2013-2014 جىلدارى سىبايلاس جەمقورلىق تۋرالى اقپارات بەرگەن قازاقستاندىقتارعا شامامەن 38 ملن. تەڭگە سىياقى تولەنگەن. بۇل تۋرالى "قامشى" اقپاراتتىق پورتالى «قازاقپارات»- قا سىلتەمە جاساي وتىرىپ حابارلايدى.

ۆەدومستۆونىڭ رەسمي جاۋابىنداعى دەرەكتەرگە سۇيەنسەك، 2013 جىلدان باستاپ 2014 جىلدىڭ تامىزىنا دەيىن 336 ادامعا سىياقى رەتىندە 38 ملن. تەڭگە تولەنگەن.

«جالپى، قازاقستان بۇرىنعى كەڭەستىك ەلدەردىڭ اراسىندا العاشقىلاردىڭ ءبىرى بولىپ 2012 جىلى سىبايلاس جەمقورلىق تۋرالى اقپارات بەرگەن ادامعا سىياقى تاعايىندايتىن ينستيتۋتتى ىسكە قوستى. بۇل ينستيتۋت 2013 جىلدان باستاپ تولىق جۇمىسقا كىرىستى. ينستيتۋتتى قۇرۋ ءۇشىن، ياعني، ونىڭ جۇمىسى ءۇشىن رەسپۋبليكالىق بيۋدجەتتەن جىل سايىن 32 ملن. تەڭگە بولىنەدى. 2013 جىلدان باستاپ 2014 جىلدىڭ تامىزىنا دەيىن سىبايلاس جەمقورلىق تۋرالى اقپارات بەرگەن 336 ادامعا جالپى سوماسى 38 ملن. تەڭگە كولەمىندە سىياقى بەرىلگەن»، - دەلىنگەن ۆەدومستۆونىڭ رەسمي جاۋابىندا. 

ءقازىر سىبايلاس جەمقورلىقپەن كۇرەس ماسەلەلەرى قايتادان قۇرىلعان مەملەكەتتىك قىزمەت ىستەرى جانە سىبايلاس جەمقورلىققا قارسى كۇرەس جونىندەگى اگەنتتىكتىڭ قۇزىرەتىنە بەرىلگەن. ال، سىبايلاس جەمقورلىق تۋرالى اقپارات بەرگەن ادامداردى ىنتالاندىرۋ جونىندەگى وكىلەتتىلىك «سىبايلاس جەمقورلىققا قارسى ءىس-قيمىل» تۋرالى زاڭعا نەگىزدەلىپ، وسى ورگاننىڭ قاداعالاۋىندا بولادى.