مەكتەپ اسحانالارى مەيرامحانا دارەجەسىنە تەڭەستىرىلمەيتىن  بولدى. ۇزاق تالقىلاۋدان كەيىن ۇلتتىق ەكونوميكا مينيسترىلىگى وقۋ ورىندارىنداعى اسحانانالاردى جالعا بەرۋ اقىسىن تومەندەتۋدى ۇيعارىپ وتىر. بۇل تۋرالى "قامشى" اقپاراتتىق پورتالى "نۇر.كز"  سايىتىنا سىلتەمە جاساي وتىرىپ حابارلايدى.

تاعى ءبىر وزگەرىس – بيىلدان باستاپ مەكتەپتەگى تەگىن تاماق بەرۋ جۇيەسىنىڭ توقتاتىلعانى ءمالىم.

ءبىرىنشى، ەكىنشى تاماق جانە ءبىر ستاقان كومپوت، نە ءسۇت – بۇل بۇعان دەيىن ەل مەكتەپتەرىندەگى اسحانادا بەرىلگەن اس ءمازىرى بولاتىن. ەڭ باستىسى – تەگىن.

ءبىراق جاڭا وقۋ جىلىنان باستاپ، ەندى ونداي جومارتتىققا جول جوق. ەگەر بالا مەكتەپتە تاماقتانعىسى كەلسە، ونىڭ اقىسىن اتا-اناسى تولەۋى ءتيىس. وعان بيۋدجەتتەن اقشا بولىنبەيدى.

“وتكەن جىلى ءبىر وقۋشىنىڭ تاماعى ءۇشىن كۇنىنە 153 تەڭگە بولىنەتىن. بيىل ەندى ونداي جۇيە الىندى. بۇل مۇلدەم تاماق بولمايدى دەگەن ءسوز ەمەس. ءبىراق اسحانالار ەندى اقىلى جۇمىس ىستەيدى. دەگەنمەن، ءبىرشاما جەڭىلدىكتەر دە قالدىرىلعان”، – دەيدى اقتوبە وبلىستىق ءبىلىم باسقارماسىنىڭ ءبولىم باسشىسى شامشىراق سايعالييەۆا.

ماماننىڭ مەڭزەپ تۇرعانى – بۇل تۇرمىسى ناشار جانە كوپبالالى وتباسىنان شىققان وقۋشىلارعا قاتىستى جەڭىلدىك. ياعني، تەگىن تاماقتانۋ قۇقىعىنا بيىل تەك سولار عانا يە بولماق.

بۇعان بيۋدجەتتەن ءبىر وقۋشىنىڭ ءبىر رەتتىك اسى ءۇشىن كۇنىنە 100 تەڭگەدەن 300 تەڭگە ارالاعىندا قاراجات بولىنبەك. ال اقىلى استىڭ قۇنى ازىرگە بەكىتىلگەن جوق. قازاق تاعامتانۋ اكادەمياسى تەگىن استىڭ ءمازىرىن عانا جاساپ وتىر..

“كۇندەلىكتى تاعامنىڭ 35 پايىز قۇندىلىعىن قامتاماسىز ەتەتىندەي قىلدىق.  بۇل – 1-4 سىنىپ وقۋشىلارىنا 600 ككالوريا، 5-8 سىنىپ بالالارىنا 730 ككالوريا، 810 ككالوريا 8-11 سىنىپ بالالارىنا. بۇل قايتالاپ ايتامىن، كۇن كورىسى تومەن بالالارعا ارنالعان”، – دەيدى قازاق تاعامتانۋ اكادەمياسىنىڭ ءبولىم جەتەكشىسى ساتبەك مۇسابەكوۆ.

دەگەنمەن، بيىلعى وقۋ جىلىندا بولاتىن تاعى ءبىر وزگەرىس – اسحانا  اقىسىنا قاتىستى. بۇدان بىلاي ءبىلىم ورداسىنداعى تاماقتانۋ ورىنىن جالعا بەرۋ قۇنى كەشەننىڭ شارشى مەترىنە قاراي باعالانباق. قايتا بۇل جەڭىلدەتىلگەن ءتۇرى ەكەن.

ايتپەسە، ۇلتتىق ەكونوميكا مينيسترلىگى ناۋرىز ايىندا مەملەكەتتىك مەكەمەلەرگە تيەسىلى اسحانالاردىڭ جالداۋ قۇنىن كوتەرۋگە پارمەن بەرگەن ەدى. ءبىراق ۇزاق تالقىلاۋدان كەيىن شەشىم وزگەرتىلىپ وتىر. وندا دا تەك مەكتەپتەرگە عانا قاتىستى.

ءسويتىپ، اسحانا تاعامىنىڭ باعاسى ونىڭ جالداۋ اقىسىنا بايلانىستى وسەيىن دەپ تۇر. ماسەلەن، بۇرىن ءبىر ءبالىش 80 تەڭگەدەن ساتىلعان، ەندى ونىڭ قۇنى 200 تەڭگەگە جەتۋى مۇمكىن. بۇل، ارينە، ەڭ ءبىرىنشى اتا-انا قالتاسىنا اۋىر سوققى.