بريفينگ بارىسىندا مەملەكەت باسشىسى قازاقستان مەن تاجىكستان تاۋەلسىزدىكتىڭ العاشقى كۇندەرىنەن بەرى ءوزارا سەنىم مەن دوستىققا نەگىزدەلگەن ساياسات جۇرگىزىپ كەلە جاتقانىن ايتتى. بۇل تۋرالى "قامشى" پورتالى akorda.kz-كە سىلتەمە جاساي وتىرىپ حابارلايدى.

تاجىكستاندا 90-جىلداردىڭ باسىندا قيىن كەزدەر بولدى، ءبىراق ءبىز ءاردايىم تاجىك حالقىمەن بىرگە بولدىق. مۇمكىندىگىمىزگە قاراي گۋمانيتارلىق جانە اسكەري-تەحنيكالىق كومەك كورسەتتىك. ويتكەنى، ءبىزدىڭ حالىقتارىمىز ورتالىق ازيادا بىر-بىرىنە دەگەن قۇرمەت نەگىزىندە ءومىر ءسۇرىپ، ءوزارا ىقپالداسۋعا ۇيرەنگەن، – دەدى نۇرسۇلتان نازاربايەۆ.

مەملەكەت باسشىسى اۋماقتىق جانە مادەني-تاريحي جاقىندىق سەكىلدى وڭ ۇردىستەر بار ەكەنىن ەسكەرە وتىرىپ، ەلدەرىمىزدىڭ اراسىنداعى قارىم-قاتىناستى ودان ءارى دامىتۋ قاجەتتىگىنە نازار اۋداردى.

قول قويىلعان ستراتەگيالىق سەرىكتەستىك تۋرالى كەلىسىم 80 قۇجاتتان تۇراتىن قولدانىستاعى شارت بازاسىنا سەرپىن بەرەتىن بولادى. قازاقستان بۇگىندە يندۋستريالىق دامۋ ساياساتىن جۇرگىزىپ وتىرعاندىقتان، جەكەمەنشىك تاجىك كومپانيالارىن مۇمكىندىگىنشە ىنتىماقتاستىققا شاقىرامىز، – دەدى قازاقستان پرەزيدەنتى.

نۇرسۇلتان نازاربايەۆ ەكى ەل ءبىر-بىرىن ەقىۇ، بۇۇ جانە يىۇ سياقتى جاھاندىق ۇيىمدار اياسىندا قولداۋ كورسەتىپ كەلە جاتقانىن اتاپ كورسەتتى.

ءبىز تاجىك تاراپىنا بۇۇ قاۋىپسىزدىك كەڭەسىنىڭ تۇراقتى ەمەس مۇشەلىگىنە ءبىزدىڭ كانديداتۋرامىزدى قولداعانى ءۇشىن ريزامىز. ءسىزدىڭ ەل سۋ-ەنەرگەتيكا سالاسىنداعى قارىم-قاتىناستار بويىنشا دا سىندارلى كوزقاراس ۇستانىپ كەلەدى، – دەدى ەلباسى.

سونىمەن قاتار مەملەكەت باسشىسى تاجىكستاننىڭ حالىقارالىق تەرروريزمگە قارسى ءىس-قيمىل بارىسىنداعى ءرولى زور ەكەنىن اتاپ ءوتتى

سوڭىندا قازاقستان پرەزيدەنتى  مادەني-گۋمانيتارلىق ىنتىماقتاستىقتى ودان ءارى دامىتۋ قاجەتتىگىنە نازار اۋداردى.

ءبىز كۇنى كەشە قازاق حاندىعىنىڭ 550 جىلدىعىن اتاپ وتتىك. بىزدە ورتاق مادەنيەت پەن تاريح بار. ءبىزدىڭ وڭىردە عاسىرلار بويى ۇلى وقيعالار بولىپ ءوتتى، ولار ءبىزدىڭ حالىقتارىمىزدى بىرىكتىرە ءتۇستى، – دەدى نۇرسۇلتان نازاربايەۆ.

بريفينگ اياقتالعاننان كەيىن نۇرسۇلتان نازاربايەۆ ي.ءسومونيدىڭ ەسكەرتكىشىنە گۇل شوعىن قويدى.