بىرىنشىدەن، بۇل ەۆوليۋسيالىق قاعيداتى.
ەشقانداي دا «العا وزۋ» بولماۋى ءتيىس. الەۋمەتتىك سالاداعى بارلىق وزگەرىستەر دامۋ دەڭگەيىمەن قازاقستان ەكونوميكاسىنىڭ مۇمكىندىكتەرىنە سايكەسۋى ءتيىس.
جاڭعىرتۋ ۇدەرىستەرىنىڭ الگوريتمى كەيىن قالعان سالالاردى، وڭىرلەردى، الەۋمەتتىك توپتاردى قولدا بار ستاندارتتار مەن الەۋمەتتىك دامۋ كورسەتكىشتەرىنە «تارتۋعا» ارقاۋلانۋى ءتيىس.
ەكىنشىدەن، ورتاق جاۋاپكەرشىلىك قاعيداتى.
الەۋمەتتىك جاڭعىرتۋدىڭ بارىسى مەن ءناتيجەسىنە جاۋاپكەرشىلىكتى تەك مەملەكەت پەن ونىڭ بارلىق باسقارۋ دەڭگەيلەرى عانا ەمەس، سونداي-اق جەكەمەنشىك قۇرىلىمدار، بارلىق قوعام ءبولىسۋى ءتيىس.
جاڭعىرتۋدىڭ تابىستىلىعى ءۇشىن ءاربىر ازاماتتىڭ ءوز وتانىنا پايدالى بولۋى وتە ماڭىزدى. جاڭعىرتۋ بارلىق قازاقستاندىقتارعا قاجەت. وسىنداي تۇسىنىستىك جاعدايىندا عانا كەڭ كولەمدى قوعامدىق كونسەنسۋس پەن تابىسقا قول جەتكىزۋگە بولادى.
ۇشىنشىدەن، ارىپتەستىك قاتىسۋ قاعيداتى.
بارلىق جۇمىس مەملەكەتتىڭ، بيزنەس پەن ازاماتتىڭ تىعىز ءوزارا ءىس-قيمىلى نەگىزىندە قۇرىلۋى ءتيىس. بۇل جەردە بيلىكتىڭ مىندەتى - مەملەكەت، قوعام مەن جەكە ادام مۇددەسىنىڭ راسيونالدى تەپە-تەڭدىگىن قامتاماسىز ەتۋ.
شىنايى ادىلەتتىلىك دەگەنىمىز، مىنە، وسى.
الەۋمەتتىك ارىپتەستىكتى بەلسەندى دامىتۋ، ەلدىڭ مەملەكەتتىك ەمەس سەكتورىن، ءبىرىنشى كەزەكتە، الەۋمەتتىك سالانى جاڭعىرتۋعا قاتىسۋىن كەڭەيتۋ ءۇشىن جاعداي جاساۋ ماڭىزدى.
تورتىنشىدەن، ىنتالاندىرۋ قاعيداتى.
مەملەكەت قازاقستاندىقتار ءوز بەتىنشە ءوزىنىڭ ءومىر ساپاسىن جاقسارتا الۋلارى ءۇشىن جاعدايلار جاساۋدا. مەملەكەتتىك الەۋمەتتىك قولداۋ ادرەساتتارعا ولاردىڭ ەڭبەك، شىعارماشىلىق جانە قوعامدىق بەلسەندىلىگىن وياتۋعا باعىتتالىپ وتىر.
ءيا، مەملەكەت كومەكتەسپەۋگە بولمايتىن جەرلەرگە كومەك قولىن سوزاتىن بولادى. ءبىراق ازامات ءوزىنىڭ قولىنان كەلەتىن شارۋانى ءوزى اتقارۋى ءتيىس.
جانە بۇل ادىلەتتى بولماق!
تاعى دا اتاپ كورسەتەيىن، بۇگىندە الەۋمەتتىك دامۋدىڭ جاھاندىق ترەندى «جالپىعا ورتاق ەڭبەك قوعامىنا» وتۋگە بارىپ تىرەلەدى. سوندىقتان ادال ەڭبەككە ىنتالاندىرۋدىڭ جولىن تابۋ، ەڭبەك تابىستارىن قوعامدىق ىنتالاندىرۋدىڭ جۇيەسىن قۇرۋ - قازاقستانداعى الەۋمەتتىك جاڭعىرتۋدىڭ اسا ماڭىزدى ماسەلەلەرىنىڭ ءبىرى.
بەسىنشىدەن، كاسىبيلىك قاعيداتى.
بارلىق قابىلداناتىن شەشىمدەر ەگجەي-تەگجەيلى ەسەپتەلىپ، الەمدىك تاجىريبەنى وقىپ-ۇيرەنۋ نەگىزىندە عىلىمي دالەلدەنگەن ۇتىمدىلىق قاپەرگە الىنا وتىرىپ قابىلدانۋى ءتيىس.
مىندەتتەر مەن قاعيداتتاردى ناق وسىلاي ءتۇسىنۋ الەۋمەتتىك جاڭعىرتۋ ۇدەرىستەرىنىڭ نەگىزىنە جاتقىزىلعانى ءجون.
پىكىر قالدىرۋ