ءىس-شاراعا تاجىكستان رەسپۋبليكاسىنىڭ پرەزيدەنتى ە.راحمون، ارمەنيا رەسپۋبليكاسىنىڭ پرەزيدەنتى س.سارگسيان، بەلارۋس رەسپۋبليكاسىنىڭ پرەزيدەنتى ا.لۋكاشەنكو، قىرعىز رەسپۋبليكاسىنىڭ پرەزيدەنتى  ا.اتامبايەۆ، رەسەي فەدەراسياسىنىڭ پرەزيدەنتى ۆ.پۋتين، ۇقشۇ باس حاتشىسى ن.بورديۋجا، سونداي-اق ۇيىمعا مۇشە ەلدەردىڭ قورعانىس جانە سىرتقى ساياسات ۆەدومستۆولارى باسشىلارى قاتىستى. بۇل تۋرالى "قامشى" پورتالى اقوردا.كزكە سىلتەمە جاساي وتىرىپ حابارلايدى.

كەزدەسۋ بارىسىندا وڭىردەگى ۇجىمدىق قاۋىپسىزدىك جۇيەسىن نىعايتۋ، ۇيىم قىزمەتىنىڭ تيىمدىلىگىن ارتتىرۋ ماسەلەلەرى جانە جەدەل ارەكەت ەتەتىن ۇجىمدىق كۇشتەردىڭ وقۋ-جاتتىعۋىن وتكىزۋ ناتيجەلەرى تالقىلاندى.

مەملەكەت باسشىسى ءوز سوزىندە ۇيىمنىڭ كۇن تارتىبىندەگى نەگىزگى ماسەلەلەردىڭ ءبىرى حالىقارالىق تەرروريزم مەن ەكسترەميستىك ۇيىمداردىڭ توندىرەتىن ىقتيمال قاتەرلەرى ەكەنىن اتاپ ءوتتى.

مويىنداۋىمىز كەرەك، وكىنىشكە قاراي، ۇقشۇ-عا مۇشە مەملەكەتتەردىڭ جەكەلەگەن ازاماتتارى وسىنداي راديكالدى قۇرىلىمدارعا قوسىلىپ، زاڭعا قايشى ىس-ارەكەتتەرگە قاتىسۋ ءۇشىن تاياۋ شىعىستاعى جانە اۋعانستانداعى سوعىس وشاقتارىنا بارىپ جاتادى. بۇل جايت ءبىزدىڭ تاراپىمىزدان قارسى ءىس-قيمىل جاساۋدىڭ ءتيىمدى شارالارىن قابىلداۋدى تالاپ ەتەدى، – دەدى نۇرسۇلتان نازاربايەۆ.

قازاقستان پرەزيدەنتى تاجىكستان حالىقارالىق لاڭكەستىككە قارسى كۇرەستىڭ الدىڭعى شەبىندە ەكەنىن نازارعا الا وتىرىپ، بارلىق ەلدەر الەمدىك ەكونوميكاداعى قيىندىقتارعا قاراماستان الداعى ۋاقىتتا دا وسى وداقتاسىمىزعا ەكونوميكالىق كومەك كورسەتۋگە ءتيىس ەكەنىن اتاپ ايتتى.

قازاقستان بيىل باۋىرلاس ەلگە 2،7 ميلليون دوللاردىڭ ازىق-تۇلىگى مەن قۇرىلىس ماتەريالدارىن جىبەردى، – دەدى مەملەكەت باسشىسى.

سونىمەن قاتار، نۇرسۇلتان نازاربايەۆ سەسسياعا قاتىسۋشىلار نازارىن اۋعانستانداعى جاعدايعا اۋداردى.

اۋعانستاننىڭ سولتۇستىگىندەگى سودىرلار بەلسەندىلىگى ايرىقشا الاڭداتادى. اۋعان اۋماعىنان تونەتىن قاۋىپ-قاتەرلەرگە قارسى ءتيىستى ارەكەت ەتۋ ءۇشىن ۇقشۇ اياسىنداعى بىرلەسكەن كۇش-جىگەردى ەكىجاقتى نەگىزدە دە، وزگە حالىقارالىق ۇيىمدارمەن اراداعى جۇمىستار بارىسىندا دا ارتتىرا ءتۇسۋ قاجەت. قازاقستان كابۋلعا جىل سايىن ازىق-تۇلىك، وتىن، دارى-دارمەك جەتكىزۋ، سونداي-اق اۋعان جاستارىن ەلىمىزدىڭ جوعارى وقۋ ورىندارىندا وقىتۋ ارقىلى تەحنيكالىق جانە گۋمانيتارلىق كومەك كورسەتۋدى جالعاستىرۋدا، – دەدى قازاقستان پرەزيدەنتى.

مەملەكەت باسشىسى ءبىزدىڭ ەل وڭىردەگى جاعدايدىڭ كۇردەلى ەكەنىن ەسكەرە وتىرىپ، ۇقشۇ جەدەل ارەكەت ەتەتىن ۇجىمدىق كۇشتەرىنىڭ جاۋىنگەرلىك قابىلەتىن ارتتىرۋعا باعىتتالعان شارالاردى قولدايتىنىن ايتتى.  

قازاقستان جەدەل ارەكەت ەتەتىن ۇجىمدىق كۇشتەر ارناۋلى قۇرىلىمدارىنىڭ اسكەري كونتينگەنتىنىڭ جاۋىنگەرلىك جانە قىزمەتتىك دايىندىعىن ارتىرۋ قاجەتتىگىن قولدايدى. وقۋ-جاتتىعۋلاردى، سونىڭ ىشىندە توتەنشە تەكسەرۋلەردى دە ۇنەمى وتكىزىپ وتىرۋ قاجەت دەپ سانايمىز، – دەدى نۇرسۇلتان نازاربايەۆ.

قازاقستان پرەزيدەنتى سەسسيا شەشىمدەرىنىڭ جوبالارى اراسىنان اسكەري كونتينگەنتتەردىڭ، قارۋ-جاراقتىڭ، تەحنيكانىڭ ۇقشۇ-عا مۇشە ەلدەر اۋماعى ارقىلى قوزعالىسىن ناقتى رەتتەيتىن اسكەري جانە وزگە قۇرىلىمداردى تاسىمالداۋ سالاسىنداعى ىنتىماقتاستىق تۋرالى كەلىسىمدى ايرىقشا اتاپ كورسەتتى.

سوڭىندا نۇرسۇلتان نازاربايەۆ شاراعا قاتىسۋشىلاردى قازاقستاننىڭ ۇقشۇ اياسىنداعى بارلىق مىندەتتەمەلەردى مۇلتىكسىز ورىندايتىنىنا، سونداي-اق وداقتاس ەلدەرگە قاجەتتى گۋمانيتارلىق كومەك كورسەتە بەرەتىنىنە سەندىردى.