2021 جىلعى 1 قاڭتاردان باستاپ ميكروكرەديت بەرۋدى قارجى نارىعىن رەتتەۋ جانە دامىتۋ اگەنتتىگىنىڭ ليسەنزياسىن العان ۇيىم عانا جۇرگىزە الادى. بۇل تۋرالى اتالعان اگەنتتىك باسقارما ءتوراعاسىنىڭ ورىنباسارى نۇرلان ءابدىراحمانوۆ PrimeMinister.kz-كە بەرگەن سۇحباتىندا ايتتى.

ن. ءابدىراحمانوۆتىڭ ايتۋىنشا، 2019 جىلعا دەيىن قازاقستاندىقتار شاعىن نەسيەلەۋ قىزمەتتەرىن بەلسەندى پايدالانعان. وسىعان بايلانىستى وسى سەكتوردا بەلگىلى ءبىر پروبلەمالار جيناقتالدى.

– ادامدار كوبىنەسە مۇنداي ۇيىمداردىڭ جوعارى پايىزدىق مولشەرلەمەلەر ورناتۋىنان، ءوسىمپۇلدار مەن ايىپپۇلدار سالۋىنان زارداپ شەكتى. سونداي-اق وتكەن جىلى ءبىز الاياقتىقتىڭ جەكەلەگەن فاكتىلەرىن بايقادىق. وسىعان بايلانىستى 2019 جىلى وسى جىلدىڭ باسىنان باستاپ شاعىن نەسيەلەۋ كومپانيالارىن رەتتەۋدى، سونداي-اق ولاردىڭ بيىلعى 1 شىلدەگە دەيىن اگەنتتىكتە مىندەتتى ەسەپتىك تىركەۋدەن ءوتۋىن ەنگىزگەن زاڭ قابىلداندى، – دەدى ول.

الايدا پاندەميا كارانتينىنە بايلانىستى كوپتەگەن شاعىن نەسيەلەۋ كومپانيالارىنىڭ قىزمەتى شەكتەلدى، ۋاقىتشا توقتاتىلدى، ەسەپتىك تىركەۋدەن بارلىعى وتە المادى، سوندىقتان ەسەپتىك تىركەۋ مەرزىمى 1 قىركۇيەككە دەيىن ۇزارتىلدى.

قازىرگى كەزدەگى جاعداي بويىنشا 1 104-كە جۋىق شاعىن نەسيەلەۋ كومپانياسى، ونىڭ ىشىندە 562 لومبارد، 380 شاعىن قارجىلاندىرۋ كومپانياسى جانە 182-گە جۋىق كرەديتتىك سەرىكتەستىك تىركەۋدەن وتكەن.  

سونىمەن قاتار كەلەسى جىلدان باستاپ مىندەتتى ليسەنزيالاۋ ەنگىزىلەدى. ياعني، ءقازىر – ەسەپتىك تىركەۋ، ال كەلەسى جىلدان باستاپ بارلىق شاعىن نەسيەلەۋ كومپانيالارىن مىندەتتى تۇردە ليسەنزيالاۋ بولادى. اگەنتتىك ءتيىستى تۇزەتۋلەر ازىرلەدى. ولار كەلەسى جىلدىڭ 1 قاڭتارىنان باستاپ ميكروكرەديتتەر بەرۋدى اگەنتتىكتىڭ ليسەنزياسىن العان ۇيىم عانا جۇرگىزە الادى دەپ قاراستىرادى.