جاقىندا قىزىلوردا وبلىسىنىڭ اكىمى قىرىمبەك كوشەربايەۆ قورقىت اتا اتىنداعى قىزىلوردا مەملەكەتتىك ۋنيۆەرسيتەتىندە ستۋدەنتتەرگە «حالىقارالىق ۆاليۋتا جۇيەسىنىڭ قالىپتاسۋى مەن دامۋى» تاقىرىبىندا ءدارىس وقىعان. وندا اكىم مىرزا «تاۋەلسىزدىكتى بارىنەن دە بيىك قوياتىن ءبىز ءۇشىن ءتول تەڭگەدەن باس تارتۋ مۇمكىن ەمەس قادام» دەگەن. بۇل تۋرالى «قامشى» پورتالى nur.kz سايتىنا سىلتەمە جاساي وتىرىپ حابارلايدى.

قىزىلوردا وبلىسىنىڭ اكىمى، ساياسات عىلىمدارىنىڭ دوكتورى قىرىمبەك ەلەۋ ۇلى كوشەربايەۆ مىرزا ستۋدەنتتەردىڭ الدىندا وقىعان دارىسىندە جاھاندىق ساياساتتاعى ورىن الىپ جاتقان وقيعالاردى ساراپتاي كەلە، حالىقارالىق ۆاليۋتانىڭ ەلىمىزدىڭ ەكونوميكاسىنا اسەرىنە كەڭىنەن توقتالعان.

«الەمدىك ۆاليۋتا جۇيەسىنىڭ قازىرگى جاعدايى مەن ونىڭ بولاشاعى دۇنيە جۇزىندە ەڭ قىزۋ تالقىلانىپ جاتقان ماسەلەلەردىڭ ءبىرى. كوپ مامانداردىڭ پىكىرىنشە، الداعى ۋاقىتتا ۆاليۋتا جۇيەسى تۇبەگەيلى تۇردە وزگەرۋى مۇمكىن. باستى قاعيدالارى مەن ەرەجەلەرى XX عاسىردىڭ ورتاسىندا قالىپتاسقان جانە اقش دوللارىنا نەگىزدەلگەن قازىرگى الەمدىك ۆاليۋتا جۇيەسى وسى كۇنگى الەم ەكونوميكاسىنداعى كۇشتەردىڭ ارا-سالماعىن ەسكەرمەيدى»، – دەدى كوشەربايەۆ.

«الەم ەكونوميكاسىنىڭ تاريحىنا كوز سالساق، قۇلدىراۋ، ورلەۋ بولىپ وتىرعان. سوندىقتان بۇل قيىنشىلىق تا وتپەلى كەزەڭ. تاۋەلسىزدىكتىڭ باستاۋىندا قازاقستاننىڭ قىسقا ۋاقىتتا وسىنداي جەتىستىكتەرگە جەتۋى، استانانىڭ قازىرگىدەي قالاعا اينالۋى بىزگە مۇمكىن ەمەس بولىپ كورىنگەن. تەڭگەنىڭ دە الەمدىك ۆاليۋتالار قاتارىنان ورىن الۋى ءقازىر مۇمكىن ەمەس بولىپ كورىنەدى. ءبىراق، ارمانى اسقاق، مۇراتى بيىك ەلدەر عانا العا باسادى. سول ارماندارىمىزدى اقيقاتقا اينالدىرار ازاماتتاردىڭ وسى زالدا وتىرعانىنا مەن سەنەمىن»، – دەدى وبلىس اكىمى.

 نۇرزات توعجان