1 قىركۇيەك كۇنى ادەتتەگىدەي شاردارا اۋدانىنداعى بارلىق ءبىلىم وشاقتارىندا العاشقى قوڭىراۋ سوعىلىپ، وقۋشىلار سۇيىكتى مەكتەپتەرىمەن قايتا قاۋىشتى. اۋدان اكىمى قامىتبەك ايتورەيەۆ قالاداعى «شاردارا» مەكتەپ-ليسەيىندەگى سالتاناتقا قاتىسىپ، وقۋشىلاردىڭ قۋانىشىن ءبولىستى.

-ەلباسىمىز ەلدىگىمىزدى بەكەمدەيتىن 5 ينستيتۋسيونالدى رەفورمانى ىسكە اسىرۋعا ارناعان 100 ناقتى قادامنىڭ 10-ىن تىكەلەي ءبىلىم سالاسىنا باعىتتاپ وتىر. مۇنىڭ ماڭىزى وتە زور دەپ بىلەمىن. 2050 جىلى الدىڭعى قاتارداعى 30 ەلدىڭ قاتارىنا كىرۋ ءۇشىن ءبىز بۇگىن ءبىلىمدى ۇرپاق تاربيەلەۋىمىز كەرەك. بالالارىمىز الاڭسىز وقۋ ءۇشىن مەملەكەت تاراپىنان بارلىق جاعداي جاسالىپ وتىر. ءبىزدىڭ اۋدانداعى ءبىلىم ساپاسى جىلدان جىلعا ارتىپ كەلە جاتىر دەپ ايتا الامىن. بىلتىرعى وقۋ جىلىنىڭ قورىتىندىسىندا شاردارالىق تۇلەكتەر ۇبت سىناعىن وبلىس بويىنشا جاقسى دەڭگەيدە تاپسىرعانى سونىڭ ءبىر دالەلى. وسىناۋ بيىكتەن بيىلعى وقۋ جىلىندا دا كورىنەدى دەپ سەنەمىن. جاڭا وقۋ جىلى باستالۋىمەن سىزدەردى قۇتتىقتايمىن، - دەدى قامىتبەك نۇرجان ۇلى.

مۇنان سوڭ اۋدان باسشىسىمەن بىرگە قالالىق قوعامداستىقتىڭ ءتوراعاسى قىستاۋ ىلەسوۆ «شاردارا» مەكتەپ-ليسەيىنىڭ 1 سىنىبىنا قابىلدانىپ جاتقان التى سىنىپتىڭ وقۋشىلارىنا ەلباسى نۇرسۇلتان نازاربايەۆتىڭ «مەنىڭ وتانىم – قازاقستان» اتتى كىتاپتارىن سىيعا تارتتى.

ال، اۋداندىق ءبىلىم ءبولىمىنىڭ باسشىسى اقشاگۇل بەردالييەۆا «جاۋشىقۇم» مەكتەپ-ليسەيىندەگى مەرەكەلىك شاراعا قاتىستى. روزا ءجۇنىسقۇلوۆا باسشىلىق جاسايتىن بۇل ءبىلىم ورداسىندا وتكەن جىلى تەست سىناعىن تاپسىرۋعا قاتىسقان 36 تۇلەكتىڭ 30-ى گرانتقا ءتۇسىپ، اۋدان بويىنشا 97،3 بالل جيعان ەدى. اۋدان مەكتەپتەرىنىڭ اراسىنان ءى ورىندى يەلەنگەن بۇل ءبىلىم وشاعىنىڭ تابالدىرىعىن 51 بالا جاڭادان اتتاپ وتىر. اۋداندىق ءبىلىم ءبولىمىنىڭ باسشىسى اقشاگۇل بەردالييەۆا مەن مەكتەپ ديرەكتورى روزا ءجۇنىسقۇلوۆا جانە اۋىل اكىمى سەرىك ماحامبەت قۇتتىقتاۋ ءسوز سويلەپ، 1 سىنىپ وقۋشىلارىنا ەلباسى كىتاپتارىن تارتۋ جاسادى. العاشقى قوڭىراۋ ۇستىندە مەكتەپ-ليسەي جانىنداعى ينتەرناتتىڭ مەڭگەرۋشىسى، اۋداننىڭ قۇرمەتتى ازاماتى مۇحان قىلىشبايعا وقالى شاپان جابىلىپ، زەينەت دەمالىسىنا شىعارىپ سالىستى.

ايتا كەتەيىك، بيىلعى جاڭا وقۋ جىلىندا اۋدان بويىنشا 1 سىنىپقا 2079 وقۋشى قابىلداندى.

شاردارا اۋدانى اكىمى اپپاراتىنىڭ باسپا ءسوز قىزمەتى.