ءماجىلىس وتىرىسىندا "اق جول" فراكسياسىنىڭ دەپۋتاتى اندرەي ليننيك قازاقستاندا اتىس قارۋىنا رۇقسات بەرۋدى باقىلاۋدى قاتاڭداتۋ، سونداي-اق ءبىلىم بەرۋ نىساندارىن كۇزەتۋ جۇمىسىن كۇشەيتۋ باستامالارىن كوتەرىپ، پرەمەر-مينيستر اسقار مامينگە دەپۋتاتتىق ساۋال جولدادى.
اندرەي ليننيك قازاندا بولعان قايعىلى وقيعانى ەسكە ءتۇسىرىپ، مەكتەپتەر مەن مەكتەپكە دەيىنگى مەكەمەلەردىڭ، تەرروريزمگە قارسى قاۋىپسىزدىگى تۋرالى زاڭناماداعى تالاپتارعا نازار اۋدارۋ كەرەكتىگىن ايتتى.
دەپۋتاتتىڭ سوزىنشە، قازاقستاندا تەرروريستىك تۇرعىدان نىسانداردى قورعاۋ ءالسىز.
– نەلىكتەن بىزدە زاڭ بويىنشا الكوگولدى 21 جاستان، ال قارۋدى 18 جاستان باستاپ ساتىپ الۋعا بولادى؟ قارۋ-جاراققا ليسەنزيا الۋ ءۇشىن ەسىرتكى جانە پسيحونيەۆرولوگيالىق ديسپانسەرلەردەن ەسەپتە تۇرماعانى تۋرالى انىقتاما بەرۋ جەتكىلىكتى، – دەگەن دەپۋتات قارۋ العىسى كەلەتىن ادامعا قويىلعان تالاپ تىڭ جەڭىل دەپ سانايدى.
ونىڭ پىكىرىنشە، قارۋ ۇستاۋعا ليسەنزيا بەرۋ جاسىن 18-دەن 24 جاسقا دەيىن كوتەرۋ، اتىس قارۋىن الىپ جۇرۋگە جانە ساقتاۋعا رۇقسات بەرۋ ماسەلەسىن قايتا قاراستىرۋ قاجەت.
جوعارىدا ايتىلعاندارعا بايلانىستى "اق جول" فراكسياسىنىڭ دەپۋتاتتارى ءبىلىم بەرۋ ورىندارىنىڭ تەرروريزمنەن قورعانۋ جۇيەسىنە قويىلاتىن تالاپتاردى قايتا قاراۋدى ۇسىنىپ، قوعامدىق ورىنداردى كۇزەتەتىن كۇزەت قىزمەتكەرلەرىنە قارۋ الىپ جۇرۋگە جانە ولارعا كەشەندى عانا ەمەس، ادامداردىڭ قاۋىپسىزدىگىن دە قورعاۋدى جۇكتەۋ باستاماسىن كوتەردى.
پىكىر قالدىرۋ