استانا. 15 قىركۇيەك. الماتىدا ۇوس-نا قاتىسۋشىلار مەن اعا ۇرپاق وكىلدەرىنە قوعامدىق كولىكتەردە تەگىن ءجۇرۋ قۇقىعى بەرىلەدى. قالا اكىمى باۋىرجان بايبەكتىڭ توراعالىمەن وتكەن قالالىق ءماسليحاتتىڭ V شاقىرىلىمىنداعى 43ء-شى سەسياسىندا دەپۋتاتتار جەڭىلدەتىلگەن جولاقى تۋرالى شەشىمدى ءبىراۋىزدان قولدادى. بۇل تۋرالى "قامشى" پورتالى Baq.kz-كە سىلتەمە جاساي وتىرىپ حابارلايدى.

دەپۋتتار «الماتىنىڭ مۇقتاج ازاماتتارىنىڭ جەكەلەگەن ساناتتارىنا قالالىق قوعامدىق كولىكتە (تاكسيدەن باسقا) جولاقى جەڭىلدىگىن بەرۋ تۋرالى» جانە ەلەكتروندى جول ءجۇرۋ كارتالارىنا سايكەس قالالىق قوعامدىق كولىكتە (تاكسيدەن باسقا) تاريف قۇنىنىڭ 50% كولەمىندە، سونداي-اق 15 جاستان اسقان جالپى ءبىلىم بەرەتىن مەكتەپتەردىڭ وقۋشىلارىنا، كۇندىزگى وقۋ نىسانىنداعى تەحنيكالىق جانە كاسىبي ءبىلىم بەرەتىن وقۋ ورىندارى مەن جوعارى وقۋ ورىندارىنىڭ ستۋدەنتتەرىنە، جاسىنا بايلانىستى زەينەتكەرلەرگە جەڭىلدەتىلگەن جول ءجۇرۋ مۇمكىندىگى بەرۋ تۋرالى ماسەلەلەردى قارادى. بۇلاردان وزگە، ەلەكتروندىق جول ءجۇرۋ كارتالارعا سايكەس ۇلى وتان سوعىسىنىڭ قاتىسۋشىلارى مەن مۇگەدەكتەرىنە جانە 75 جاستان اسقان تۇلعالارعا قالالىق قوعامدىق كولىكتە (تاكسيدەن باسقا) تەگىن جول ءجۇرۋ مۇمكىندىگى بەرىلەتىن بولدى.
قالا اكىمى قازىرگى كۇردەلى جاعدايدا اعا بۋىن وكىلدەرىنە قولداۋ ءبىلدىرۋدىڭ قاجەت ەكەندىگىن اتاپ ءوتتى.