پاۆلودار وبلىسى ءىىد ەكىباستۇزداعى تاكسي كولىگىمەن سوقتىعىسقان ءاۆتوموبيلدىڭ سالونىندا پوليسەيلەردىڭ بولماعانىن مالىمدەدى. بۇل تۋرالى "قامشى" اقپاراتتىق پورتالى Tengrinews.kz-كە سىلتەمە جاساي وتىرىپ حابارلايدى.  

ەسكە سالا كەتەيىك، جول-كولىك وقيعاسىنان تاكسيدىڭ 24 جاستاعى جۇرگىزۋشىسى قازا تاپقان بولاتىن، تاعى ەكى ادام اۋرۋحاناعا جەتكىزىلگەن.

ءىىد مالىمەتىنشە، Lada Priora ءاۆتوموبيلىنىڭ جۇرگىزۋشىسى  پاۆلودار قالاسىنىڭ تۇرعىنى بولعان. ول بالالار ءۇيىنىڭ تاربيەلەنۋشىسى، جۇمىسسىز. "Lada Priora اۆتوموبيلىندە بولعانداردىڭ ەشقايسىسى پوليسيا قىزمەتكەرى ەمەس ەكەنىن جازعان ۆەدومستۆونىڭ  باسپاسوزگە بەرگەن حابارلاماسىندا.

"قازىرگى ۋاقىتتا جالعان اقپارات تاراتقانداردى جاۋاپقا تارتۋ ماسەلەسى قاراستىرىلىپ جاتىر"، - دەدى ءىىد وكىلدەرى.

ەسكە سالا كەتەيىك، جول-كولىك وقيعاسى تۋرالى اقپاراتتى الەۋمەتتىك جەلىلەردە تاكسي پاركىنىڭ قىزمەتكەرى سۆەتلانا شەپەل جاريالاعان بولاتىن. ءوز پوستىندا ول جول اپاتىنىڭ كۋاگەرلەرىن ىزدەيتىنىن جازدى. كەيىن ول كۋاگەرلەردىڭ تابىلعانىن حابارلادى. "الەۋمەتتىك جەلى ارقىلى ءبىز كۋاگەر تاپتىق، ونىڭ ايتۋىنشا، "لادا" جوعارى جىلدامدىقپەن جۇرگەن. ادامدار ونىڭ ماس بولعانىن ايتتى. ءبىز جول اپاتى كەزىندە اۆتوموبيلدە پوليسەيلەردىڭ دە بولعانىن انىقتادىق، ولار دا ماس كۇيدە بولعان"، - دەدى تاسىمالداۋ  پاركىنىڭ قىزمەتكەرى سۆەتلانا شەپەل.

Lada Priora مەن ۆاز-2106 اۆتوموبيلدەرىنىڭ قاتىسۋىمەن بولعان جول-كولىك وقيعاسى 15 تامىزدا اباي-تورايعىروۆ كوشەلەرىنىڭ قيىلىسىندا بولدى. قازا تاپقان جىگىتتىڭ ارتىندا ايەلى مەن ءتورت ايلىق قىزى قالدى.