شىمكەنت قالاسىنا جاڭا تاعايىندالعان اكىم عابيبوللا ءابدىراحىم ۇلى قالاعا كەلگەن قوناقتاردى «كەتپەيمىن» دەپ جىلايتىنداي ەتەمىز دەدى. بۇل تۋرالى «قامشى» پورتالى NUR.kz-كە سىلتەمە جاسايدى.

جيىندا ءسوز العان شىمكەنتتىڭ جاڭا اكىمى وڭتۇستىك حالقىنا قىزمەت ەتۋ ۇلكەن مارتەبە مەن جاۋاپكەرشىلىك ەكەنىن اتاپ وتكەن.

 «ەڭ الدىمەن تۋعان قالاما وسىنداي لاۋازىمدى قىزمەتكە جىبەرگەنى ءۇشىن پرەزيدەنت نۇرسۇلتان نازاربايەۆقا ۇلكەن العىسىمدى بىلدىرگىم كەلەدى»، – دەپ اتاپ ءوتتى اكىم.

سونىمەن قاتار، جاڭا اكىم شىمكەنت قالاسى پرەزيدەنتتىڭ ەرەكشە نازارىندا ەكەنىن، قالانى دامىتۋعا تاپسىرمالار بەرگەنىن اتاپ ءوتتى.

«شىمكەنت قالاسىن تەك قازاقستانداعى ەمەس، الەمدەگى ەڭ ءبىر ادەمى، قولايلى، كۇندىز-تۇنى قالادا ادامدار قىدىرىپ جۇرەتىن، شىمكەنتكە كەلەتىن ادامدار قايتىپ كەتكىسى كەلمەيتىندەي قالا قىلۋىمىز كەرەك. قالا قوناقتارى «قالا دەگەن وسىنداي بولۋى كەرەك» دەپ ايتۋى ءتيىس. جىلاپ، قوشتاساردا «كەتپەيمىن» دەپ ايتاتىنداي ەتۋ قاجەت»، – دەيدى جاڭا اكىم.

ەستەرىڭىزگە سالا كەتەيىك، كەشە شىمكەنت قالاسىنىڭ اكىمدىگىندە وتكەن جيىندا قالانىڭ جاڭا اكىمى بولىپ عابيدوللا ءابدىراحىموۆ تاعايىندالدى. جاڭا اكىمدى پرەزيدەنت نۇرسۇلتان نازاربايەۆتىڭ ءوزى ۇسىنعان. بۇل ۇسىنىستى قالالىق ءماسليحاتتىڭ دەپۋتاتتارى ءبىراۋىزدان قولداپ، قۋاتتاعان بولاتىن.

نۇرزات توعجان