جاڭاوزەن قالاسىنىڭ راحات اۋىلىندا 9،9 شاقىرىم جول پايدالانۋعا بەرىلدى. بۇل تۋرالى قوعامدىق كوممۋنيكاسيا ورتالىعىندا وتكەن  بريفينگىدە جاڭاوزەن قالاسىنىڭ اكىمى ماقسات يباعاروۆ مالىمدەدى. ونىڭ ايتۋىنشا، جاڭا جول «اقسۋ» جانە «جۇلدىز» شاعىن اۋداندارىندا توسەلدى. بارلىعى 9،9 شاقىرىمدى قۇرايدى. جوبا قۇنى 300،658 ملن. تەڭگە.

-«جوبا «اۋىلدىڭ گۇلدەنۋى – قازاقستاننىڭ گۇلدەنۋى» رەسپۋبليكالىق اكسياسى اياسىندا جۇزەگە اسىپ جاتىر. بۇل جولدىڭ قۇرىلىسىن 2020 جىلى «التىن قۇرىق» ج ش س باستاعان. ەندى قۇرىلىس اياقتالىپ، جاڭا جول پايدالانۋعا بەرىلدى. جاڭاوزەن قالاسىندا جەرگىلىكتى جانە اۋداندىق ماڭىزى بار اۆتوكولىك جولىنىڭ جالپى ۇزىندىعى 493 شاقىرىم. ونىڭ 239 شاقىرىمىنا اسفالت توسەلگەن»، - دەدى اكىم.

ال، راحات جانە تەڭگە اۋىلدارىندا گاز، سۋ، ەلەكتر جەلىلەرىنىڭ قۇرىلىسى جۇرگىزىلىپ جاتىر. ءقازىر اتالعان اۋىلداردا اياقتالماعان جەر تەلىمدەرىنە ينجەنەرلىك جەلى سالىنۋدا. بۇل جۇمىسپەن «نۇرلى جول قۇرىلىس» مەردىگەر مەكەمەسى اينالىسادى.

-«بۇگىندە سۋمەن قامتۋ جەلىسى قۇرىلىسىنىڭ 90 پايىزى اياقتالىپ، 9 شاقىرىمعا جۋىق سۋ قۇبىرى وتكىزىلدى. قۇرىلىس قازان ايىنىڭ سوڭىندا اياقتالادى. ەلەكترمەن قامتۋمەن «ايكوم لتد» ج ش س اينالىسادى. ءقازىر مەردىگەر مەكەمە قۇرىلىس - مونتاجداۋ جۇمىستارىنا كىرىستى. جوبا جىل سوڭىنا دەيىن تاپسىرىلۋى ءتيىس»، - دەدى ماقسات يباعاروۆ. گازبەن قامتۋ قۇرىلىسىن «شەبەر قۇرىلىس» مەكەمەسى جۇرگىزەدى. بۇل جۇمىستىڭ 45 پايىزى بىتكەن. جوبانى تاپسىرۋ جىل سوڭىنا دەيىن جوسپارلانعان.

ەل تاۋەلسىزدىگىنىڭ 30 جىلدىعى اياسىندا راحات اۋىلىندا دارىگەرلىك امبۋلاتوريا پايدالانۋعا بەرىلەدى. امبۋلاتوريا اۋىسىمىنا 50 كەلۋشىنى قابىلدايدى. جوبانىڭ سمەتالىق قۇنى - 454،6 ملن. تەڭگە. كەلىسىم شارت سوماسى - 404،3 ملن. تەڭگە. ايتا كەتەيىك، ءقازىر جاڭاوزەن قالاسى بويىنشا بارلىعى 3 دارىگەرلىك امبۋلاتوريا جۇمىس ىستەيدى. ونىڭ بىرەۋى جۋىردا قىزىلساي اۋىلىندا اشىلسا، تاعى ەكەۋى تەڭگە اۋىلىندا ورنالاسقان.