بۇگىن ءماجىلىستىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە حالىقتىڭ كوشى-قونى جانە جۇمىسپەن قامتىلۋى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ءبىرىنشى وقىلىمدا ماقۇلدادى. بۇل تۋرالى «قامشى» پورتالى «قازاقپاراتقا» سىلتەمە جاساي وتىرىپ حابارلايدى. ەسكە سالا كەتەيىك، كەشە الماتىدا «جەبەۋ» قوعامدىق بىرلەستىگىنىڭ وسى كوشى –قون تۋرالى زاڭعا بايلانىستى باسپا ءسوز ماسليحاتى وتكەن بولاتىن. وندا وسى زاڭنىڭ ءبىر كەمشىلىگى رەتىندە - ازاماتتىق العىسى كەلەتىن قانداستارىمىزدان «سوتتالماعاندىعى تۋرالى» انىقتاما تالاپ ەتىلەتىن تارماقتىڭ بار ەكەندىگى تالقىلاندى.
اتالعان زاڭ جوباسى ەلدىڭ ىشكى دامۋىنىڭ جاڭا كەزەڭىنە جانە الەۋمەتتىك-ەڭبەك قاتىناستارىن جاڭعىرتۋدى كوزدەيدى. «ەتنيكالىق قازاقتاردى تاريحي وتانىنا ورالۋىن ىنتالاندىرۋ ماقساتىندا زاڭ جوباسىمەن ولاردىڭ قونىستانۋ وڭىرىنە قاراماستان ورالمان مارتەبەسىن الۋ، شەتەلدىك ازاماتتارعا قاراعاندا تولەم قابىلەتىن راستاۋسىز ۋاقىتشا تۇرۋ ىقتيارحاتىن الۋ مۇمكىندىگى بەرىلەدى. ۇكىمەت تاراپىنان بەلگىلەگەن وڭىرلەرگە قونىستانعان جاعدايدا ورالماندارعا جاعدايلار جاسالادى. ماسەلەن، جۇمىسپەن قامتۋ بويىنشا شارالار شەڭبەرىندەگى ەتنيكالىق قازاقتار ءۇشىن كولىك شىعىندارىن وتەيتىن، قىزمەتتىك باسپانا نەمەسە جاتاقحانادان بولمە بەرۋدى قۇرايتىن الەۋمەتتىك پاكەتتەر قاراستىرىلادى»، - دەدى دەنساۋلىق ساقتاۋ جانە الەۋمەتتىك دامۋ ءمينيسترى تامارا دۇيسەنوۆا.
ونىڭ ايتۋىنشا، ەلىمىزدىڭ ءبىر وڭىرىنەن ۇكىمەت ايقىنداعان ەكىنشى وڭىرىنە قونىستانعان ورالماندار ءۇشىن دە ءدال جوعارىدا ايتىلعانىنداي الەۋمەتتىك توپتامالار بەرىلمەك. ال العاشقى قونىستانعان، ياعني ۇكىمەت ايقىنداعان وڭىرىنەن بەس جىل مەرزىمىنەن بۇرىن ءوز بەتىنشە كوشىپ-قونىپ، قونىس اۋدارىپ كەتكەندەر، قازاقستان رەسپۋبليكاسىنىڭ ازاماتتىعىن الۋدان باس تارتقاندار وزدەرى العان مەملەكەتتىك قولداۋلاردى قايتاراتىن بولادى.
«ورالماندارعا قازاقستان رەسپۋبليكاسىنىڭ ازاماتتىعىن بەرۋ مەرزىمىن تۇراقتى تۇرۋ ىقتيارحاتىن العاننان كەيىن ءبىر جىل ىشىندە شەشۋ كوزدەلەدى»، - دەدى مينيستر.
اباي ءالجان
پىكىر قالدىرۋ