بۇگىندە فەرمەرلەر 7 ملن. توننا استىق جينادى. بۇل تۋرالى ق ر اۋىل شارۋاشىلىعى مينيسترلىگىنەن حابارلادى. بۇل تۋرالى "قامشى" پورتالى قازاقپاراتقا سىلتەمە جاساي وتىرىپ حابارلايدى.

«وبلىستىق اۋىل شارۋاشىلىعى باسقارمالارىنىڭ دەرەكتەرى بويىنشا بارلىق ايماقتاردا ەگىن جيناۋ ناۋقانى ءجۇرىپ جاتىر. بيىل ەگىن ورۋ وتكەن جىلداعى كورسەتكىشتەرگە قاراعاندا قارقىندى. اعىمداعى جىلعى 14 قىركۇيەكتەگى جاعداي بويىنشا شامامەن 6،3 ملن گەكتار ءداندى داقىلدار جينالدى، بۇل 2014 جىلعى دەڭگەيىنەن 25،9 مىڭ گەكتارعا ارتىق. بۇگىندە 6،9 ملن. توننادان استام استىق باستىرىلدى (2014 جىلى - شامامەن 6،7 ملن. توننا)، استىق تۇسىمدىلىگى گەكتارىنا 10،9 سەنتنەردەن بولدى، بۇل وتكەن جىلدىڭ دەڭگەيىنەن 0،2 سەنتنەرگە ارتىق»،-دەيدى مينيسترلىكتەگىلەر.

وڭتۇستىك ايماقتاردا جۇگەرى مەن كۇرىشتى ساناماعاندا، جالپى ءداندى داقىلداردىڭ ورۋ ناۋقانى اياقتالدى. جازعى داقىلداردىڭ ءوسىرىلۋى كەزەڭىندە اۋا رايىنىڭ قۇرعاقشىلىق بولۋى سالدارىنان ەڭ تومەنگى تۇسىمدىلىك اقتوبە (5،6 س/گا) جانە باتىس قازاقستان (5،3 س/گا) وبلىستارىندا بايقالۋدا.

ايتا كەتەيىك، بيىل بارلىق اۋىل شارۋاشىلىعى داقىلدارىنىڭ ەگىس القاپتارى 21،2 ملن. گەكتاردى قۇرادى، ونىڭ ىشىندە ءداندى داقىلدار - 14،9 ملن. گەكتار، بيداي - 11،7 ملن. گەكتار. مايلى داقىلدار 2 ملن. گەكتارعا، مال ازىقتىق داقىلدار - 3،7 ملن. گەكتار القاپقا، ال كوكونىس-باقشا داقىلدارى مەن كارتوپ - 425 مىڭ گەكتار جەرگە سەبىلدى.