بۇل تۋرالى «قامشى» پورتالى NUR.KZ-كە سىلتەمە جاساي وتىرىپ حابارلايدى.

59 جاستاعى ەلشى تاڭعى اسقا نان، قايماق پەن شۇبات جەگەندى ۇناتادى ەكەن. ۇزاق ۋاقىت شىعىس ەۋروپا، ۋكراينا، بەلورۋسسيا جانە رەسەيدە جۇمىس ىستەپ كەلگەن كرول بۇگىندە استانادا قىزمەت ەتۋدە.

“قىشقىل ءسۇت ونىمدەرىن قاتتى ۇناتامىن. اقش-تا مۇنداي ازىق-تۇلىكتەردى تاپپايسىڭ. كەي-كەزدەرى تەك ايران مەن قايماققا بولا شەتەلدە جۇمىس ىستەپ جۇرگەندەي بولامىن. كۇن سايىن سۋپەرماركەتكە بارىپ، 285 تەڭگەگە ايران، 240 تەڭگەگە ءسۇت ساتىپ الامىن “، – دەپ كۇلەدى ەلشى.

“قازاقستاندا مەنى تۇرىمنەن تانيتىندار از. ءوزىمدى قاۋىپسىزدىكتە سەزىنىپ، جالعىز بازار ارالاي الامىن. تاشكەنتتە بولسا، مەن دجينسى كيىپ، ريۋكزاك اسىنىپ، مەترومەن جۇرەتىنمىن”، – دەيدى كرول.

ەلشى قىستا قوعامدىق كولىكتەردى پايدالاناتىنىن ايتۋدا. ونىڭ ويىنشا جولاقىنى 90 تەڭگە ەتكەنى ىڭعايلى ەمەس.

“مەن جولاقى تولەۋ ءۇشىن تيىن ساناپ، 90 تەڭگە ىزدەپ تۇرعاننان قىسىلامىن. جولاقى 100 تەڭگە بولعاندا ىڭعايلىراق بولار ەدى. ال قازىردە قوعامدىق كولىككە وتىرۋ ءۇشىن وزىڭمەن كوپ مايدا اقشا الىپ ءجۇرۋىڭ كەرەك. نەمەسە قايىرىمىن كۇتىپ، تۇرىپ قالاسىڭ”، – دەپ اعىنان جارىلدى كرول.

ەلشى سانكت-پەتەربۋرگتىڭ ىزعارلى ايماقتارىندا تۇرىپ كورگەننىڭ ارقاسىندا استانانىڭ سۋىعىنان قورىقپايتىنىن جەتكىزدى. وعان مۇنداي وڭىرلەردە ەڭ باستىسى مونشا بولسا جەتكىلىكتى ەكەن.

“كەيبىرەۋلەر جەكسەنبى سايىن شىركەۋگە بارادى. ال مەن مونشاعا بارىپ، تازارعاندى ءجون كورەمىن”، – دەپ جالعاستىردى ەلشى.

كوپ ەلدى كورگەن كرول ءار مەملەكەتتىڭ ادامدارى ءار ءتۇرلى ەكەنىن بايقاعان. ول ءتىپتى ءبىر مەملەكەتتىڭ وزىندە ادمادار ءار ءتۇرلى بولادى دەگەن پىكىردە.

قازاقتار العاش كەزدەستىرگەندە سۋىق ادامدار سياقتى كورىنگەنىمەن، وتە اشىق ادامدار

“مەنىڭشە، امەريكالىقتار قانشا اشىق بولىپ كورىنگەنىمەن، ىشتەي وزدەرىنە ەشكىمدى جاقىنداتتىرا بەرمەيدى. قازاقتار بولسا، كەرىسىنشە، العاش كەزدەستىرگەندە سۋىق ادامدار سياقتى كورىنگەنىمەن، وتە اشىق ادامدار. مەن ءۇشىن قازاقپەن دوستاسۋ نەكەگە تۇرۋمەن بىردەي بولىپ كورىنەدى”، – دەيدى كرول.

كرول ەلشىلىكتەگى قىزمەتكەرلەرمەن بىرىگىپ، ەلشىلىك ماڭىنا كيىز ءۇي ورناتقان ەكەن. شاڭىراعىن تۇرعىزۋعا ءوزى اتسالىسقان ەلشى بۇگىندە قابىلداۋلاردى كيىز ءۇيدىڭ ىشىندە وتكىزىپ ءجۇر.

“مەنىڭ ەلشى ارىپتەستەرىم كيىز ۇيگە الىپ كىرگەندە اڭ-تاڭ بولىپ جاتادى. كيىز ءۇي سىيلاستىق بەلگىسى بولىپ قانا قويماي، ءبىراز ماسەلەلەردى شەشەدى. ەلشىلىكتە ءىس-شارا وتكىزەتىن ورىن از. كيىز ءۇي – بۇل جاعدايدىڭ وڭتايلى شەشىمى”، – دەپ جالعاستىردى ەلشى.

كرول پرەزيدەنت نۇرسۇلتان نازاربايەۆتى ومىرىندە تەك ءبىر رەت كەزدەستىرگەن ەكەن. ول نازاربايەۆتىڭ جايدارلى ادام بولىپ كورىنگەنىن ايتۋدا. قازاقستاندا بار-جوعى 6 اي بولعان كرول، تەك الماتى مەن استانانى كورگەن بولىپ شىقتى.

ەلشى قازاقستانعا كەلىپ، جىلقىنىڭ ەتىن جەۋدى ۇيرەنگەنىن ايتۋدا.

“مەن بۇرىندارى سالت اتتى ادام بولاتىنمىن. جىلقىنىڭ ۇستىندە شاپقاندى قاتتى ۇناتاتىنمىن. ال مۇندا كەلىپ، مەن جىلقىلاردى جەۋدى ۇيرەندىم”، – دەپ اعىنان جارىلدى كرول.

نۇرزات توعجان