28-قىركۇيەك كۇنى قازاق مەملەكەتتىك فيلارمونياسىندا قازاق حاندىعىنىڭ 550 جىلدىعىنا وراي «نۇر وتان» پارتياسى جانە پارتيا حاتشىسى قايرات ساتىبالدى ۇلىنىڭ تىكەلەي قولداۋىمەن ءجامالي ديحان ۇلىنىڭ «سىرلى ونەردىڭ سىرلاسى» اتتى ونەر كەشى وتكەن بولاتىن. كەشتىڭ ءسانىن كىرگىزۋگە كينو جانە سيرك ءارتىسى، ونەر زەرتتەۋشىسى، قازاقستان (كينەس) رەكوردىنا 2 رەت ەنگەن مەرەكەلىك شارا يەسىنىڭ وزىمەن بىرگە، ەلىمىزگە ەڭبەگى سىڭگەن ءبىرشاما ونەر قايراتكەرلەرى دە بارىنشا اتسالىستى. دەگەنمەن، جينالعان كوپشىلىك ءجامالي مىرزانىڭ 18 پىشاقتى باسپالداقتىڭ ۇستىمەن ءجۇرىپ ءوتۋ، اۋزىمەن وت بۇركەۋ، قالانا تۇرعىزىلعان كىرپىشتەردى سىندىرۋ، اۋىر گىر تاسىن قولمەن كوتەرىپ تۇرىپ، تىسىمەن ءبىر ادامنىڭ سالماعىن ەڭسەرۋ، كەۋدەسىنە نايزا قاداۋ ىسپەتتى نومىرلەرىن تاعى ءبىر سۇيسىنە تاماشالاۋعا كەلگەن بولاتىن. تاريحي وقيعاعا ارنالعان كەرەمەت شوۋ-كونسەرتتىڭ سوڭى ىزگى تىلەكتەر مەن فوتوسەسسياعا ۇلاستى.

ءجامالي ديحان ۇلىنىڭ ءومىربايانىنا ازدى-كەم توقتالا كەتسەك: تارباعاتاي ايماعىنا قاراستى ءدوربىلجىن اۋدانىنداعى كۇرتى اۋىلىندا 1971 جىلى دۇنيەگە كەلگەن. ول 1988-1990 جج. اراسىندا شاڭ-جاڭ ۋنيۆەرسيتەتىنىڭ جۇڭگو ءتىلى اۋدارما بولىمىندە ءبىلىم الادى. 1991 جىلى ول سۋار پەداگوگيكالىق ۋنيۆەرسيتەتىنىڭ دەنە شىنىقتىرۋ فاكۋلتەتىنە تۇسەدى. 1995 جىلى ءتامامداعان بۇل ءبىلىمىن تولىقتىرۋ ماقساتىندا ءجامالي ديحان ۇلى سول جىلى شاڭحاي، شان-شي قالاسىنداعى شىعىس جەكپە-جەك جانە سيرك ونەرىنە تۇسەدى. وقۋىن اياقتاعان 1999 جىلدان-اق، قحر، سۋار، سيركشىلەر قاۋىمداستىعىنىڭ مۇشەسىنە اينالادى. 2000 جىلى تاريحي وتانىنا تۇپكىلىكتى قونىس اۋدارىپ، ونەر، سپورت سالاسىندا كۇنى بۇگىنگە دەيىن كورنەكتى ناتيجەلەرگە قول جەتكىزىپ كەلەدى. 2004 جىلدان بەرى «نۇر وتان» پارتياسىنىڭ مۇشەسى. 2009 جىلى «قاراجورعا» بىرلەستىگىن قۇرىپ، زەرتتەۋمەن اينالىسىپ، 15 مىڭ ادامعا ءبىر مەزەتتە «قاراجورعانى» بيلەتىپ، قازاقستان (كينەس) رەكوردتار كىتابىنا ەنگىزىلدى. كەيىننەن، 2010 جىلى «قاراجورعا» ءبيىن قازاقستان ۇلتتىق سپورت فەدەراسياسىنىڭ قاتارىنا تىركەتتى. 2014 جىلى ەرجانىبەك باتىردىڭ 300 جىلدىق اسىندا 300 پىشاق جۇزىنەن ءساتتى ءجۇرىپ ءوتىپ، ءوزى ورناتقان رەكوردتى جاڭالاعان بولاتىن.

نازگۇل نازار