جىلجىمايتىن مۇلىك نارىعىنىڭ جەتەكشى ساراپشىلارى "كرىشا"باسىلىمىنىڭ تىلشىلەرىنىڭ ەركىن اۋىتقۋ باعامىنا ءوتۋدىڭ وتاندىق باسپانا نارىعىنا قالاي اسەر ەتەتىنى جانە ءۇي باعاسىنىڭ قانداي بولاتىنى، نارىقتىڭ تۇرالاپ قالۋى نەمەسە باعانىڭ بىرتىندەپ تەڭگەگە وتۋىنە بايلانىستى قارقىن الۋى جايلى سۇراقتارىنا جاۋاپ بەردى. بۇل تۋرالى "قامشى" اقپاراتتىق پورتالى حابارلايدى، tengrinews.kz-كە سىلتەمە جاساي وتىرىپ.

ساۋالعا جاۋاپ بەرگەن ساراپشىلاردىڭ باسىم بولىگى بۇل جاعدايدىڭ قاتەرلى ەكەنىن ايتتى، سەبەبى ۇلتتىق ۆاليۋتانىڭ بۇلاي قۇلدىرايتىنىن ەشكىم كۇتكەن جوق. 

ساراپشىلار ديەۆالۆاسيادان حالىقتىڭ اسىرەسە تولەم قابىلەتى بار بولىگىنىڭ زارداپ شەگەتىنىن ايتىپ وتىر. الايدا بۇل جاعداي ساتۋشىلارعا دا ءساتتى ەمەس ەكەنى ايتىلادى: ولار ءوز نىساندارىن بۇعان دەيىن بەلگىلەگەن باعاعا ساتا المايدى. بارلىعى كۇتۋگە كىرىسەدى. ايتپاقشى، ءقازىردىڭ وزىندە ءۇي سالۋشىلار جۇمىستى توقتاتىپ قويدى.  

ساراپشىلاردىڭ بولجامىنا قاراعاندا، جىلجىمايتىن مۇلىك نارىعىندا كەم دەگەندە قىركۇيەككە دەيىن ءولىارا كەزەڭ كۇتىلەدى. كەيىن عانا قوزعالىس بولۋى مۇمكىن.

تەڭگەنىڭ قۇلدىراۋى باسپانا نارىعىنداعى كەلىسىمدەردىڭ سانىن ايتارلىقتاي ازايتادى. بۇل جاعدايدا اسىرەسە دوللارمەن كرەديت الىپ، ءبىراق بۇعان دەيىن بەكىتىلگەن باعامەن ءۇي الىپ ۇلگەرمەگەن ساتىپ الۋشىلار زارداپ شەگەدى. 

"تەڭگەنىڭ شىلدەدەگى قۇلدىراۋى نارىق قاتىسۋشىلارىنىڭ كوڭىل-كۇيىنە قاتتى اسەر ەتە قويمادى، سەبەبى بولجامدا مۇنداي جاعدايدىڭ بولاتىنى بار ەدى. ارينە، بۇل جاعداي كەيبىر تۇتىنۋشىلاردىڭ تاراپىنىڭ كەلىسىمدەردى كەيىنگە قالدىرۋىنا جانە قىزىعۋشىلىق تانىتپاي وتىرعان ساتىپ الۋشىلاردىڭ كەتۋىنە سەبەپ بولدى"، - دەپ ەسەپتەيدى قازاقستاننىڭ ريەلتورلار بىرىككەن اسسوسياسياسىنىڭ ۆيسە-پرەزيدەنتى نيني لۋكيانەنكو.

ول باسپانانىڭ دوللار ەكۆيۆالەنتىندە 20 پايىزعا ارزاندايتىنىن بولجادى. الايدا، ونىڭ پىكىرىنشە، قازاقستان بۇل جاعدايدان كەيىن قۇندى دوللارمەن باعالاۋدى دوعارمايدى. 

"باسپانا قۇنىنىڭ تەڭگەمەن ەسەپتەلەتىن جاعدايىنا وتۋىنە سەبەپ كورىپ تۇرعانىم جوق. ۇكىمەت جۇرگىزگەن سوڭعى شارالار نارىق قاتىسۋشىلارىنىڭ كەلىسىمدى دوللارمەن جاساسۋعا دەگەن نيەتىن كۇشەيتەدى، سەبەبى بۇل سەنىمدىرەك ۆاليۋتا"، - دەدى لۋكيانەنكو.

قازاقستاننىڭ جىلجىمايتىن مۇلىك فەدەراسياسىنىڭ پرەزيدەنتى ەرمەك مۇسىرەپوۆ قازاقستان جىلجىمايتىن مۇلىك نارىعى ءۇشىن 20 تامىزدى "قارا بەيسەنبى" دەپ اتادى. ونىڭ پىكىرىنشە، الداعى ۋاقىتتا ەكى سەنارييدى كۇتۋ كەرەك. "ءبىرىنشىسى - نارىق تۇرالاپ قالادى، ودان كەيىن قۇلدىرايدى، ەكىنشىسى - نارىق باعانىڭ تومەندەۋىنىڭ جانە باعانىڭ دەدوللاريزاسياسىنىڭ ەسەبىنەن قالىقتاپ تۇرادى"، - دەپ مالىمدەدى ول بۇل جاعدايدىڭ نارىق قاتىسۋشىلارىنا تاۋەلدى ەكەنىن ايتا وتىرىپ. الايدا مۇسىرەپوۆ الداعى 1-2 جىلدا دوللارمەن باعالانعان باسپانا قۇنىنىڭ 20-30 پايىزعا دەيىن تومەندەيتىنىن ايتتى.  

"باسپانانىڭ بارلىق سەگمەنتىندەگى ساتۋشىلار مەن جالعا بەرۋشىلەردىڭ دوللارداعى قۇندى 20-30 پايىزعا تومەندەتەتىنى انىق جايت، - دەپ مالىمدەدى ول. - جالپى العاندا الداعى جىلداردا، مەنىڭ ويىمشا، باعا دوللارىنا 155-160 تەڭگە قاتىناسىنداعى كورسەتكىشكە ورالادى. ءبىز بۇل مەجەگە وسى كوكتەمدە جەتىپ قويعانبىز. كەلىسىمدەر وسى قاتىناستا جاسالدى. باعا قۇلدىراۋى تاعى بولادى دەپ ويلايمىن".

ەسكە سالا كەتەيىك، كەشە ق ر ۇكىمەتى ۇلتتىق بانكپەن بىرىگىپ، تەڭگەنىڭ ەركىن اۋىتقۋ باعامىنا ءوتۋ تۋرالى شەشىم شىعاردى. مۇندا ينفلياسيالىق تارگەتتەۋ رەجيمىنىڭ نەگىزىندەگى جاڭا اقشا-كرەديت ساياساتىن جۇزەگە اسىرۋعا ءوتۋ، ۆاليۋتا ءدالىزىن الىپ تاستاپ، ەركىن اۋىتقۋ دالىزىنە ءوتۋ تۋرالى ءسوز بولىپ وتىر. مۇنداي شەشىم الەمدىك ەكونوميكاداعى جاعىمسىز فاكتورلاردىڭ كۇشەيۋىنىڭ نەگىزىندە قابىلدانعان. ناتيجەسىندە دوللار باعامى 198 تەڭگەدەن 252 تەڭگەگە دەيىن كوتەرىلىپ كەتتى.