«نۇر وتان» پارتياسى ءتوراعاسىنىڭ ءبىرىنشى ورىنباسارى اسقار مىرزاحمەتوۆ باستاعان دەلەگاسياسىنىڭ جۇڭگو حالىق رەسپۋبليكاسىنا رەسمي ساپارى بارىسىندا «نۇر وتان» مەن جۇڭگو كوممۋنيستىك پارتياسىنىڭ اراسىندا 2015-2017 جىلدارعا ارنالعان پارتياارالىق ىنتىماقتاستىق تۋرالى حاتتاماعا قول قويىلدى. بۇل تۋرالى "قامشى پورتالى Baq.kz-كە سىلتەمە جاساي وتىرىپ حابارلايدى.

جۇڭگو حالىق رەسپۋبليكاسىنا جۋىردا جاساعان ساپارى بارىسىندا ەلباسى، «نۇر وتان» پارتياسىنىڭ ءتوراعاسى ن.ءا.نازاربايەۆ ەكى ەل اراسىندا بارلىق سالادا، اسىرەسە ساياسي-ەكونوميكالىق ماسەلەلەر بويىنشا ىنتىماقتاستىقتى نىعايتۋدىڭ ماڭىزدىلىعىن ايتىپ ءوتتى.

وسىعان وراي، جۇڭگو ەلىنىڭ جەتەكشى ساياسي كۇشى – جۇڭگو كوممۋنيستىك پارتياسىمەن ءوزارا ارىپتەستىكتى ودان ءارى جەتىلدىرۋ ماقساتىندا 17 قىركۇيەكتە «نۇر وتان» پارتياسى ءتوراعاسىنىڭ ءبىرىنشى ورىنباسارى اسقار مىرزاحمەتوۆ باستاعان «نۇر وتان» پارتياسىنىڭ دەلەگاسياسى جۇڭگو حالىق رەسپۋبليكاسىنا رەسمي ساپارمەن كەلدى. بەيجىڭ قالاسىندا جۇڭگو كوممۋنيستىك پارتياسىنىڭ باسشىلىعىمەن وتكەن ەكىجاقتى كەزدەسۋ بارىسىندا قوس بيلەۋشى پارتيانىڭ اراسىندا ىنتىماقتاستىق تۋرالى 2015-2017 جج. ارنالعان حاتتاماعا قول قويىلدى.

ساپار بارىسىندا «نۇر وتان» پارتياسىنىڭ دەلەگاسياسى قكپ وك حالىقارالىق بايلانىستار ءبولىمى مەڭگەرۋشىسىنىڭ ورىنباسارى چجوۋ لي مىرزامەن كەلىسسوزدەر وتكىزدى. دەلەگاسيا قۇرامىنا پارتيا حاتشىسى فارحاد قۋانعانوۆ، ق ر پارلامەنتى ءماجىلىسىنىڭ دەپۋتاتى، پارتيا ساياسي كەڭەسى بيۋروسىنىڭ مۇشەسى، پارتيالىق باقىلاۋ كوميتەتىنىڭ ءتوراعاسى قۋانىش سۇلتانوۆ، ق ر پارلامەنتى ءماجىلىسىنىڭ دەپۋتاتى، سىبايلاس جەمقورلىققا قارسى ىس-ارەكەت جونىندەگى رەسپۋبليكالىق قوعامدىق كەڭەسىنىڭ ءتوراعاسى قايىربەك سۇلەيمەنوۆ، پارتيا ءتوراعاسى ءبىرىنشى ورىنباسارىنىڭ كەڭەسشىسى بەرىك قۇرمانعالي، پارتيانىڭ ساياسي مەنەدجمەنت مەكتەبىنىڭ ديرەكتورى اسەت ابدۋالييەۆ كىرگەن.

كەزدەسۋ ناتيجەسىندە «نۇر وتان» پارتياسى مەن جۇڭگو كوممۋنيستىك پارتياسى اراسىنداعى ىنتىماقتاستىق تۋرالى 2015-2017 جج. ارنالعان حاتتاماعا قول قويىلدى. ودان بۇرىن وسىنداي حاتتاماعا 2011 جىلى قول قويىلعانىن ايتا كەتۋ كەرەك.

چجوۋ لي مىرزامەن كەزدەسۋ بارىسىندا ا.مىرزاحمەتوۆ 2013 جىلعى قىركۇيەكتە قحر ءتوراعاسى سي سزينپين نازاربايەۆ ۋنيۆەرسيتەتى قابىرعاسىندا جىبەك جولىنىڭ ەكونوميكالىق بەلدەۋىن قۇرۋ تۋرالى تاريحي باستاما ۇسىنعانىن ەسكە سالدى. بۇنداي اۋقىمدى ترانسكونتينەنتالدى جوبانىڭ جۇزەگە اسىرىلۋى وعان قاتىسۋشى ەلدەردىڭ تۇراقتى ەكونوميكالىق دامۋىنا مۇمكىندىك بەرەتىنىن ايتتى.

«نۇرلى جول» باعدارلاماسى مەن «ءبىر بەلدەۋ، ءبىر جول» باستاماسىنىڭ ۇيلەسىمدىگى ەكى ەل اراسىنداعى ستراتەگيالىق ارىپتەستىكتى نىعايتۋ ءۇشىن جاڭا مۇمكىندىكتەر اشادى»، - دەدى ا.مىرزاحمەتوۆ.

«نۇر وتان» پارتياسى ءتوراعاسىنىڭ ءبىرىنشى ورىنباسارى جۇڭگو حالىقتىق ساياسي كونسۋلتاتيۆتىك كەڭەسى جالپىقىتاي كوميتەتىنىڭ ءتوراعاسى، قكپ وك حالىقارالىق بايلانىستار ءبولىمىنىڭ مەڭگەرۋشىسى ۆان سزياجۋي مىرزامەن كەزدەستى. كەزدەسۋ بارىسىندا ەكىجاقتى ارىپتەستىك ماسەلەلەرى تالقىلانىپ، ەكى ەلدەگى قازىرگى جاعداي ءسوز بولدى.

بۇگىنگى تاڭدا جۇڭگو مەن قازاقستان اراسىندا تىعىز ارىپتەستىك ارا-قاتىناس ورناعانى ايتىلدى. سىرتقى ساۋدا اينالىمى بويىنشا جۇڭگو قازاقستاننىڭ ەڭ ءىرى سەرىكتەسىنە اينالعانى جانە ونىڭ قازاقستاننىڭ جالپى تاۋار اينالىم كولەمىندەگى ۇلەسى 20%-عا جەتكەنى ءسوز بولدى. سوڭعى جىلدىڭ وزىندە ەكى ەل باسشىلارى ءتورت رەت كەزدەسكەن. ن.ءا.نازاربايەۆتىڭ جۋىردا وتكەن قىتايعا ساپارى بارىسىندا 33 قۇجاتقا قول قويىلعان، ونىڭ 28ء-ى كوممەرسيالىق سيپاتقا يە، جالپى قۇنى 23،5 ملرد.دولل.قۇرايدى.

«قىتايمەن ءوزارا دوستىق قارىم-قاتىناستار – قازاقستاننىڭ سىرتقى ساياساتىنىڭ ءداستۇرلى باسىمدىقتارىنىڭ ءبىرى بولىپ تابىلادى. ەكى ەل اراسىندا ديپلوماتيالىق بايلانىستار 23 جىل بۇرىن ورناعان، وسى مەرزىمدە قازاقستان مەن قىتايدىڭ بارلىق سالالار بويىنشا جۇرگىزىلىپ وتىرعان ساياسي ديالوگى ءوزارا دوستاستىق پەن قۇرمەتتەۋدىڭ ۇزدىك كورىنىسىنە اينالىپ وتىر»، - دەپ اتاپ ءوتتى «نۇر وتان» پارتياسى ءتوراعاسىنىڭ ءبىرىنشى ورىنباسارى.

ساپار باعدارلاماسى بويىنشا «نۇر وتان» پارتياسىنىڭ دەلەگاسياسى سونداي-اق جۇڭگو حالىقتىق وكىلدەرى جالپىقىتاي جينالىسى تۇراقتى كوميتەتىنىڭ ءتوراعاسى چجان دەسزيان مىرزامەن كەزدەستى.

كەزدەسۋ بارىسىندا ا.مىرزاحمەتوۆ «نۇر وتان» مەن قكپ ءوز ەلدەرىندە بيلەۋشى پارتيالارى بولىپ تابىلاتىنىن اتاپ ءوتتى. سونىمەن بىرگە ەكى پارتيانى بىرىكتىرەتىن ءبىرقاتار قۇندىلىقتارى مەن جۇمىس باعىتتارىن دا ايتا كەتتى. مىسالعا، ەكى جاق داعدارىستان كەيىنگى دامۋ جونىندەگى مەملەكەتتىك باعدارلامالاردىڭ ورىندالۋىن قاداعالاۋ، ينفراقۇرىلىمدى جاڭعىرتۋ، سىبايلاس جەمقورلىققا قارسى ىس-ارەكەت جونىندەگى ينستيتۋسيونالدى ورتانى نىعايتۋ جانە ت.ب. ماسەلەلەرگە ايرىقشا نازار اۋدارادى.

مەملەكەت باسشىسى، پارتيا ءتوراعاسى ن.ءا.نازاربايەۆتىڭ تاپسىرماسىمەن «نۇر وتان» ەلدىڭ باستى باعدارلامالىق قۇجاتتارى – بەس ينستيتۋسيونالدى رەفورما، «نۇرلى جول» باعدارلاماسى، «100 ناقتى قادام» ۇلتتىق جوسپارىن ىسكە اسىرۋعا تىكەلەي قاتىساتىنى دا ايتىلدى. سونداي-اق پارتيا ءتوراعاسىنىڭ ءبىرىنشى ورىنباسارى جۇڭگو مەن قازاقستاننىڭ ءوزارا ءتيىمدى سەرىكتەستىگىن نىعايتۋعا مۇمكىندىك بەرەتىن پارتياارالىق ارىپتەستىكتىڭ سەرپىندى دامۋىنىڭ ماڭىزدىلىعىنا ايرىقشا توقتالدى.