16 جەلتوقسان – تاۋەلسىزدىك كۇنى قارساڭىندا، ءتۇپقاراعان اۋدانى، اقشۇقىر اۋىلىندا ەل تاۋەلسىزدىگىنىڭ 30 جىلدىعىنا وراي 160 ورىندىق دەنە شىنىقتىرۋ – ساۋىقتىرۋ سپورت كەشەنى پايدالانۋعا بەرىلدى، دەپ حابارلايدى ءتۇپقاراعان اۋدانى اكىمدىگىنىڭ باسپا ءسوز قىزمەتى.  

نىساننىڭ سالتاناتتى اشىلۋ راسىمىنە وبلىستىق سپورت باسقارماسىنىڭ باسشىسى ق.جۇمابايەۆ، اۋىل اقساقالدارى مەن جاس سپورتشىلار قاتىستى. 

اتالعان سپورت كەشەنىندە فۋتبول، ۆولەيبول، باسكەتبول، قازاقشا كۇرەس، دزيۋدو، بوكس، گيمناستيكا سىندى سپورتتىڭ 11 تۇرىنەن ۇيىرمە اشىلدى. وندا 22 كاسىبي جاتتىقتىرۋشى قىزمەت ەتەتىن بولادى. 

ايتا كەتسەك، ءتۇپقاراعان اۋدانى حالقىنىڭ سپورتپەن اينالىسۋى 2021 جىلى 31،8%-دى قۇراپ وتىر. حالىقتىڭ 1000 ادامعا شاققانداعى سپورتتىق ينفراقۇرىلىممەن ورتاشا قامتاماسىز ەتۋ 31،5 %-دى قۇرايدى. سوڭعى 5 جىلدا 2 سپورت كەشەنى قولدانىسقا بەرىلىپ، قازىرگى تاڭدا بيۋدجەت ەسەبىنەن تاعى ءبىر سپورت كەشەنىنىڭ قۇرىلىسى جۇرگىزىلىپ جاتىر. 

بۇگىندە ءتۇپقاراعان اۋدانىندا 15 سپورت الاڭى، 2 تير ورتالىعى، 11 سپورت زال، 5 كوشە ترەناجەرلارى، 4 سپورت كەشەنى بار. فورت-شيەۆچەنكو قالاسىندا اۋداندىق بالالار مەن جاسوسپىرىمدەر سپورت مەكتەبى، اۋداندىق بالالار مەن جاسوسپىرىمدەر سپورت مەكتەبىنىڭ اقشۇقىر اۋىلى فيليالى، تاۋشىق اۋىلى سپورت كەشەنى، «سۇلەيمەن» سپورت كەشەنى سالاۋاتتى جاس ۇرپاقتى تاربيەلەۋدە.