدارىنسىز قولمەن ۇستاپ، وعان جاقىنداۋعا مۇلدەم بولمايدى. جاقىندارىن جەر قوينىنا تاپسىرۋعا كەلگەن جاندار بەتپەردە كيىپ، اراقاشىقتىق ساقتاۋى ءتيىس.

باس سانيتار دارىگەردىڭ ەرەجەسىن ەلەمەيتىن جۇرتتىڭ قاراسى كوپ. جەرلەۋ راسىمىندە جۇرگەن قاراقۇرىم حالىقتىڭ ءتۇرلى ۆيدەولارى الەۋمەتتىك جەلىدە ءورىپ ءجۇر. قورىمداعى قاربالاستا ارا قاشىقتىق ساقتالۋ بىلاي تۇرسىن، بەتپەردە كيمەيتىندەر دە جەتىپ ارتىلادى. ال ەلىمىزدە مارقۇممەن قوشتاسۋعا بارىپ، كوروناۆيرۋس جۇقتىرعان ناۋقاستار بار. ءبىراق ولاردىڭ سانى ناقتى بەلگىسىز. سوندىقتان ەپيدەميولوگتار حالىق زيراتتا قاراپايىم سانيتارلىق ەرەجەنى ورىنداۋعا مىندەتتى دەپ وتىر. ويتكەنى ءبىر ادامنىڭ سالعىرتتىعى تالاي جاننىڭ دەنساۋلىعىنا ءقاۋىپ ءتوندىرۋى مۇمكىن.