بۇگىن ورتالىق كوممۋنيكاسيالار قىزمەتىنىڭ الاڭىنداعى باسپا ءسوز ءماسليحاتىندا ەنەرگەتيكا مينيسترلىگىنىڭ اتوم جانە ەنەرگەتيكالىق قاداعالاۋ مەن باقىلاۋ كوميتەتى ءتوراعاسى سۇڭعات ەسىمحانوۆ ەلىمىزدەگى جىلىتۋ جۇيەسى مەن ەلەكتر ستانسيالارىنىڭ وتىن قويمالارىندا 3،4 ملن توننا كومىر مەن 112 مىڭ توننا مازۋت جينالعاندىعىن اتاپ ءوتتى. بۇل تۋرالى "قامشى" پورتالى Baq.kz –كە سىلتەمە جاساي وتىرىپ حابارلايدى.

- قازىرگى كەزدە ەلىمىزدەگى جىلىتۋ جۇيەسى مەن ەلەكتر ستانسيالارىنىڭ وتىن قويمالارىندا 3،4 ملن توننا كومىر مەن 112 مىڭ توننا مازۋت جينالدى. بۇل جالپى كولەمنىڭ باسىم بولىگىن قۇرايدى. ءجۇز پايىزدىق دەڭگەيدە بولماسا دا، سول كورسەتكىشكە جەتەقابىل. ال ەندى جەو-دا وتىن دايىنداۋ جارتىمسىز قارقىنمەن جۇرگىزىلىپ جاتقان مەكەمەلەرگە كەلەر بولساق، ونىڭ ءبىرى – كەنتاۋ قالاسى بولىپ وتىر. مىسالى، قالىپتى جاعداي 16 مىڭ توننا بولسا، جەتكىلىكسىز وتىننىڭ كولەمى 4 مىڭ توننانى قۇراۋدا. سول سەكىلدى سەمەي مەن ارقالىق قالالارىنداعى جاعداي دا وسى شامالاس، - دەدى سۇڭعات قۋات ۇلى.

ايتا كەتەيىك، اعىمداعى جىلدا كەستەگە سايكەس 9 بلوگ پەن 59 قازاندىققا جانە 47 تۋربيناعا كۇردەلى جوندەۋ جوسپارلانعان بولسا، قازىرگى كەزدە ەلەكتر ستانسيالارىنىڭ 5 بلوگى (جىلدىق كولەمنىڭ 55 پايىزى) مەن 38 قازاندىققا (جىلدىق كولەمنىڭ 64 پايىزى) جانە 26 تۋربيناعا (جىلدىق كولەمنىڭ 55 پايىزى) جوندەۋ جۇمىستارى جۇرگىزىلگەن.

- سونداي-اق، تاپ وسى كۇندەرى 3 بلوگ پەن 18 قازاندىق جانە 16 تۋربينادا جوندەۋ جۇرگىزىلۋ ۇستىندە. تۇتاستاي العاندا بارلىق جۇمىستار جوسپارعا سايكەس جۇزەگە اسىرىلۋدا دەپ ايتۋعا بولادى، - دەدى كوميتەت ءتوراعاسى.